ጌሻ ማፃፋ
1 ካዎታ 15
ይሁዳ ካዋ አብያ
(2 ታር 13:1—14:1)
ናባፃ ናአይ እዮርባም ካዎትዳ ታማነ ሆስፑን ላይን አብይ ይሁዳን ካዎትስ። አብይ የሩሳላመን ሄ ላይ ካዎትስ። እያ አይያ አበሰሎመ ናአ፤ እ ሱንይ ማእኮ። እያፐ ካሰ፥ እያ አዋይ ኦዳ ናጋራ ኡባ ኦስ። እያ ዎዛናይ እያ አዋ አዋይ ዳዊታ ዎዛናይ ፖሎ ግድዳይሳዳ ጎዳ፥ ባ ፆሳ ስንን ፖሎ ግደና። ግዶሽን፥ እያፐ ጉየ የሩሳላመን ካዎታና መላነ የሩሳላመ ሳሮተ ናጋና መላ ጎዳይ እያ ፆሳይ፥ ዳዊታ ግሾ አብያስ እስ አደ ናኣ እሚስ። ጎዳይ ሄሳ ኦዳይ፥ ዳዊቲ ህተ አድያ ኦርዮና ቦላ ናጋራ ኦዳይሳፈ አትሽን፥ ባ ደኦ ላይ ኡባን ጎዳ ኪታፐ እስባካ ባልቤና። አብይ ደእዳ ላይ ኡባን ሮብኣምነ እዮርባም ኦለትሸ ደእዶሶና።
አብይ ሀንዳ ሀራባይነ እ ኦዳባ ኡባይ ይሁዳ ካዎታ ታርከ ማፃፋን ፃፈትስ። አብይነ እዮርባም ኦለትሸ ደእዶሶና። አብይ ሀይቅድ ባ ማይዛታን ጋሄትስ፤ እ ዳዊታ ካታማን ሞገትስ፤ እያ በሳን እያ ናአይ አስ ካዎትስ።
ይሁዳ ካዋ አሳ
(2 ታር 15:16—16:6)
እስራኤለ ካዎይ እዮርባም ካዎትዳ ላታማን ላይን አስ ይሁዳን ካዎትስ። አስ የሩሳላመን ኦይታማነ እስ ላይ ካዎትስ። እያ ዎጋ አየ ሱንይ ማእኮ፤ እያ አበሰሎመ ናአ። አስ ባ ማይዛይ ዳዊቲ ኦዳይሳዳ፥ ጎዳ ስንን ሱረባ ኦስ። ጎይኖ ዎጋ ኦድ አደይ አደራ ላይማተሳታ አስ ቢታፈ ይስስ። እያፐ ካሰ ደእያ ካዎት መዳ ኤቃ ምስለታ ኡባ መንረስ። እያ ዎጋ አይያ ማእካ አሼራ ጌተትያ ፆሴስ ቱና ኤቃ ምስለ መዳ ግሾ፥ ካዎ አዮ ጌተትያ ቦንቾ በሳፈ እዮ ድግስ። አስ ሄ ኤቃ ምስልያ ቃንፀረድ ቀድሮና ዛንጋራን ፁግስ። አስ ቃ ጎይኖ በሳታ ኡባ ይሶና አግኮካ፥ እ ባ ደእዳ ላይ ኡባን ፆሳስ አማነትያ አስ ግድድ ደእስ። እነ እያ አዋይ ፆሳስ ዱማይድ ዎዳ ብራ፥ ዎርቃነ ሀራ ሚሸታ ኤህድ፥ ፆሳ ኬን ዎስ።
ይሁዳ ካዎይ አስነ እስራኤለ ካዎይ ባኦስ፥ ባንታ ላይ ኡባን ኦላን ደእዶሶና። እስራኤለ ካዎይ ባኦስ ይሁዳ ቦላ ደንድድ፥ ይሁዳ ካዋ አሳ ቢታፈ ኦንካ ገሎና መላነ ከዮና መላ ተቃናዉ ራማ ዩሹዋ ግምብስ።
ሄሳ ጋሶን ካዎይ አስ ፆሳ ኬንነ ካዎ ጋን ደእያ ዎርቃነ ብራ ኡባ ከስድ ባ ሞርናታ ኩሸን ዎስ። ሄዝዮና ናኣ ናኣ፥ ፃብርሞና ናኣስ፥ ዳማስቆን ደእያ አራመ ካዋ በን-ሀዳዳ እሞታ ኦድ የድሸ ሀይሳዳ ያግስ፤ “ካሰ ታ አዋራነ ነ አዋራ ጫቅዳይሳዳ፥ አነ ታራነ ኔራ ጫቆስ። ሄኮ፥ ታኒ ሀ ብራነ ዎርቃ ታኒ ነዉ እሞታ ኦዳ የዳስ። እስራኤለ ካዎይ ባኦስ ባ ኦላንቾታ ታ ቢታፈ ከሳና መላ ኔኒ ካሰ እያራ ጫቅዳ ጫቁዋ መን” ያግስ።
