ጌሻ ማፃፋ
1 ካዎታ 16
ሀናና ናኣ ግድዳ፥ እዩ ባጋራ ጎዳ ቃላይ ባኦሳባ ሀይሳዳ ያግስ፤ “ታኒ ነና ባናፐ ደንዳ ታ አሳ እስራኤለ ቦላ ሀላቃ ኦስ፤ ሽን ኔኒ እዮርባማ ኦግያን ሄመታዳሳ። ቃስ ታ አሳ እስራኤለ ናጋራ ኦስሳዳ ኤንታ ናጋራን ታና ሀንቀዳሳ። ሄኮ፥ ታኒ ባኦሳነ እያ ሶ አሳ ፕታና ሀናይስ። ባኦሳ፥ ታኒ ነ ሶ አሳ ናባፃ ናኣ እዮርባማ ሶ አሳዳ ኦና። ባኦሳ ኮቸ ግድድ ካታማን ሀይቅያ ኦናካ ካን ማና፤ ቃስ ጋፃረን ሀይቅያ ኦናካ ሳሎ ካፎት ማና” ያግስ።
ባኦስ ሀንዳ ሀራባይ፥ እ ኦዳባይነ እያ ምኖተይ እስራኤለ ካዎታ ታርከ ማፃፋን ፃፈትስ። ባኦስ ሀይቅድ ባ ማይዛታን ጋሄትድ፥ ትርሳ ካታማን ሞገትስ። እያ ናአይ ኤል እያ በሳን ካዎትስ። ጉጅድካ፥ ጎዳይ፥ ናብያ እዩ ባጋራ ባኦሳ ቦላነ እያ ሶ አሳ ቦላ ትንብተ ኦድዳ ጋሶይ፥ ባኦስ ኦዳ ናጋራ ግሾነ እዮርባምነ እያ ሶ አሳይ ኦዳይሳዳ ኢታባ ኦድ፥ ጎዳ ሀንቀዳ ግሾሳ። ቃስ እ እዮርባማ ሶ አሳ ኡባ ዎድ ዉርስዳ ግሾሳ።
እስራኤለ ካዋ ኤላ
ይሁዳ ካዎይ አስ ካዎትዳ ላታማነ ኡሱፑን ላይን፥ ባኦሳ ናአይ ኤል እስራኤለን ካዎትስ። ትርሳ ካታማን ኡትድ ናምኡ ላይ ካዎትስ። ካዋ ቶራ ሞጮናታፐ እሱዋ ግድድ፥ እያ ፓራ ጋረታፐ ባጋ ኪትያ ዝምር ካዋ ቦላ ማቀትስ። ካዎይ ኤል ሄ ዎደ ትርሳን ደእያ ካዎ ጋ አዋተን አይስያ አርፃ ሶን ማትድ ኡትስ። ይሁዳ ካዎይ አስ ካዎትዳ ላታማነ ላፑን ላይን ዝምር፥ አርፃ ሶ ገልድ ካዋ ዎድ እያ በሳን ባዉ ካዎትስ።
ዝምራ ካዎትዳ መላ ባኦሳ ሶ አሳ ኡባ ዎስ። ባኦስ ዳቦ ግድን ላገ ግድን እስ አደካ ፓፃ አሽቤና። ናብያ እዩ ባጋራ ጎዳይ ባኦሳ ቦላ ኦድዳ ቃላዳ ዝምር ባኦሳ ሶ አሳ ኡባ ዎድ ይስስ። ሄስ ሀንዳይ ባኦስነ እያ ናአይ ኤል ባንታ ኤቃ ጎይንድ ኦዳ ናጋራ ጋሶንነ እስራኤለ አሳ ኦስስዳ ናጋራ ጋሶን፥ ጎዳ እስራኤለ ፆሳ ሀንቀዳ ግሾሳ።
ኤል ሀንዳ ሀራባይነ እ ኦዳባይ እስራኤለ ካዎታ ታርከ ማፃፋን ፃፈትስ።
እስራኤለ ካዋ ዝምራ
ይሁዳ ካዎይ አስ ካዎትዳ ላታማነ ላፑን ላይን ዝምር ትርሳን ላፑን ጋላሳ ፃላላ ካዎትስ። ሄ ዎደ እስራኤለ ኦላንቾት ግባቶና ጌተትያ ፍልስፄመ ካታማ ዩሹዋ ተቅዶሶና። እስራኤለ አሳይ ዝምሪ ካዋ ቦላ ማቀትድ እያ ዎዳይሳ ስእዳ ዎደ ቶራ ሞጮና ኦምራ ሄ ጋላስ ሄ በሳን እስራኤለ ካዎ ኦድ ካዎዶሶና። ኦምርነ እስራኤለ አሳይ ግባቶናፐ ከይድ ትርሳ ካታማ ተቅዶሶና። ካታማይ ኦይከትዳይሳ በእዳ ዎደ ዝምር ካዎ ጋ ግዶን ደእያ ግምብያ ገልድ ካዎ ጋ ታማን ኦይስ፤ እካ ሀይቅስ። ሄስ ሀንዳይ እዮርባም ኦዳ ናጋራነ እስራኤለ አሳ ኦስስዳ ናጋራ ካልድ ዝምር ጎዳ ስንን ኢታባ ኦዳ ግሾሳ።
