Mazmure 103

Ta Shempe Xoossa Galata

Dawita Mazmure

1Ta shempe Godaa galata!

Ta kumetha asatethaw, iya geeshsha suntha galata.

2Ta shempe Godaa galata!

I new oothida keehatetha ubbaa dogopa.

3I ne nagaraa ubbaa atto gees;

ne harge ubbaafe nena pathees.

4I nena hayqope ashshees;

siiqoninne maarotan nena anjees.

5Ne yalagatethay arganthada ooraxana mela,

ne de7uwa lo77oban kalsees.

6Goday qohetidaysatas

xillotethaninne suuren pirdees.

7I ba ogiya Muse,

ba oosuwa Isra7eele asaa erisis.

8Goday qadheteysanne maareysa;

hanqetanaw eesotenna; iya siiqoy daro.

9I ubba wode seerenna;

merinaw hanqetenna.

10I nuus nu nagaraada oothenna;

nu iitatethaa mela zaarenna.

11Saloy sa7ape dhoqeysada,

Godaa yayyeysatas iya siiqoy gita.

12Dolohape wulohi haakeysada,

Goday nu nagara nuupe haassees.

13Aawi ba naytas qadheteysada,

Goday baw yayyeysatas qadhetees.

14Nuuni aybipe medhetidaako I erees;

nuuni biitta gideysa I akeekes.

15Asi baw maata mela;

I bazzo ciishshada ciyees.

16Carkoy iya bolla carkiya wode dhayees;

I dolida bessay zaaridi eretenna.

17Shin Godaas yayyeysatas

iya siiqoy merinaape merinaa gakanaasa;

iya xillotethay na7a na7a gakanaasa.

18Hessi haney iya caaquwa naageysatanne

iya kiitaa polanaw minneysatasa.

19Goday salotan ba araata essis;

iya kawotethay ubbaa haarees.

20Hinteno, iya kiitanchato,

iya kiita naagiya wolqaamato,

I odiyaba si7eysato, Godaa galatite!

21Hinteno salon de7iya minoto,

iya sheniya poleysato, Godaa galatite!

22Hinteno, I haariya bessa ubban,

de7iya medhetethato, Godaa galatite!

Ta shempe Godaa galata!