1 ቆሮንቶሳ 3

ዎሳ ኬን ደእያ ሻከተ

1ታ እሻቶ፥ ህንተ ክርስቶሳን ቡሮ ዮጋነ አማኖና አሳ ደእያ ግሾ፥ ታኒ አያናባ ህንተዉ ኦዳናዉ ዳንዳአብከ። 2ህንተ ምኖ ካ ማናዉ ዳንዳእቦና ግሾ፥ ታኒ ህንተና ማ ፓሀስ፤ ሀእካ ዳንዳእቤከታ።1 3ሀእካ ህንተ አማኖና አሳዳ ደኤታ። ህንተ ግዶን ደእያ ቃናተይነ ኦሽ ህንተ አማኖና አሳዳ ደኤይሳ ኤርሰኔ? ህንተ አማኖና አሳዳ ሀኔታ። 4ህንተፈ እሶይ፥ “ታኒ ጳዉሎሳሳ” ሀራይ ቃስ፥ “ታኒ አጵሎሳሳ” ጊኮ፥ አማኖና አሳ መላ ግደከቲ?2

5ያትን፥ አጵሎስ ኦኔ? ጳዉሎስ ኦኔ? ኑኒ ህንተና አማንዳ ፆሳ ኦሳንቾታ። ፆሳይ እሱዋስ እሱዋስ እምዳ እሞታ መላ ኦያ ኦሳንቾታ ግዶኮናዬ? 6ታኒ ቶካስ፤ አጵሎስ ሃ ኡሽስ፥ ሽን ድቸይ ፆሰ።3 7ሄሳ ግሾ፥ ድችያ ፆሳፈ አትሽን፥ ቶከይካ ሃ ኡሸይካ አይኮካ ግደና። 8ቶከይነ ሃ ኡሸይ ዎል መላ፥ ሽን እሶይ እሶይ ባ ኦሱዋ መላ ፆሳይ እምያ ዎይቱዋ ኤካና። 9ኑኒ እስፈ ፆሳስ ኦያ እያ ኦሳንቾታ ግድያ ግሾ፥ ህንተ ፆሳ ሾቃ፤ ፆሳ ኬ። 10ፆሳይ ታዉ እምዳ አ ኬሀተ መላ ሂላንቾ አናፀዳ ባሶ የጋስ። ሀራ አስ እያ ቦላ ኬፄስ። ሽን እያ ቦላ ኬፅያ ኦንካ ዋትድ ኬፅያኮ፥ ባዉ ናገቶ። 11እስ ቶሆ የገትዳ ባሶፐ ሀራ ባሶ የጋናዉ ኦንካ ዳንዳኤና። ሄ ባሶይካ የሱስ ክርስቶሳ። 12ሽን ሀ ባሱዋ ቦላ ኦንካ ዎርቃን ዎይኮ ብራን ግድን፥ አልኦ ሹቻን ዎይኮ ምን ግድን፥ ማታን ዎይኮ ማቃን ኬፅኮ፥ 13እስ እስ አስ ሄ ባሱዋ ቦላ አይብን ኬፅዳኮ ፕርዳ ጋላስ ታማን ፓጨትድ ቆንጫና። 14ኦንካ ሄ ባሱዋ ቦላ ኬፅዳ ኬይ ታማን ፁገቶና አትኮ፥ ባ ዎይቱዋ ኤካና። 15ሽን ኦደ ኦሶይካ ታማን ፁገትኮ፥ ሄ ኡራስ ዎይቶይ ባዋ። ግዶሽን፥ እ ባ ሁጰን ታማፐ ከስ ኤክዳ አሳዳ አታና።

16ህንተ ፆሳ ኬ ግደይሳነ ፆሳ አያን ህንተናን ደኤይሳ ኤረከቲ? 17ኦንካ ፆሳ ኬ ላልኮ፥ ፆሲ እያ ላላና። ፆሳ ኬ ጌሽ፤ ሄ ኬይካ ህንተና።

18ኦንካ ባና ጭሞፎ። ሀ ሳኣ ጭንጫተን ባና ጭንጫ ኦድ ኤክያ ኦንካ ፆሳ ስንን ጭንጫ ግዳናዉ ኤያ ግዶ። 19ሀ ሳአ ጭንጫተይ ፆሳ ስንን ኤያተ። ጌሻ ማፃፋን፥

“ፆሳይ ጭንጫታ ኤንታ ገነ ቆፋን ኦይኬስ” ያጌስ።4

20ቃስ፥ “ጭንጫታ ቆፋይ ማዶናባ ግደይሳ ጎዳይ ኤሬስ” ያጌስ።5

21ሄሳ ግሾ፥ ኡባይ ህንተባ ግድያ ግሾ፥ ኦንካ አሳን ጬቀቶፎ። 22ጳዉሎስ፥ አጵሎስነ ጰፅሮስ፥ ሀ አላመይ፥ ደኦይ፥ ሀይቆይ፥ ሀእ ደኤይ፥ ስንፈ ያናይስ፥ ኡባይ ህንተሳ። 23ህንተ ክርስቶሳሳ፤ ክርስቶስ ፆሳሳ።