ጌሻ ማፃፋ
ህዝቄላ 16
አማነቶና የሩሳላመ
ጎዳ ቃላይ ሀይሳዳ ያግሸ ታኮ ይስ። “አሳ ናአዉ፥ የሩሳላመ እያ ቱና ኦሶታ ኤርሳ። ኡባ ሃርያ ጎዳይ የሩሳላመኮ ሀይሳዳ ያጌስ። ነ ማይዛነ ነ ሼሻይ ካናነ ቢታና፤ ነ አዋይ አሞረ፤ ነ አይያ ህተ አስ። ነ የላትያ ጋላስ ነ ጉልአይ ቃንፀትበና፤ ዎይኮ ነና ጌሻናዉ ሃን ሜጨታባካ፤ ዎይኮ ማፅነን ጎርፐታዳ ጩርቃን ፃፀታባካ። ሀ ጌተትዳይሳታፐ ሀር አቶሽን እሱዋ ኦናዉ ነዉ ምሸትዳይ ባዋ። ነ የለትዳ ጋላስ ቦረትዳ ግሾ ዎራ የገታዳሳፐ አትሽን፥ ነዉ ኦንካ ቃትቤና።
“ታ ያራ አያ ዎደ ኔኒ ነ ሱን ኢታዳ ዞሄትሽን በአዳ፥ ኔኒ ነ ሱን ዝንእዳ ደእሽን፥ ‘ደኦን ደአ’ ያጋስ። ታ ነና አራዳ ቢታን ደእያ ካዳ ድቻስ። ኔኒ ድጫ አዱቃዳ፥ ጋማ ጋካዳሳ። ነ ንይ ኡትስ፤ ነ ሁጰይ ድጭስ፤ ሽን ነ ካሎ ደኣሳ።
“ዛራዳ ታ ያራ አሸ ነና ፄልያ ዎደ፥ ኔኒ ገሎስ ጋካዳ፥ ካሎ ቦርሰትያ አሰ ግዳዳሳ። ታ አፍላ ማጫራ ነ ቦላ የጋዳ፥ ነ ካሉዋ ካማስ፤ ታ ኔራ ጫቃዳ ነና ታዉ ቡዞ ኦስ” ያጌስ ኡባ ሃርያ ጎዳይ።
“ሱን ኢትዳ ነ አሳተ ሃን ሜጫ ጌሻዳ፥ ዛይተን ትያስ። ታኒ ነና አሌቆ ማኦ ማይዛስ፤ ሎኦ ጋልባፈ ኦሰትዳ ጫማ አስሳስ፤ ሊኖ ሻሸ ነና ቃጭሳስ፤ አልኦ ኩታ ጉልንትሳስ። ነና አሌቆን አሌቅሳስ፤ ነ ኩሸን ሳጋዮ አስ፤ ነ ቆያ ዎርቃን ማይዛስ። ነ ስንነ፥ ነ ሀይን ዎርቃ፥ ነ ሁጰን ሎኦ ካላቻ ዎስ። ነ ዎርቃንነ ብራን አሌቀታዳሳ፤ ነ ማኦ ኡባይ አልኦ ሊኖ፥ አልኦ ኩታነ አሌቆ ቃምሰ። ነ ምያ ካይ ሎኦ ለ፥ ኤስነ ዛይተ። ኔኒ ዳሮ ፑላታዳ፥ ካዎ ግዳናዉ ጋካዳሳ። ታ ነዉ እምዳ ቦንቹዋ ጋሶን፥ ነ ዳሮ ፑላትዳ ግሾ ካዎተታ ኡባን ኤረታዳሳ” ያጌስ ኡባ ሃርያ ጎዳይ።
