Geeshsha Maxaafa
2 Ximotiyoosa 4
Taani nena Xoossaa sinthaninne, kawo gididi haaranaw qonciya wode paxatanne hayqidaysata pirdanaw de7iya Kiristoos Yesuusa sinthan zorayis. Qaala oda; wodey injetin injetonna ixin minnada oda. Daro danda7aninne tamaarson asaa zora seeranne denthetha. Asay tuma timirtiya si7onna ixiya wodey yaana. Enti banta amuwa kaallidi, bantaw si7anaw ufaysiyabaa odiya astamaareta shiishosona. Enti tuma timirtiya aggidi, tuma gidonna odaa si7anaw banta haytha zaarosona. Shin neeni ubbaban nena haara. Meto danda7a. Wongela markatetha oosuwa ootha. New imetida Xoossaa ooso ubbaa pola.
Taani yarshetiya wodey gakis; ha alamiya aggada biya wodey matis. Taani lo77o ola oletas; ta gaaddiya woxada wursas; ammanuwa naagas. Sinthafe xillotetha kallachay1 tana naagees. Hessa xillo pirdaa pirdiya Goday he gallas taw immana. Hessa ta xalaalas gidonashin, iya qoncethaa amotiya ubbaas immana.
Phawuloosa Buzo Qofa
Ellesa yada tana be7a. Deemasi ha77i alamiya dosidi, tana aggidi, Teselonqe katamaa bis. Qerqisi Galatiya biitta, qassi Titoy Dilmaxe biitta bis.2 Luqaasa xalaali taara de7ees. Marqoosi Xoossa ooson tana maaddanaw danda7iya gisho, neera ekada ya.3 Taani Tikiqoosa Efesoona katama kiittas.4 Neeni yashe, Xiro7aada kataman Karpoosa matan aggada yida ta kootiyanne maxaafata taw ekada ya. Ubbaka galban xaafetida maxaafata ekonna yoopa.
Birata qoxiya Iskindirey tana daro qohis; Goday iya oosuwada iyaw zaarana.5 I nu timirtiya daro ixiya gisho iyape nena naaga.
Koyro ta mootetiya wode ubbay aggidi bidosonape attishin, oonika tana maaddibeenna. Xoossay he naaquwa entaw taybopo. Shin taani kumetha kiitaa Ayhude gidonna asa ubbaas markatin, enti si7ana mela Goday ta matan eqidi taw wolqa immis. Qassi koshatida gaammoda doona dooyida hayquwape tana ashshis. Goday tana iita ubbaafe ashshidi ba salo kawotetha saron efana. Iyaw merinaape merinaa gakanaw bonchoy gido. Amin7i.
Sarotho
Phirisqillas, Aqilasinne Anesfoora soo asaas ta sarothuwa oda.6 Erasxoosi Qorontoosa kataman attis. Xirofmoosi hargetida gisho, Milixe kataman aggas.7 Balgoy gelanaape sinthe ellesada ya.
Ewubulusi, Phudeesi, Linuusi, Qilaadeynne hara ammaniya asati ubbay nena saro goosona.
Goday Yesuus Kiristoosi ne ayyaanara gido.
Xoossaa maarotethay hinte ubbaara gido.
Source notes (7)
- Footnote Xillotetha kallachay: Xillotetha de7o gisho, ta ekana kallachaa. Xillotethaa taw kallacha oothidi immees guussu.
- Cross-reference Qola 4:14; Filmo 24; 2 Qoro 8:23; Gala 2:3; Tito 1:4.
- Cross-reference Qola 4:14; Filmo 24; Hawa 12:12, 25; 13:13; 15:37-39; Qola 4:10.
- Cross-reference Hawa 20:4; Efe 6:21-22; Qola 4:7-8.
- Cross-reference 1 Ximo 1:20; Maz 62:12; Roome 2:6.
- Cross-reference Hawa 18:2; 2 Ximo 1:16-17.
- Cross-reference Hawa 19:22; Roome 16:23; Hawa 20:4; 21:29.
Geeshsha Maxaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.