Mazmure 37

Xoossay Ba Asaa Aggenna

Dawita Mazmure

1Iitaa ootheyisata gaason yilotopa;

nagara ootheyisata qanaatopa.

2Enti maatada eeson melana;

boncoda shullidi qoqofetana.

3Godan ammaneta; lo77oba ootha;

biitta bolla utta; palahin de7a.

4Godan ufayta;

I ne wozanaa amuwa immana.

5Ne ogiya hadara Godaas imma;

iyan ammaneta; I new oothana.

6I ne xillotethaa wonta xalqeda,

ne pirdaa seeta gallasa awada poo7isana.

7Godaa sinthan si77i gada de7a;

danda7an naaga;

Iita asata halchoy poletin be7ada yilotopa.

8Hanqo agga; yilo teqa;

hessi meton yeggees.

9Iita ootheysati dhoqolletidi dhayana;

shin Godan ufaysi wotheysati biitta laattana.

10Iita ootheysati guutha wodepe guye de7okona;

ne enta koyada demmaka.

11Shin aadati biitta laattana;

sarotethan ufaytidi daana.

12Iita asi lo77o asi dhaysanaw maqetees;

ba acha enta bolla garcees.

13Shin Goday iitata bolla miicees;

entaw dhayo gallasi yeysa erees.

14Iita asati manqotanne metootanchota wodhanaw,

suure hemeteyisata shukanaw,

banta mashsha shoddoosona;

banta dongiya waaxoosona.

15Shin enta mashshay enta wozanan gelana;

enta dongey meqana.

16Xillo asas de7iya guuthabay,

iita asas de7iya darobaape lo77o.

17Ayis giiko, iitata wolqay meqana;

shin Goday xillota zempisees.

18Suure asata ogiya Goday erees;

enta laatay merinaw entaba gidana.

19Iita wode suure asati yeellatokona;

kosha wode enti kallidi maana.

20Shin iita asati hayqana;

Godaa morketi ciishshada qoqofetana;

cuyada ayfepe geemmana.

21Iita asi tal7idi zaarenna;

shin xillo asi keehatethan immees.

22Godan anjetidaysati biitta laattana;

shin I baaddidaysati dhayana.

23Asa ogey Godaa ufaysiko,

Goday iya tanguwa kaalethees; minthees.

24I dhubetikoka kundenna;

Goday iya kushiya oykidi katisees.

25Taani paamas; ha77i cimas;

shin xillo asi yegetin,

iya nayti kathi woossishin be7abike.

26I ubba wode keehatethan immees;

coo tal7ees;

iya nayti haratas anjo gidana.

27Iitape haaka; lo77o ootha;

ne adussa laythi daana.

28Goday xillo pirda dosees;

ammaneteyisata I yeggenna.

Enti merinaw naagetoosona;

shin iitata kochay dhayana.

29Xilloti biitta laattana;

yan merinaw daana.

30Xillo asa doonape cincatethi keyees;

iya inxarsay xillo odetees.

31Xoossa higgey iya wozanan de7ees;

iya tohoy dhubetenna.

32Iita asi xillo asi geeddees;

iya wodhanaw koyees.

33Shin Goday iya kushen aathidi immenna;

pirdetanaw eqiya wode iya bolla pirdisenna.

34Godan ufaysi ootha, iya kiitaa naaga;

nena biitta laatisidi gitayana;

iita asati dhayishin ne be7ana.

35Nagaranchoy Libaanose zigada,

diccidi dhoqu dhoqu gin ta be7as.

36Shin ta simmada yan demmabike;

koyinka bentibeenna.

37Borey bayna asi be7a;

suure asi akeeka;

saro asas wursethay lo77o gidana.

38Shin nagaranchoti dhayana;

enta wursethay dhoommana.

39Xillota atotethay Godaape yees;

I meto wode enti naagetidi attiya besse.

40Goday xillota maaddees; ashshees;

enti iyako baqatida gisho,

I enta iitatape ashshees; naagees.