“ሽን ኔኒ ነ ፑላን አማነታዳ፥ ሀራታን ኤረትዳ ግሾ ኦገራ አያ ኡባስ ነና አ እማዳሳ። ነ ማኡዋፐ ባጋ ኤካዳ፥ ነ ጎይኖ በሳታ አሌቅሳዳሳ፤ ያን ላይማታዳሳ። ሄሳ መላባይ ሀይሳፈ ካሰ ሀንቤና፤ ስንፈካ ሀናናዉ በሰና። ታ ነዉ እምዳ ዎርቃፈነ ብራፐ ኦሰትዳ ሎኦ አሌቆ፥ አደ ምስለታ ኦዳ ኤንታራ ላይማታዳሳ። ታ እምዳ አሌቆ ማኡዋ ሄ ምስለታ ማይዛዳሳ፤ ታ ዛይትያነ ታ እፃንያ ኤንታዉ ሺሻዳሳ። ታ ነዉ እምዳ ሎኦ ልያ፥ ዛይትያነ ኤሳ ኤንታ ስንን ሳዎ ቶንኩ ግያ ያርሾ ኦዳ ሺሻዳሳ” ያጌስ ኡባ ሃርያ ጎዳይ።
ነ ላይማተይ ጉፅቤናሽን፥ ነ ታዉ የልዳ አደ ናይታነ ማጫ ናይታ ኤፋዳ፥ ኤቃታስ ያርሻዳሳ። ነ ታ ናይታ ሹካዳ፥ ኤቃታስ ታማን ያርሻዳሳ። ነ ቱናተንነ ነ ላይማተን ኡባን ደአሸ፥ ካሰ ነ ያላጋተ ላይ፥ ካሎ ሱን ሙከታዳ ዞሄትያ ዎድያ ዶጋዳሳ።
ኡባ ሃርያ ጎዳይ፥ “አየ! ነና አየ!” ያጌስ። ሀ ኢታተ ኡባ ቦላ ጉጃዳ፥ ዳባባ ኡባን ቃ ኤቃ ጎይንያ በሳታ ነዉ ጊግሳዳሳ። ኦገ ዶናን ላይማትያ በሳታ ኬፃዳ፥ ነ ፑላ ቱንሳዳሳ፤ ኦገራ አያ ኡባስ ነ አሳተ አ እማዳ፥ ላይማተ ዳርሳዳሳ። ኔኒ አሞን ኩምዳ፥ ነ ሾሮ ግድዳ ግብፀታራ ላይማታዳሳ፤ ነ ላይማተን ታና ይሎያዳሳ። ሄሳ ግሾ፥ ታኒ ታ ኩሽያ ነ ቦላ ደንስ፤ ነና ጋክያ ነ አንጁዋ ጉስ። ታኒ ነና ነ ፖኮ ሀኖታን ዬላትያ፥ ነና ሞርክያ ፍልስፄመታስ አዳ እማስ። ነ አሎና አስ ግድያ ግሾ፥ አሶረ አሳራ ላይማታዳሳ። ሄ ኡባን ታዉ ግዳና ጋባካ። ዛልኤን አቅያ ካልዳወታራ ላይማታዳሳ፥ ሽን ሄስ ታዉ ግዳና ጋባካ።
ኡባ ሃርያ ጎዳይ፥ “ኔኒ ዬል ባይና ላይማ ማጫሳዳ ሀንያራ፥ ነ አይብ ላፋ አሰ! ኔኒ ኦገ ዶናን ላይማትያ በሳታ ነዉ ኬፅያ ዎደነ ዳባባ ኡባን ኤቃስ ጎይንያ በሳታ ጊግሳዳሳ። ግዶሽን፥ ሀራ ላይማ ማጫሳት ኤክያ ሚሸ ኤካባካ። ኔኒ ባ አዝናይ ደእሽን፥ አላጋ አደታራ ላይማትያ ማጫሳ መላ። ላይማ ማጫሳስ ሚሸይ ቃንፀቴስ፥ ሽን ኔኒ ነ ላገታስ እሞታ እማሳ፤ ኤንቲ ኡባ በሳፈ ኔኮ ያና መላ ኤንታዉ ሚሸ እማሳ። ኔኒ ላይማትያ ሀራ ማጫሳታፐ ዱማ፤ ኔራ ላይማታናዉ ነና ካልያ ኦንካ ባዋ። ኔኒ ገደ እሞታ እማሳፐ አትሽን፥ ሃ ኤካካ፤ ኔኒ ሀራታፐ ዱማ” ያጌስ። ነኖ፥ ላይማ የሩሳላመ ጎዳ ቃላ ስአ። ኡባ ሃርያ ጎዳይ ሀይሳዳ ያጌስ፤ “ኔኒ ነ ላይማተ አሙዋን ነ ላገታስ ነ አሳተ ቃርዳ ግሾ፥ ነ ኤቃታ ኡባ ግሾነ ነ ናይታ ሱ ነ ኤንታዉ ጉስዳ ግሾ፥ ነ ኤንታን ኡፋይትዳ ነ ላገታ ኡባ፥ ነ ዶሰይሳታነ ነ እፀይሳታ ታ ነዉ ሞርከ ኦዳ ሺሻና። ታኒ ኤንታ ዱማ ዱማ በሳፈ ነ ዩሹዋን ሺሻዳ፥ ኤንታ ስንን ነና ቃራና፤ ኤንቲ ነ ካሉዋ በአና። ታኒ ላይማ ማጫሳታ ቦላነ ሱ ጉስያ ማጫሳታ ቦላ ፕርደይሳዳ ነ ቦላ ፕርዳና፤ ታ ሀንቁዋንነ ታ ቃናትያን ነ ቦላ ሀይቆ ኤሀና። ታ ነና ነ ላገታስ አዳ እማና፤ ኤንቲ ነ ላይማትያ በሳታነ ኤቃ ጎይኖ በሳታ ላላና። ኤንቲ ነ ማኡዋ ቃርድ፥ ነ ሎኦ አሌቁዋ ኤክድ፥ ነና ፅረ ካሎ አሻና። ነና ሹቻን ጫድድ፥ ማሻን ቃንፀረድ ዎያ አሳ ነ ቦላ ኤንቲ ደንና። ኤንቲ ነ ኬ ፁግድ፥ ዳሮ ማጫሳ ስንን ነ ቦላ ፕርዳና። ታ ነ ላይማተ አግሳና፤ ነ ላገታስ ገደ ሚሸ ቃንፃካ። ሄሳን ነ ቦላ ደእያ ታ ይሎይ እርፃና፤ ታ ቃናትያ ኔፐ ሃሳና፤ ህዛፐ ስእ ጋና፤ ዛራዳ ሀንቀትከ። ኔኒ ነ ናአተ ላይ ዶጋዳ፥ ሀ ኢታ ኦሶ ኡባን ታና ሀንቀዳሳ። ሄሳ ግሾ፥ ነ ኦዳባ ኡባ ታ ነ ቦላ ዛራና። ነ ቱና ኦሶ ኡባ ቦላ ላይማተ አይስ ጉጃዲ?” ያጌስ ኡባ ሃርያ ጎዳይ።
ናእያ አየ መላ
“የሩሳላመ፥ አሳይ ነና፥ ‘ናእያ አየ ማላ’ ግድ ሌምሳና። ቱማ ኔኒ ባ አዝናነ ባ ናይታ ሻተትያ ነ አየ መላ፤ ባንታ አዝናታነ ባንታ ናይታ ሻተትያ ነ ምቸታ መላ፤ ነ አይያ ህተ አስ፤ ነ አዋይ አሞረ አስ። ነ ባይራ ምችያ፥ ባ ጉታራ ኔፐ ፑደሀ ባጋን ደእያ ሳማረነ እ ማጫ ናይታ፤ ነ ካሎ ምችያ ባ ጉታራ ኔፐ ዱገሀ ባጋን ደእያ ሶዶመነ እ ማጫ ናይታ። ነ ኤንታ ኦግያ ካላዳ ኤንታ ቱና ኦሶታ ፖሎ ፃላላ ግዶናሽን፥ ጉ ዎደን ኤንታፈ አዳ ኢታ ኦዳሳ።
