Mazmure 60

Nu Morketape Nuna Ashsha

Masephexoomeninne Soobalan de7ida Araame asaara oletida wodenne Iyo7aabi guye simmidi Maxine zangaaran tammanne nam7u mukulu Edoome asaa wodhida wode Dawiti zammaareta halaqaas xaafida woosa

“Ciishsha cuudhethe” geetetiya markatetha woosa.

1Abeeti Xoossaw, ne nuna aggadasa;

nuna mentherthadasa.

Ne nuna hanqetadasa;

shin ha77i nuna zaara; mintha essa.

2Ne biitta qaathadasanne za7isadasa;

biittay kokoriya gisho, ne iya za7uwa kuntha.

3Neeni ne asaa meto bessadasa;

nuna gandigarsiya woyne ushshadasa.

4New yayyeysati banta morke dongefe

attana mela malla immadasa. Salaha

5Ne siiqeysati attana mela,

ne ushacha kushen

nuna ashsha; nuna alla.

6Xoossay ba geeshsha bessan haysada yaagis;

“Taani xoonada Seekema biitta shaakana;

Sukota zangaara wadhana.

7Galadi tabaa; Minaaseyka taassa;

Efreemey ta huuphe ashshiya birata qoobe;

Yihudi ta kawota xam7aa.

8Moo7abey ta meecetiya kere;

Edoomey tabaa gideysa erisanaw,

ta caammaa iya bolla wothayis;

taani Filisxeeme xoonada gereerayis” yaagis.

9Gimbetida katamaako tana oone efanay?

Edoome gakanaw tana oone kaalethanay?

10Abeeti Xoossaw, nuna aggiday nena gidikii?

Abeeti Xoossaw neeni nu olanchotara olas keyaka.

11Asa maadoy pathonna gisho,

morketara oletanaw ne nuna maadda.

12Xoossaa wolqan nu morketa xoonana;

I nu morketa yedhana.