ቆላስያሳ 1

1ፆሳ ሸነን ክርስቶስ የሱሳ ሀዋረ ግድዳ ጳዉሎስነ ኑ እሻ ፅሞትዮስ፥ 2ቆላስያሳ ካታማን ደእያ ክርስቶሳን ጌሻታስነ አማነትዳ አሳስ ፃፍዳ ኪታ።

ፆሳ ኑ አዋፐ አ ኬሀተይነ ሳሮተይ ህንተዉ ግዶ።

ጋላታ ዎሳ

3ኑኒ ህንተዉ ዎስያ ዎደ ፆሳ ኑ ጎዳ፥ የሱስ ክርስቶሳ አዋ ኡባ ዎደ ጋላቶስ። 4ኑኒ ክርስቶስ የሱሳን ደእያ ህንተ አማኑዋነ ጌሻታ ኡባስ ደእያ ህንተ ሲቁዋ ስእዳ። 5ሄሳ ህንተ ኦዳይ ህንተ ኡፋይሳይ ሳሎን ህንተዉ ናገትዳ ግሾሳ። ህንተ ቱማ ኪታ ግድዳ ዎንገላ ኮይሮ አማንዳ ዎደ ሄ ኡፋይሳ ስእደታ። 6ህንተ ሄ ዎንገላ ስእዳ ዎደነ ፆሳ አ ኬሀተ ቱማ ሻክ ኤርዳ ዎደፐ ዶምድ ህንተ ግዶን ሀንዳይሳዳ ቢታ ኡባን ድጭሸነ አይፍሸ ደኤስ።

7ህንተ ሄሳ ኑራ እስፈ ክርስቶሳስ ኦያ አማነትዳ፥ ዶሰትዳ ኤጳፍራፐ ታማርደታ።1 8እ ሄሳ ቦላ ጉጅድ አያናይ ህንተዉ እምዳ ሲቁዋባ ኑስ ኦድስ።

9ሄሳ ግሾ፥ ኑኒ ህንተባ ስእዳ ጋላሳፐ ዶምድ፥ ፆሳይ ባ ሸንያ ህንተና በሳና መላነ፥ ጌሻ አያናይ እምያ ኤራተንነ ጭንጫተ ኡባን ህንተና ኩንና መላ ኡባ ዎደ ህንተዉ ፆሳ ዎሶስ። 10ሄሳዳካ፥ ህንተ፥ ጎዳይ ኮየይሳዳ ዳና መላ፥ ኡባ ዎደ እያ ኡፋይሳና መላ፥ ሎኦ ኦሶ ኡባን ህንተ አይፈ አይፋና መላነ ፆሳ አድ ኤርሸ ድጫና መላ ፆሳ ዎሶስ።

11ፆሳ ቦንቾ ዎልቃይ ህንተ ኡባባ ገንጫናዳነ ዳንዳአናዳ ባ ምኖተ እምድ ህንተና ኡፋይሶ። 12ቃስ ጌሻታ ፖኦ ካዎተ ላታና መላ ህንተና ኦዳ አዋ ጋላትተ። 13እ ኑና ማ ዎልቃፈ አሽድ ባ ዶስያ ናኣ ካዎተኮ ኤህስ። 14እያን ዎዘትድ እያ ሱን ናጋራ አቶተ ደምዳ።2

15ክርስቶስ በንቶና ፆሳስ ቱማ ሌምሶ። እ መተ ኡባፈ ባይራ። 16ኡባባይ እያ ባጋራ መትስ። በንትያባትነ በንቶናባት፥ ዎልቃትነ ጎዳት፥ ሃረይሳትነ ማታ አዋት፥ ሳሎንነ ሳአን ደእያ ኡባይ እያዉነ እያ ባጋራ መትስ። 17እ ኡባባፐ ካሰ ደኤስ። ኡባባይ እያን ባ በሳን በሳን ኦይከትድ ደኤስ። 18እ ባ አሳተ ግድዳ ዎሳ ኬስ ሁጰ። እ ኡባፈ ቦላ ግዳናዉ ሀይቆፐ ደንዶን ስንነ ባይራ።3

19ፆሳይ ባ ኩመ ፆሳተራ እያን ዳናዉ ኮይስ። 20ቃስ ማስቃልያ ቦላ ጉስዳ ባ ናኣ ሱን ሳሮተ መድ ሳሎንነ ሳአን ደእያ ኡባ እያ ባጋራ ባራ ስገስ።4

21ሀይሳፈ ካሰ ህንተ ቆፋ ኢታተይ ህንተና ፆሳፈ ሻክስነ እያራ ሞርከ ኦስ፤ ህንተ ኦሶይካ ኢታ። 22ሽን ሀእ ክርስቶስ አሾን ሀይቅዳ ሀይቁዋ ባጋራ ፆሳይ ህንተና ባራ ስገድ፥ ጌሻታ፥ ቦረይ ባይናይሳታነ ፅሎታ ኦስ። 23ህንተ፥ ህንተ አማኑዋን ቃፆና ምንድነ ፃጵድ ዳናዉ በሴስ። ህንተ ዎንገላ ቃላ ስእዳ ዎደ ኤክዳ ኡፋይሳ ምን ኦይክተ። ሄ ዎንገላይ ህንተ ስእዳይሳነ ቢታ ኡባን ሳባከትዳይሳ። ታ፥ ጳዉሎስካ ሀ ዎንገላስ ኦሳንቾ ግዳስ።

ጳዉሎሳ ሀዋረተ ኦሶ

24ታኒ ህንተ ግሾ ሀእ ኤክያ ዋያን ኡፋይታይስ። ክርስቶስ እያ አሳተ ግድዳ ዎሳ ኬስ ኤክዳ ዋይያ ታኒ ታ አሹዋን ፖላይስ። 25ፆሳ ቃላ ህንተዉ ፖላዳ ኦዳና መላ ታዉ እመትዳ ማታን ዎሳ ኬስ ኦሳንቾ ግዳስ። 26ሀ ቃላይ ካሰ አዳ ዎድያን የለተ ኡባፈ ጌምድ ደእስ። ሽን ሀእ ፆሳይ ሀ ፁራ አማንያ ኡባስ ቆንጭስስ። 27ፆሳይ አይሁደ ግዶና አሳ ግዶን ሀ ፁራ ቦንቾ ዱረተ ቆንጭስስ። እካ ቦንቾ ኡፋይስ ግድዳ ህንተ ግዶን ደእያ ክርስቶሳ።

28ሄሳ ግሾ፥ እስ እስ አስ ክርስቶሳን ኩመ አስ ኦድ ሺሻናዉ ጭንጫተ ኡባን አሳ ታማርሶንነ ዞረን ክርስቶሳባ ሳባኮስ። 29ፆሳይ ባ ግታ ዎልቃን ታናን ኦያ ግሾ፥ ሀእ ጋካናዉ እያ ዎልቃን ባፀታይስነ ዳቡራይስ።