“ታኒ ኡባ ሃርያ ጎዳይ ታ ደኡዋን ጫቃስ። ኔንነ ነ ጉታን ደኤይሳት ኦዳይሳዳ ነ ምችያ ሶዶመነ እ ማጫ ናይት ኦቦኮና። ነ ምችያ ሶዶመ ኦዳ ናጋራይ ሀይሳ፦ እያነ እ ማጫ ናይት ኦቶራንቾ፥ ኤንቲ ካልዳይሳታነ እንጀ ዱሱ ደእኮካ ኤንቲ መቶታንቾታነ ማንቆታ ማድቦኮና። ኤንቲ ኦቶራንቾ ግድድ፥ ታ ስንን ቱና ኦሶ ኦዶሶና። ሄሳ ግሾ፥ ህንተ በእዳይሳታ ታ ኤንታ ይሳስ።
“ሳማረይ ነ ኦዳ ናጋራስ ባጋካ ኦቡኩ፤ ነ ኢፐ አዳ ሻትያ ቱና ኦዳሳ። ነ ኦዳ ቱና ኦሶታ ኡባ ጋሶን ነ ምቸት ፅሎ አዛና መላ ኦዳሳ። ኔኒ ነ ምቸታ ሱረ አስ ከስዳ ግሾ ዬላ ማአ። ነ ናጋራይ ኤንታይሳፈ አድ ኢትን፥ ኤንቲ ኔፐ ፅሎ ዳንዶሶና። ሄሳ ግሾ፥ ካዉያዳ ዬላ ማአ።
“ግዶሽን፥ ሶዶመነ እ ማጫ ናይታ፥ ሳማረነ እ ማጫ ናይታ ታኒ ኤንታ ሻሉዋ ዛርያ ዎደ ነ ሻሉዋካ ዛራና። ነባን ኔኒ ዳሮ ዬላታና፤ ነ ካዉሻተይ ዳሮ ግድያ ግሾ ነ ምቸት ሄሳን ምነታና። ነ ምቸት፥ ሶዶመ ባ ጉታታራነ ሳማርያ ባ ማጫ ናይታራ ባንታ ካሰ ዱሳኮ ስማና፤ ነካ ነ ማጫ ናይታራ ካሰ ነ ዱሳኮ ስማና። ነ ኦቶርትያ ዎደ ነ ምቸ ሶዶም ቦላ ቀልቅሳብኪ? ሄስ ሀንዳይ ነ ናጋራይ ቆንጫናፐ ካሰ ግደኔ? ሀእ ኔኒ ነ ዩሹዋን ደእያ ኤዶመስ ምቾታስነ እ ሾሮታስ፥ ፍልስፄመስነ እ ምቸ ናይታስ፤ ሄሳዳካ ነና እፅያ ኡባስ ቦረስ አታዳሳ። ነ ላይማተ ግሾነ ነ ቱና ኦሶታ ግሾ ነ ሴረታና” ያጌስ ጎዳይ።
ኡባ ሃርያ ጎዳይ ሀይሳዳ ያጌስ፤ “ኔኒ ኡፋይሳ ቃላ መንዳ፥ ጫቁዋ ላልዳ ግሾ ነ ኦዳ ኦሱዋዳ ታ ነዉ ኦና። ግዶሽን፥ ታ ነ ናአተ ዎድያን ኔራ ጫቅዳ ጫቆ ቃላ ሀሳያና፤ መርናዉ ኔራ ጫቃና። ነ ባይራነ ነ ካሎ ምቸታ ታ ኔኮ ኤህያ ዎደ ኔኒ ነ ሄመ ሀሳያዳ ዬላታና። ሽን ሄስ ታ ኔራ ጫቅዳ ጫቁዋ መላ ግዶና እፅኮካ፥ ታ ኤንታ ነዉ ናአ ኦዳ እማና። ታኒ ታ ጫቁዋ ኔራ ኦራና፤ ሄ ዎደ ታ ጎዳ ግደይሳ ነ ኤራና። ነ ኦዳ ናጋራ ኡባ ታኒ አቶ ግያ ዎደ ነ ኦዳባ ሀሳያዳ፥ ዬላስ ነ ዶና ኦይካና” ያጌስ ኡባ ሃርያ ጎዳይ።
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.