እሳያሳ 50

እስራኤለ ናጋራነ አይልያ ኪተተ

1ጎዳይ ያጌስ፤

“ታኒ ህንተ አይዉ የድዳ ፕርማ ዎርቃተይ አዉን ደኢ?

ታኒ ኦደስ ህንተና ባይዛድና?

ሄኮ፥ ህንተ ናጋራ ግሾ ህንተ ባይዘትደታ፤

ህንተ ናቁዋ ግሾ ህንተ አይያ የደታሱ።

2ታኒ ይዳ ዎደ፥ ሀይሳን አስ አይስ ይዴ?

ታኒ ፄግዳ ዎደ፥ ‘ዬ!’ ጋናዉ አይስ አስ ይዴ?

ታኒ ህንተና ዎዛናዉ ታ ኩሸይ ቃንዬ?

ህንተና አሻናዉ ታዉ ዎልቅ ባወዬ?

ታኒ አባ ሴራዳ መልሳይስ፤

ሻፋታ መላ ቢታ ኦይስ።

ሃ ይን ኤንታን ደእያ ሞሎት ዎቆሶና፤

ሳሞይ ዎን ሀይቆሶና።

3ታኒ ሳሎታ ማ ማይዛይስ፤

ኤንታ ካማይ ካዮ ማኦ ዳኔስ” ያግስ።

4ዳቡርዳይሳ ታኒ ቃላን ምን ኤራና መላ፥

ኡባ ሃርያ ጎዳይ ታዉ ታማርዳ እንፃርስ እሚስ።

እ ታና ዎንታ ዎንታ ባርክስድ፥

ታኒ ታማረዳ ስአናዳ ታ ሀይ ዶዬስ።

5ኡባ ሃርያ ጎዳይ ታ ሀይ ዶይስ፤

ታኒ ጌላ ግዳብከ፤ ጉየ ስማብከ።

6ታኒ ታ ዞኩዋ ሾጨይሳታስ፥

ታ ቡቻ ሾደይሳታስ

ታ ጋጩዋ አዳ እማስ።

ታ ቦላ ጩተይሳታፐነ ታና ካዉሸይሳታፐ

ታ ሶምኡዋ ገንብከ።

7ኡባ ሃርያ ጎዳይ ታና ማድያ ግሾ፥

ታኒ ዬላትከ።

ታኒ ታ ሶምኡዋ ሳሎ ሹቹ ኦስ፤

ታኒ ዬላቶናይሳ ኤራይስ።

8ታዉ ፕርደይስ ማታን ደኤስ፤

ያትን፥ ታና ሞተይ ኦኔ?

አነ ታራ ሞተታናዉ ኤቆ!

9ኡባ ሃርያ ጎዳይ ታና ማዴስ፤

ያትን፥ ታ ቦላ ፕርደይ ኦኔ?

ኤንቲ ኡባይ ማኦዳ ጭማና፤

ኤንታ ብል ማና።

10ህንተ ግዶፈ ጎዳ ያየይ፥

እያ አይልያ ቃላስ ኪተተይ ኦኔ?

ማን ሄመተይነ ፖኦይ ባይናይ እ ኦኔ?

ሄ ኡራይ ጎዳ ሱንን አማነቶ፤ ባ ፆሳን ዘምፖ።

11ህንተኖ ታማ ኤያ ኡባቶ፥

ላጮ ፆምፐ ህንተዉ ሺሸይሳቶ፥

ህንተ ኤዳ ታማ ፖኡዋን ሄመትተ።

ላጮ ፆምፕያን ስመረትተ፤

ህንተ ታ ኩሸፐ ኤካናዉ ደኤይ ሀይሳ፤

ህንተ ዎልቃማ መቶ ሴላን ዝንአና።