በን-ሀዳድ ካዎይ አስ ግዳይሳ ኤክድ፥ ባ ቶራ ሞጮናታ እስራኤለ ካታማታ ኦላናዉ የድስ። ኤንቲ እዮና፥ ዳነነ አቤል-ቤት-ማእካ ካታማታ፥ ጋልላ አባ ማታን ደእያ ቢታነ ንፍታለመ ቢታራ ጋድ ኦይክዶሶና። ካዎይ ባኦስ ሄሳ ስእድ፥ ራማ ግምበይሳ አግድ ትርሳ ብስ።
ሄሳፈ ጉየ ካዎይ አስ ይሁዳን ደእያ አሳ ኡባ ኪትን፥ እሶይካ አቶና ደንድድ፥ ባኦስ ያን ጎኤትያ ሹቻነ ም ራማፐ ጋዝዶሶና። ካዎይ አስ ምፅጳንነ ብንያመን ደእያ ግብአ ግምብስ።
አስ ሀንዳ ሀራባይ፥ እያ ምኖተይ ኡባይ፥ እ ኦዳባ ኡባይነ እ ኬፅዳ ካታማት ይሁዳ ካዎታ ታርከ ማፃፋን ፃፈትስ። ሽን እ ጭምዳ ዎደ ባ ቶሁዋ ሳከትስ። አስ ሀይቅድ፥ ባ ማይዛታን ጋሄትድ ባ ማይዛ ዳዊታ ካታማን ሞገትስ። እያ ናአይ እዮሳፈፅ እያ በሳን ካዎትስ።
እስራኤለ ካዋ ናዳባ
ይሁዳ ካዎይ አስ ካዎትዳ ናምአን ላይን እዮርባማ ናአይ ናዳብ እስራኤለን ካዎትስ፤ እ እስራኤለ ቢታን ናምኡ ላይ ካዎትስ። ናዳብ ካሰ ባ አዋ ኦግያንነ እስራኤለ አሳ ኦስስዳ እያ ናጋራ ኦግያን ሄመትድ ጎዳ ስንን ኢታባ ኦስ።
ይሳኮራ ኮቸ ግድዳ አክያ ናአይ ባኦስ ናዳባ ቦላ ማቀትስ። ሄ ዎደ ናዳበይነ እያ ኦላንቾት ፍልስፄመን ደእያ ግባቶና ካታማ ዩሾን ደኦሶና። ይሁዳ ካዎይ አስ ካዎትዳ ሄን ላይን ባኦስ ናዳባ ዎድ እያ በሳን እ ባዉ ካዎትስ። ባኦስ ካዎቶ ዶምዳ መላ እዮርባማ ሶ አሳ ኡባ ዎድ ዉርስስ። ጎዳይ ሴሎፐ ይዳ ባ አይልያ፥ ናብያ አክያ ባጋራ ኦድዳይሳዳ እዮርባማ ኬ አሳ ኡባይ ሀይቅ ዉርስ። ሄስ ሀንዳይ፥ እዮርባም ባ ሁጰን ኦዳ ናጋራንነ እስራኤለ አሳ እ ኦስስዳ ናጋራን ጎዳ እስራኤለ ፆሳ ሀንቀዳ ግሾሳ።
ናዳብ ሀንዳ ሀራባይነ እ ኦዳባ ኡባይ እስራኤለ ካዎታ ታርከ ማፃፋን ፃፈትስ። ይሁዳ ካዎይ አስነ እስራኤለ ካዎይ ባኦስ ባንታ ካዎተ ላይ ኡባን ኦለትዳ መላ ደእዶሶና።
እስራኤለ ካዋ ባኦሳ
ይሁዳ ካዎይ አስ ካዎትዳ ሄን ላይን አክያ ናአይ ባኦስ እስራኤለ ቦላ ካዎትስ፤ እ ትርሳ ካታማን ኡትድ ላታማነ ኦይዱ ላይ ካዎትስ። እዮርባም እስራኤለ አሳ ናጋራ ኦስስዳይሳዳ እካ ሄ ኦግያን ሄመትድ ጎዳ ስንን ኢታባ ኦስ።
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.