Mazmure 104

Xoossay Ba Medhetetha Heemmees

1Ta shempe, Godaa galata;

abeeti Godaw, ta Xoossaw ne gita;

neeni bonchonne teema ma7adasa.

2Poo7o afilada guuluntadasa;

neeni saluwa dunkaaneda toladasa.

3Ne keethaa salo bolla keexaasa;

shaara para gaare kessaasa;

carko qefe bolla uttada baasa.

4Carkoy new kiitancho,

tama laco new oosancho oothaasa.

5Ne, sa7aa iya baasuwa bolla essadasa;

hessa gisho, merinaw qaaxenna.

6Ciimmo abbay afilada biitta kammis;

haathay gita dereta kammis.

7Ne hanqetin haathati baqatidosona;

ne deshuwa si7ida wode qosetidosona.

8Enti dereta bollanne zangaarata giddo,

ne entaw giigisida bessaa goggidosona.

9Haathati simmidi biitta kammonnaada,

enti aadhanaw danda7onna zawa wothadasa.

10Neeni, pultoti zangaaran gogganaada oothadasa;

shaafa haathati dereta giddora goggoosona.

11Bazzo do7ati ubbay iyape uyoosona;

bazzo hareti iyape saamo aloosona.

12Salo kafoti he haatha matan banta keethaa keexidi,

tashiya giddon yexoosona.

13Ne gita dereta bolla salope ira buksaasa;

iya kushe ooso ayfen biittiya kallasu.

14Neeni mehes maata, asas kathi dolisaasa;

hessan asay biitta oothidi, kathi shiishees. 15Asa wozana ufaysiya woyne,

som7o cil7isiya zaytenne

wolqa immiya kathi dolisaasa.

16Godaa mithati,

I tokida Libaanose zigati,

daro ira demmoosona.

17Kafoti banta keetha yan keexoosona;

xiloti xiidda bolla keexidi de7oosona.

18Dhoqa dereta bolla gaarati de7oosona;

gupalleti shucha qophon qosetoosona.

19Wode taybuwa erisana mela,

ne ageena medhadasa;

away ba wulliya wodiya erees.

20Neeni dhumaa medhadasa; qamma oothadasa;

he dhuman wora do7i ubbay keyees.

21Wodala gaammoti shankatishe gudoosona;

enti bantaw miyaba Xoossafe koyoosona.

22Awi doliya wode guye simmoosona;

banta bessaa gelidi zin7oosona.

23He wode asi ba oosos keyees;

sa7i qammana gakanaw oothees.

24Abeeti Godaw, ne oosoy ay mela daro;

ne cincatethan ne enta ubbaa medhadasa;

sa7i ne medhidaban kumis.

25Heko, Abbay gitanne dalga;

tayboy bayna qaaxiya medhetethan,

gitatanne guutha medhetethan kumidi de7ees.

26Iya bolla markabeti boosona;

ne medhida Leewataane geetetiya dawey iyan kaa7ees.

27Ne entaw koshshiya wodiyan

miyaba immana mela,

enti ubbay nena xeelloosona.

28Ne entaw immin enti maxoosona;

neeni ne kushiya miccin,

enti lo77oba kalloosona.

29Neeni ne som7uwa genthiya wode dagammoosona;

neeni shempuwa ekiya wode hayqidi,

banta biitta simmoosona.

30Shin neeni ne shempuwa immiya wode,

enti medhetoosona; biitta ooraxisaasa.

31Godaa bonchoy merinaw de7o;

Goday ba oosuwan ufayto.

32I biitta xeelliya wode biittay qaaxees;

I dereta bochiya wode dereti cuyoosona.

33Ta de7o laytha ubban Godaas yexana;

ta paxa de7iya wode ubban ta Xoossaa zammarana.

34Taani Godan ufaytiya gisho,

ta qofay iya ufayso.

35Nagaranchoti biittafe dhayo;

iita ootheysati de7opo.

Ta shempe, Godaa galata;

Goday galatetto.