2 ቆሮንቶሳ 9

አማንያ አሳስ ሺቅዳ ሚሸ

1አማንያ አሳስ ከስያ ሚሽያባ ታ ህንተዉ ፃፋናዉ ኮሸና። 2ህንተ ማዳናዉ ኬህ አሞተይሳ ታ ኤራይስ። ህንተ አካያ አሳይ፥ ዝላይፈ ዶምድ ማዳናዉ ጊገትዳይሳ ታኒ ማቀዶነ አሳስ ዶና ኩንዳ ኦዳስ። ህንተ ግታ አሞይካ ኤንታፈ ዳሮታ ደንስ። 3ሀ ኦሱዋን ህንተናን ኑ ጬቀትያ ጬቆይ ሀዳ ግዶና መላ ኮይሮ ህንተባ ታ ኦድዳይሳዳ ህንተ ጊገትድ ናጋና መላ ሀ እሻታ ህንተኮ ኪታስ። 4ማቀዶነ አሳይ ታራ ብድ፥ ህንተ ጊገቶና ደእሽን፥ ደምኮ፥ ኑ ህንተናን ዬላታና፤ ቃስ ህንተ ኑፐ አ ዬላታና። 5ሄሳ ግሾ፥ ሀ እሻት ታፐ ስንትድ ህንተኮ ብድ፥ ህንተ እማና ግዳ እሙዋ ካሰትድ ጊግሳና መላ ታ ኤንታና ኪታስ። ታኒ ጋክያ ዎደ ሄ እሞይ ጊግድ ኡቴስ። ሄ ዎደ ሄ ኬሀተ እሞይ ዎልቃን ግዶናሽን፥ ዶሳን ግደይሳ ኤርሴስ።

6ሀይሳ አኬክተ፤ ጉ ዘርዳይ ጉ ጫካና፤ ዳሮ ዘርዳይ ዳሮ ጫካና። 7ፆሳይ ኡፋይሳን እምያ ኡራ ዶስያ ግሾ፥ ዎልቃን ዎይኮ ዶስ ባይና ግዶናሽን፥ እስ እስ አስ ባ ዎዛናን ቆፕዳይሳዳ ዶሳን እማናዉ በሴስ። 8ኡባ ዎደ ኡባባን ኮሽያባ ኡባ ደምድ ሎኦ ኦሶ ኡባ ኦናዉ ዳንዳአና መላ ፆሳይ ህንተዉ ባ አንጁዋ ዳርሳና። 9ጌሻ ማፃፋን፥

“እ ባ ሻሉዋ ማንቆታስ ላልስ፤

እያ ፅሎተይ መርናዉ ደአና”

ያጌስ።1

10ዘረይሳስ ዘረ፥ ማናዉ ካ እምያ ጎዳይ፥ ህንተ ዘርያ ዘረ ዳርስድ እማና። ህንተ ፅሎተ አይፍያካ ዳርሳና።2

11ዳሮ አሳይ ህንተ እምያ እሙዋ ኑፐ ኤክድ፥ ፆሳ ጋላታናዳ፥ ህንተ ኡባ ዎደ ዳርስድ እመይሳታ ግዳና መላ ፆሳይ ህንተና ኡባ ባጋራ ዱረያና። 12ሀ ህንተ እምያ እሞይ አማንያ አሳ ፓጫ ኩን ፃላላ ግዶናሽን፥ አሳይ ፆሳ ጋላታናዉ ጋሶ ግዴስ። 13ሀ ህንተ ኦሶይ ህንተ አማኑዋ ኤርስድ ክርስቶሳ ዎንገላ ህንተ አማንድነ እያዉ ኪተትድ ህንተዉ ደእያባ ኤንታራነ ሀራታራ ሻከትዳ ግሾ ኡባይ ፆሳ ቦንቻና። 14ፆሳይ ህንተዉ እምዳ አ ኬሀተ ግሾ ኤንቲ ህንተዉ ፆሳ ዎስሸ ህንተና በአናዉ ላሞቶሶና። 15ዛው ባይና ፆሳ እሙዋስ ፆሳይ ጋላተቶ።