ህዝቄላ 15

ዎይነ ሌምሶ

1ጎዳ ቃላይ ሀይሳዳ ያግሸ ታኮ ይስ። 2“አሳ ናአዉ፥ ዎይነይ ዎራን ደእያ ሀራ ምፈ አይብን አ? 3ጎእ ደእያ ባ ኦናዉ ቃንፀትድ ኤርዬ? አይኮባ ካቅያ ኮጫ እያፐ ከሳናዉ ዳንዳኤቲ? 4እያ ታማ ኦይሰናዉ ታማን የግን፥ ፄራይነ ዱለይ ታማን ሜተትን አትዳ ዱንቻይ አይ ማዳኔ? 5ፁገቶና ደእሸ፥ አይኮ ማዶናይስ ታም ምን ምጭድ አይ ማዳኔ?”

6ሄሳ ግሾ፥ ኡባ ሃርያ ጎዳይ ሀይሳዳ ያጌስ፦ “ታኒ ዎራን ደእያ ም ግዶፈ ዎይነ ም ታማስ አዳ እምዳይሳዳ የሩሳላመን ደእያ አሳ ሄሳዳ ኦና። 7ታኒ ታ ሶምኡዋ ኤንታ ቦላ ዛራና፤ ኤንቲ እስ ታማፐ ከይኮካ፥ ሀራ ታም ኤንታ ማና። ታኒ ታ ሶምኡዋ ኤንታ ቦላ ዛርያ ዎደ ታኒ ጎዳ ግደይሳ ህንተ ኤራና። 8ኤንቲ ታናን አማነቶና አግዳ ግሾ ታ ኤንታ ቢታ ባይሳ ከሳና” ያጌስ ኡባ ሃርያ ጎዳይ።