Geeshsha Maxaafa
1 Qorontoosa 5
Asaa Giddon De7iya Yeellaya Ooso
Hinte giddon laymatethi de7eysi zigiretees. Hessa mela laymatethi hari attoshin, ammanonna asayka oothokona. Hinte giddon ba aawa machera tunida asi de7ees.1 Hinte hessan qiirotanawunne yeellatanaw bessenne, shin otortideta. Hessa mela borsoba oothida ura hinte giddofe kessanaw bessennee?
Taani ashon hintera doona ixikoka ayyaanan ta hintera de7ayis. Taani hintera de7iya asada hanada hessa mela oosuwa oothida ura bolla pirdas. Nu Godaa Yesuus Kiristoosa sunthan hinte shiiqiya wode taani ayyaanan hintera daana. Hessan Godaa Yesuus Kiristoosa wolqay hintera gidana. He ura nagara ashoy2 dhaydi, iya ayyaanay Godaa Yesuusa pirda gallasan attana mela I, Xalahes aadhidi imeto.
Hinte ceeqoy lo77o gidenna. Guutha irshoy munuqa ubba dentheysa ereketiyee?3 Hinte ha77i irshoy bayna munuqa gidana mela, hintefe nagara irsho kessite. Nuus Paasika dorse gidida Kiristoosi yarshetis.4 Hessi gisho, geneynne iitatethi de7iya irshora gidonashin, tumatethinne geeshshatethi de7iya uythara nu baaliya bonchoos.5
Ta kase xaafida dabdaabiyan hinte laymatiya asara gahetonna mela hintew odas. Hessa guussay ha alamiyan de7iya laymateysatara woyko uuzetara woyko kaysotara woyko eeqa goyinneysatara polo gahetofite guussu gidenna. Hessa gidiko, ha alamiyape hinte keyanaw bessees shin attis. Shin ammanayis yaagishe laymateysatara woyko uuzetara woyko eeqa goyinneysatara woyko cayeysatara woyko mathoteysatara woyko kaysotara gahetofite gada hintew odayis. Hessa mela asara hari attoshin, kathika moopite.
Woosa keethafe karera de7eyisata bolla pirdanaw tana aybe gathey? Woosa keethan de7eyisata bolla hinte pirdeketiyee? Shin karera de7eyisata bolla Xoossay pirdana. He iitaba oothiya ura hinte giddofe kessite.6
Source notes (6)
- Cross-reference Zaare 22:30.
- Footnote Nagara ashoy: Nagara medhoy woyko nagara asatethay.
- Cross-reference Gala 5:9.
- Cross-reference Kessa 12:5.
- Cross-reference Kessa 13:7; Zaare 16:3.
- Cross-reference Zaare 13:5; 17:7.
Geeshsha Maxaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.