Mazmure 38

Xoossaw Tana Aggofa

Dawiti xaafida qofiso mazmure.

1Abeeti Godaw, ne sheniyan tana seeropa;

ne yiluwan tana hanqofa.

2Ne donge tooray tana caddis;

ne kushey tana deexis.

3Ne hanqida gisho ta asatethay qohetis;

ta nagaraa gaason ta meqethay liiqis.

4Ta balay tana muukis;

dendonna gita toohoda tana deexees.

5Ta eeyatethan oothida nagara gisho,

ta madunthay xinqis.

6Ta sa7a xeellas; hokas;

gallas kumethi azzanashe pee7as.

7Ta ashoy xuuggees;

ta asatethay paxa gidenna.

8Ta daaburas; liiqas;

ta wozanay dirgiya gisho oolas.

9Abeeti Godaw, ta wozanaa amo ubbaa eraasa;

ta ooley neepe geemmibeenna.

10Ta wozanay dirgees;

ta wolqay hitti gis;

ta ayfiya poo7oy dhayis.

11Ta madunthaa gaason

ta shoorotinne ta laggeti haakidi eqidosona;

ta dabboti taape haakidosona.

12Tana wodhanaw koyeysati

banta xihiya taw yeggoosona.

Tana qohanaw koyeysati,

“Nu nena demmana” yaagidi, mandoosona;

gallas kumethi ta bolla tobboosona.

13Ta tulle asa mela si7ike;

muume asa mela doona pogike.

14Tuma haythi si7onna asi,

inxarsi odidi zaaronna asi gidas.

15Godaw, ta nena ufaysan naagayis;

ta Godaw, Xoossaw ne taw zaaro imma.

16Taani, “Ta tohoy dhubetin,

enti hashshu gaanadanne

ta bolla ceeqetanaada oothofa” yaagas.

17Ta kundana hanayis,

ta sakoy tana aggonna ixis.

18Ta nagara paaxayis;

ta naaquwa gaason azzanayis.

19Ta morketi gitane wolqaama;

tana coo ixeysati daro.

20Taani lo77oba oothin iita zaareysati,

ta lo77oba kaalliya gisho taara eqetoosona.

21Godaw, tana yeggofa;

ta Xoossaw, taape haakofa.

22Tana ashshiya ta Godaw,

tana maaddanaw ellesa.