Mazmure 61

Xoossaw Tana Zaallako Kaaletha

Dawita Mazmure.

1Abeeti Xoossaw, ne ta woosa si7a;

ta woosa hayza.

2Taani biitta gaxan de7ishin,

ta wozanay ufaysi qanxida wode,

ta nena xeegayis.

Taape dhoqa zaallako,

tana kaaletha.

3Ne taw qotanne

ta morketape naagetiya mino miixa.

4Taani ne dunkaaniyan merinaw darkinaashin!

Taani ne qefiya hapha garsan saro attarkinaashin! Salaha

5Abeeti Xoossaw, ne ta qangetha si7adasa;

ne suntha yayyeysatara issife taw laata immadasa.

6Kawa laytha adussa;

I yeletethaafe yeletethaa gakanaw de7o.

7I Xoossaa sinthan merinaw kawoto;

ne siiquwaninne ne tuman iya naaga.

8Hessa gisho ta qangetha gallas gallas gathana;

ne sunthaa ubba wode sabbana.