Mazmure 130

Ta Shempiya Nena Naagawusu

Pudethe keyishe yexiya mazmure

1Godaw, taani meto ciimmon de7ashe,

neeko waassayis.

2Godaw, ta waasuwa si7a;

ta woosa ne haythay hayzo.

3Xoossaw, nu nagaraa ne xaafa oykidaako,

Godaw, ooni pirdafe attanaw danda7ii?

4Shin nuuni new yayyana mela,

nu nagaraa atto yaagasa.

5Taani Godaa laamotan naagayis;

ta shempiya laamotan naagawusu;

taani iya qaalan ufaysi wothayis.

6Sa7i awude wontane gidi,

naagiya wotaadarepe aathada,

taani Godaa laamotan naagayis.

7Iya siiqoy merinaasa gidiya gishonne

iyan kumetha atotethi de7iya gisho

Isra7eele, Godan ufaysi ootha;

8Goday Isra7eele,

iya nagaraa ubbaafe ashshana.