እሳያሳ 51

መርና አቶተ ፅዮነስ

1ህንተኖ ፅሎተ ካለይሳቶ፥

ህንተኖ ጎዳ ኮየይሳቶ ስእተ።

ህንተ ጳልቀትድ ኤከትዳ ሹቻ

ህንተ ቦከትድ ከይዳ ኦላ ፄልተ።

2ህንተ አዋ አብራሃመነ

ህንተና የልዳ ሳሮ ፄልተ።

እ ባርካ ደእሽን፥ ታኒ እያ ፄጋዳ

አንጃስነ ታይቦን ዳርሳስ።

3“ጎዳይ ፅዮነነ

ላለትዳ በሳን ደእያ አሳ ኡባ ምንና።

እ መላ ቢታ ኤደነ፥

ካሎትዳ ቢታ ጎዳ አታክልተ ጋደዳ ኦና።

ያን ኡፋይስነ ሀሹ ጉስ ዳና፤

ጋላትነ ማዝሙረይ ስኤታና።

4“ታ አሳዉ፤ ታ ኦድያባ ስእተ፤

ታ ደርያዉ፥ ህንተ ሀይ ታኮ ዛርተ።

ህገይ ታፐ ከዬስ፤

ታ ሱረ ፕርዳይ ካዎተታስ ፖኦ ግዳና።

5ታ ፅሎተይ ኤለስድ ሺቃና፤ ታ አቶተይ ማትስ፤

ታ ቀሰይ ካዎተታስ ሱረ ፕርዳ ኤሀና።

ዩሾይ አባን ተቀትዳ ቢታት ኡባይ

ታናን አማነትድ ናጋና፤

ታኒ ኤንታ ታ ዎልቃን አሻናይሳ ኡፋይሳን ናጋና።

6ፑደ ቁ ግድ ሳሎታ ፄልተ፤

ዱገ ሳኣካ ፄልተ።

ሳሎት ጩያዳ ላለትድ ያና፤

ሳእ አፍላዳ ዉራና፤

እያን ደእያ አሳ ኡባይ ኡዱንፀዳ ሀይቃና።

ሽን ታ አቶተይ መርናዉ ዳና፤

ታ ፅሎተይ ዉረና።

7“ህንተኖ ፅሎተ ኤረይሳቶ፥

ታ ህገይ ህንተ ዎዛናን ደኤይሳቶ፥ ስእተ።

አሳ ቦረ ያዮፍተ፤

ኤንታ ጫሻስ ዳጋሞፕተ።

8ብል ማኦ፥ ዶርሳ እክሰ ጉፁነይ መይሳዳ፥

ኤንቲ ሜተታና።

ሽን ታ ፅሎተይ መርናዉ ዳና፤

ታ አቶተይ የለተ ኡባስ ግዳና” ያጌስ።

9አቤት ጎዳዉ፥ ደንዳ! ደንዳ!

ጎዳ ቀስያዉ፥ ዎልቃ ማአ።

በን ዎደታንነ የለተን ሀንዳይሳዳ ደንዳ፤

ራኣባ ጌተትያ ዳውያ ቃንፀረዳይነ

ጫድዳይ ነና ግድክዬ?

10አባነ ግታ ጪሞ ሃ

መልስዳይ ነና ግድክዬ?

ነ ዎዝዳይሳት ፕናና መላ

ጪሞ አባ ኦገ ኦዳይ ነና ግድክዬ?

11ጎዳይ ዎዝዳይሳት የፅሸ ስሚድ ፅዮነ ያና፤

መርና ኡፋይሳይ ካላቻ መላ ኤንታ ቦላ ኡታና።

ኤንቲ ኡፋይስነ ሀሹ ግያባ ደማና፤

አዛኖይነ ዬሆይ ኤንታፈ ሃካና።

12ጎዳይ፥ “ታኒ፥ ህንተና ምንይ ታና፤

ያትን፥ ሀይቅያ አሰነ ማታዳ ሹልያ

አሳ ናአ ያያናዉ ህንተ ኦኔ?

13ሳሎታ ምጭዳነ ሳአ ባሱዋ ኤስዳ ጎዳ፥

ህንተና መዳ ፆሳ ዶግደታ።

ኤንቲ ህንተና ይሳናዉ ኡንኤያ

አሳ ሀንቁዋ ጋሶን ኡባ ጋላስ ያሻን ደኤታ።

ሽን ህንተና ኡንኤይሳታ ሀንቆይ አዉን ደኢ?

14ድኤትዳይሳት ኤሶን ብርሸታና፤

ቃሸትዳ ኦላን ሀይቆኮና፤ ኮሻቶኮና።”

15“ታኒ ጎዳ፥ ነ ፆሳ፤

ጉማና መላ አባ ቃይ ታና፤

ታ ሱንይ ኡባፈ ዎልቃማ ጎዳ።

16ታ ቃላ ነ ዶናን ዎዳይ፥

ታ ኩሸ ኩያን ነና ገንዳይ፥

ሳሎታ ምጭዳይ፥ ሳኣ ባሱዋ ኤስዳይ፥

ፅዮነኮ፥ ‘ኔኒ ታ አሰ’ ” ያግዳይ ታና።

ፆሳ ሀንቆ ፁአ

17ነኖ፥ ጎዳ ኩሸፐ ጋንድጋርስያ

ሀንቆ ፁኣ አሾና ኡይዳ የሩሳላመ፥

ባርካ! ደንዳ! ደንዳ።1

18እያ የልዳ ናይታፐ እዮ ካለያ እሶይካ ባዋ፤

እያ ድችዳ ናይታፐ እ ኩሽያ ኦይክድ

ኤፍዳ እሶይካ ባዋ።

19ሀ ናምኡባት ነ ቃዳ ግድዶሶና፤

ሄሳት ላለተነ ዮ፤

ኮሽነ ማሽ ነ ቦላ ያና፤

ያትን፥ ነና ኦን ምንኔ?

20ነ ናይት ግተን ገልዳ ገንኤዳ

ኦገ ጋፃን ኩንድድ ላባንዶሶና።

ኤንቲ ጎዳ ሀንቁዋንነ

ነ ፆሳ ሴራን ኩምዶሶና።

21ሄሳ ግሾ፥ ዎይነ ኡሻን ግዶናሽን

መቶን ማትዳይሳቶ፥ ህንተ ሀይሳ ስእተ።

22“ባ አሳስ ሞተትያ ነ ጎዳይ፥

ነ ፆሳይ ያጌስ፤

ሄኮ፥ ነና ጋንድጋርስያ፥

ታ ሀንቆ ፁኣ ታኒ ነ ኩሸፐ ኤካስ፤

ኔኒ ዛራዳ ሄ ማይያ ኡሻ ኡያካ።

23ታኒ ሄሳ ነና ኡንኤያ

አሳ ኩሸን ዎና፤

ኤንቲ ኔኮ፥ ‘ኑኒ ነ ቦላራ ሄመትድ

አና መላ ዛቁላ’ ” ያግዶሶና።

ኔኒ ኤንቲ አና ጋካናዉ

ነ ዞኩዋ ኤንታዉ ቢታዳነ ኦገዳ ኦዳሳ።