ዝምር ሀንዳ ሀራባይነ እ ማቅዳ ማቆይ እስራኤለ ካዎታ ታርከ ማፃፋን ፃፈትስ።
እስራኤለ ካዋ ኦምራ
ሄ ዎደ እስራኤለ አሳይ ናምኡ ከይድ ሻከትስ። አሳፐ ባጋይ ግናታ ናኣ ትብና ካዎናዉ ኮይን፥ ባጋይ ቃስ ኦምራ ካዎናዉ ኮይስ። ሽን ኦምራ ማድያ አሳይ ግናታ ናኣ ትብና ማድያ አሳፐ ምንዳ ግሾ ትብን ሀይቅን ኦምር ካዎትስ።
ይሁዳ ካዎይ አስ ካዎትዳ ሀስታማነ እስን ላይን፥ ኦምር እስራኤለ ቦላ ካዎትድ ታማነ ናምኡ ላይ ሃርስ፤ እያፐ ኡሱፑን ላይ ትርሳን ሃርስ። ኦምር ሳማርያ ዙማ ሳምራ ጌተትያ አድያፈ 6,000 ብራ ሳንትመን ሻምድ፥ ያን ካታማ ኬፅስ። ሄ ካታማ ሄ ዙማ ጎዳ ሱንን ሳማረ ግድ ሱንስ።
ሽን ኦምር ጎዳ ስንን ኢታባ ኦስ፤ እ ካሰ ደእዳ ካዎታ ኡባፈ አድ ናጋራ ኦስ። ኦምር ናባፃ ናአይ እዮርባም ኦዳ ናጋራነ እስራኤለ አሳ ኦስስዳ ናጋራ ካልስ፤ ሄ ፓና ኤቃ ጋሶን ጎዳ፥ እስራኤለ ፆሳ ሀንቀስ።
ኦምር ሀንዳ ሀራባይ፥ እ ኦዳባይነ እያ ምኖተይ እስራኤለ ካዎታ ታርከ ማፃፋን ፃፈትስ። ኦምር ሀይቅድ ባ ማይዛታን ጋሄትድ፥ ሳማረን ሞገትስ። እያ ናአይ አካብ እያ በሳን ካዎትስ።
እስራኤለ ካዋ አካባ
ይሁዳ ካዎይ አስ ካዎትዳ ሀስታማነ ሆስፑን ላይን፥ ኦምራ ናአይ አካብ እስራኤለን ካዎትስ። ኦምራ ናአይ አካብ ሳማረን እስራኤለ ቦላ ላታማነ ናምኡ ላይ ካዎትስ። ኦምራ ናአይ አካብ ባፐ ስን ካዎትዳ ካዎታ ኡባፈ አያ ኢታባ ጎዳ ስንን ኦስ። ናባፃ ናአይ እዮርባም ኦዳ ናጋራ ላፋባ ግድ ቆፎ ፃላላ ግዶናሽን፥ ስዶና ካዋ ኤትባላ ናእዉ ኤልዛቤሎ ባዉ ማቾ ኤክድ፥ ባኣለ ኤቃስ ኦሶነ ጎይኖ ዶምስ። ሳማረን እ ኬፅስዳ ባኣለ ኤቃ ኬን ያርሾ በሲ ኬፅስ። ቃስ አካብ አሼራ ጌተትያ ፆሰ ምስልያ ኤስድ፥ ባፐ ስን ደእዳ ካዎታ ኡባፈ አድ ጎዳ እስራኤለ ፆሳ ሀንቀያ ናጋራ ኦስ።
አካባ ካዎተ ዎደ ቤተለፐ ይዳ፥ ህኤላ አደይ እያርኮ ዛሪድ ኬፅስ። ናወ ናኣ እያሱ ባጋራ ጎዳይ ኦድዳይሳዳ፥ ህኤል እያርኮ ኬፃናዉ ባስያ ዎደ አቤሮ ጌተትያ ባይራ ናአይ ሀይቅስ። ቃስ ሳንቃ አያ ዎደ ሳጉባ ጌተትያ ካሎ ናአይ ሀይቅስ።
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.