ማዝሙረ 10

ሱረ ፕርዳ ኮሻ ዎሳ

ዳዊታ ማዝሙረ

1አቤት ጎዳዉ፥ አይስ ሃካዳ ኤቃይ?

መቶ ዎደ አይስ ኔኒ ጌማይ?

2ባ ኦቶሩዋን ኢታ አስ ማንቁዋ የደስ፤

ኤንቲ ባንታ ማቁዋን ባንታዉ ኦይከትዶሶና።

3ኢታ አስ ባ ኢታ አሙዋን ጬቀቴስ፤

ባ ኡዝያን ጎዳ ጫዬስነ ካስ።

4ኢታት ባንታ ኦቶሩዋን ፆሳ ኮዮኮና፤

ባንታ ቆፋን ፆሳስ በሰ እሞኮና።

5እያዉ ኡባ ዎደ እንጀቴስ፤

ነ ህገይ እያዉ ገለና፤

ባ ሞርከታ እ ቀልቅሴስ።

6ባ ዎዛናን፥ “ታና አይብካ ቃና

ታና መቶይ ጋከና” ያግድ ቆፔስ።

7እያ ዶናን ባደ፥

ዎርዶይነ ማንደ ኩምስ።

ገነይነ ኢታተ እያን እንፃርሳን ደኤስ።

8ጉታታን ዙግድ ኡቴስ፤

ሱረ አሳታ ዎናዉ ቆሰትድ ናጌስ፤

ዎልቅ ባይና ዳቡራንቾታ ዎቼስ።

9ባ ቆሰትዳ በሳን ጌምድ፥

ማንቁዋ ኦይካናዉ ጋሞዳ ዙጌስ፤

እያ ኦይክድ ባ ፅህያን ጎችድ ኤፌስ።

10ዎልቅ ባይና ማንቁዋ ሾጭድ የጌስ፤

እያ ቶሁዋ ጋርሳን እ ኩንዴስ።

11እ ባ ዎዛናን፥ “ፆሳይ ዶግስ።

ባ ሶምኡዋ ገንድ በኤና” ያጌስ።

12አቤት ጎዳዉ፥ ደንዳ!

ፆሳዉ፥ ነ ዎልቃማ ኩሽያ ደን፤

ማንቆታ ዶጎፓ።

13ኢታ አሳት ፆሰ አይስ ካኦና?

ባንታ ዎዛናን፥ “ፆሳይ ኑና ሴረና” አይስ ያጎና?

14ሽን ፆሳዉ፥ ነ መቱዋነ ኡንኣ በኣሳ፤

ኔኒ ማዳናዉ ጊጋ ኡታዳሳ።

ኔኒ ይኦታስ ማደ፥

ቆሄትዳይ ነ ማዳና መላ

ባና ነዉ አድ እሜስ።

15ገነ አሳታ ዎልቃ መን፤

ኢታ አሳታ ሴራ፤

ዛሪድ ኤንታ ግዶን ኢታተ በንቶፎ።

16ጎዳይ መርናዉ ካዎትድ ደኤስ፤

ሀራ ካዎተት እያ ቢታፈ ያና።

17አቤት ጎዳዉ፥ ኔኒ አሽከታ አሙዋ ኩንሳ፤

ኤንታ ምን፤ ኤንታ ዎሳ ስአ።

18ይኦታነ ኡንኤትዳይሳታ ቆሆና መላ፥

ሳአን ደእያ ኦንካ ኤንታ ያሽሶና መላ፥

ኔኒ ኤንታዉ ፕርዳ።