ማቶሳ 10

ታማነ ናምኡ ሀዋረታ

(ማር 3:13-19፤ ሉቃ 6:12-16)

1የሱሲ ታማነ ናምኡ ታማረታ ባኮ ፄግድ፥ ቱና አያናታ ከሳና መላነ ሀርገ ኡባ ፓና መላ ኤንታዉ ማታ እሚስ።

2የሱሲ ኪትዳ ታማነ ናምኡ ሀዋረታ ሱንይ፦ ኮይሮይ ጰፅሮሳ ጌተትያ ስሞናነ እያ እሻ እንድርያሳ፥ ዛብድዮሳ ናኣ ያይቆባነ እያ እሻ ዮሃንሳ፥ 3ፍልጶሳነ ባርተለሞሳ፥ ቶማሳነ ቃራፃ ቃንፅስያ ማቶሳ፥ እልፍዮሳ ናኣ ያይቆባ፥ ታድዮሳ፥ 4ባ ቢታስ ምሸትያ ስሞናነ የሱሳ አድ እምዳ አስቆሮታ ይሁዳ።

5ሄ ታማነ ናምአታ የሱሲ ኪትድ የድሸ፥ “አይሁደ ግዶና ደርያኮ ቦፕተ፥ ቃስ ሳማረታ ካታማካ ገሎፕተ። 6ሽን እስራኤለ ኬፈ ግድዳ ህን ይዳ ዶርሳታኮ ቢተ። 7ያ ብድ፥ ‘ሳሎ ካዎተይ ማታትስ’ ግድ ኦድተ።1 8ሀርጋንቾታ ፓተ፥ ሀይቅዳይሳታ ሀይቆፐ ደንተ፥ ባሮ ሀርጋንቾታ ጌሽ ፓተ፥ ቱና አያናታ ከስተ። ህንተ ጮ ኤክዳይሳ ጮ እምተ። 9ህንተ ኪሰን ዎርቃ፥ ዎይኮ ብራ ሳንትመ ኦይኮፍተ። 10ህንተ ኦግያስ ካርፂቶ፥ ናምኡ አፍላ፥ ዎይኮ ጫማ ዎይኮ ፃምአ ኦይኮፍተ፤ ኦሳንቹዋስ ጋላሳ ካ ኮሼስ።2

11“ህንተ እስ ካታማ ዎይኮ ጉታ ገልያ ዎደ ህንተና ሞክድ ኤካናዉ ኡፋይትያ ኡራ ኮይድ እያ ሶን ሸምፕተ፤ ህንተ ባና ጋካናዉ ያን ጋምእተ። 12ቃስ ኦደ ሶካ ገልሸ ሳሮተ። 13ሄ ኬይ ህንተና ሞክኮ ህንተ ሳሮዳ ሳሮይ ኤንታና ጋኮ፥ ሽን ኤንቲ ሞኮና እፅኮ ህንተ ሳሮዳ ሳሮይ ህንተዉ ጉየ ስሞ። 14ኦንካ ህንተና ሞኮናነ ህንተ ኦድያባ ስኦና እፅኮ ሄ ኬፈ ዎይኮ ሄ ካታማፐ ከይሸ ህንተ ቶሁዋን ደእያ ባና ፕትድ ከይተ።3 15ታ ህንተዉ ቱማ ኦዳይስ፤ ፆሳ ፕርዳ ጋላሳን ሄ ካታማፐ ሶዶመስነ ጋሞራ ካታማታስ ፕርዳይ ካዉያና።4

16“ታ ህንተና ዶርሳታዳ ሱመታ ግዶ የዳና። ሄሳ ግሾ፥ ሾሻዳ ጭንጫታ፥ ሆለዳ አዳታ ግድተ።5 17አሳይ ህንተና ፕርዳ ዳይናታስ አድ እማና፥ ቃስ አይሁደ ዎሳ ኬን ህንተና ጋራፋና። ሄሳ ግሾ፥ ኤንታፈ ናገትተ።6 18ታ ግሾ ግድ ህንተና ደርያ ሃረይሳታ ስንነ ካዎታ ስን ኤፋና። ኤንታ ስንንነ አይሁደ ግዶና ደርያ ስንን ኤቅድ ህንተ ታባ ማርካታና። 19ሽን ህንተና ፕርዳስ አድ እምያ ዎደ፥ ዎይግድ ዛርኖ ግድ ኡንኤቶፍተ፤ ሄ ሳትያን ህንተ ጋናባ ፆሳይ ህንተዉ እማና። 20አይስ ጊኮ፥ ህንተናን ኦደተይ ህንተ አዋ ጌሻ አያናፐ አትሽን፥ ህንተና ግደከታ።

21“እሻይ ባ እሻ፥ አዋይ ባ ናአ፥ ሀይቆስ አድ እማና፥ ናይት ባንታና የልዳይሳታ ቦላ ደንድድ ኤንታ ዎሳና።7 22ታ ግሾ ግድ አሳ ኡባይ ህንተና እፃና፥ ሽን ዉርሰ ጋካናዉ ምንዳይ አታና።8 23እስ ሄራፐ ህንተና ኤንቲ ጎድኮ ሀራ ካታማ ባቃትተ። ታኒ ህንተዉ ቱማ ኦዳይስ፤ አሳ ናአይ ያና ጋካናዉ፥ ህንተ እስራኤለ ካታማ ኡባ ካንከታ።

24“ታማረይ ባ አስታማርያፐ፥ አይለይ ባ ጎዳፐ አና።9 25ታማረይ ባ አስታማርያ፥ አይለይ ባ ጎዳ ዳንኮ እያዉ ግዳና። ኬ ጎዳ ብኤል-ዘቡላ ጊኮ እያ ሶ አሳ ዋትድ ኢስድ ፄገኔ?10

26“ህዛ፥ አሳስ ያዮፍተ። ካመትዳባይ ቆንጮና፥ ቆሰትዳባይ ጌሽ ከዮና አተና።11 27ታኒ ህንተዉ ማን ኦድያባ ህንተ ፖኦን ኦድተ፤ ታ ህንተዉ ሀይን ካልካሽዳባ ዳባባን አዋጅተ። 28አሾፐ አትሽን፥ ሸምፖ ዎናዉ ዳንዳኦናይሳታስ ያዮፍተ። ሽን ሸምፑዋነ አሹዋ ጋናመን ይሳናዉ ዳንዳእያ ፆሳስ ያይተ። 29ናምኡ ቡበት እስ ሳንትመን ባይዘቶኮናዬ? ሀኖፐ አትሽን፥ ኤንታፈ እስናካ ህንተ ፆሳይ ጎና ደእሽን ሳአን ዎኩ። 30ሀር አቶሽን፥ ህንተ ሁጰ ብናናይካ ፓይደትድ ደኤስ። 31ህዛ፥ ዳሮ ቡበታፐ ህንተ አያ ግሾ ያዮፍተ።

32“አሳ ስንን ታዉ ማርካትያ ኡባስ ታንካ ሳሎን ደእያ ታ አዋ ስንን ማርካታና። 33ሽን አሳ ስንን ታና ካደይሳ ታንካ ሳሎን ደእያ ታ አዋ ስንን ካዳና።12

34“ታኒ ሳአን ሳሮ ኤሀናዉ ይዳ ህንተዉ ዳኖፖ። ታኒ ቶራፐ አትሽን፥ ሳሮተ ኤሀናዉ ያቢከ። 35ታኒ ይዳይ፥

“ ‘ናኣ አዋፐ

ማጫ ናእዉ አየፐ

ናኣ ማችዉ አዝና አየፐ ሻካናሳ።13

36አሳስ ሞርከት እያ ሶ አሳታ ግዳና።’

37“ታፐ አድ ባ አዋ ዎይኮ ባ አይዉ ዶሰይ፥ ታባ ግዳናዉ በሰና። ባ አደ ናአ ዎይኮ ባ ማጫ ናእዉ ታፐ አድ ዶሰይ፥ ታባ ግዳናዉ በሰና። 38ባ ማስቃልያ ቶክድ ታና ካሎና ኦንካ ታባ ግዳናዉ በሰና።14 39ባ ሸምፑዋ አሻናዉ ኮየይ ይሳና፥ ሽን ባ ሸምፑዋ ታ ግሾ አድ እመይ አሻና።15

40“ህንተና ሞከይ ታና ሞኬስ፥ ታና ሞከይ ቃስ ታና ኪትዳይሳ ሞኬስ።16 41ናብያ ናበ ሱንን ሞከይ፥ ናብያ ዎይተታና፤ ቃስ ፅሉዋ ፅሎ ሱንን ሞከይ፥ ፅሉዋ ዎይተታና። 42ታ ህንተዉ ቱማ ኦዳይስ፤ ሀ ታ ታማረታፐ ጉፅያ እሱዋስ ታና ካልያ ግሾ ሀር አቶሽን ጉ እርፃ ሃ እምኮ እያ ዎይቶይ የና” ያግስ።