Yohaannisixxa Waleella 8

Torbeesoke Maxxansixxanna Worqetika Balcho

1Gedhechchi torbeesoka maxxansa tikee wodda, gamisa saate qico iimate'n cuqqeessi gopheme. 2Ookkonechchi uduma Mageni edo uurriteexxa eettene torbaane erganna afenne; torbaani malagatinna eettene torbaannixe ergana'n uwweme.

3Wele iimik erganji werqetike hixaanika balcho aadhe dageexxi tolchimalchi birra uure; eettene moote edo hedheeke worqetike tolchimalchi hana woyyoletixxi soodachchonni welti shiqishaashsha heddi hixaani isi'a uwweme. 4Ookkone hixaanixxi wiliilenna eettene woyyoletixxe sooddachchonni welti ookkone iimike erganjixxe anga'n Mageniibaa iimi'a fulde. 5Iikki iimik erganjinna hixaaniike balcho aadheexxi tolchimalchixxa giira itti wonsheexxi iso'o butti'a darbe; dindinso, luulji, banqonna buttatixxi lele'ma kadde.

Torbaane Malagatuwwa

6Ookkonechchi uduma torbaane malagata anga affeexxi torbaane erganna ufuufatee qixxeeffatte.

7Taakessok iimik erganji ookkone malagata ufuufe, munde karsendeexxi kaadena giira buttati'a woccai assende; buttatixxi sakkaxxi anganna gubatte; haqichchuwwinxi sakkaxxi anganna gubatte; quffeemmaxxi bada'a duuchchinna gubbatte.

8Langak iimik erganjinna malagata ifika ufuufe, lumoxxa kooba fakkataaxxi yaane giirati ha'ita'n abbaayyate'n hunende; abbaayyatixxi sakkaxxi anganna mundete'n jijjiirende. 9Eettene abbaayya giddo hexxeexxe hedho affeexxe daduwwanaa'n sakkaxxi anga rerte; lumoxxe hoboluwwanaa'ninna sakkaxxi anga baxxe.

10Iikki Sakkak iimik erganjinna malagata ifika ufuufe; gooliinsha gubbata'neexxi lumoxxi urje wode'uwwiinxe sakkaxxe anga'ninna wodiinxe muummuwwa'n iimi'n ibe. 11Eettene urjeki summinna «Qararanjo» hiyyemaan; ookkone wode'ik sakkaxxi anganna qaaraanjoke kadde; wode'i qaranjoke kadatenaa'n kexxeexxa heddi manni reye.

12Sholgeessok iimik erganji malagata ifika ufuufe, arshotixxi sakkaxxi anga, agenjixxi sakkaxxi anga, urjuwatixxi sakkaxxi anganna ganende; tennexxee konnelchuwwixxi sakkaxxi anga dukkande; konne qicinni barratinna sakkaxxa anga hashshatinna sakkaxxa anga ifi belo hexxaashsha assende.

13Ookoneechchi uduma uudenne; mitti sinbir iimatixxe oddo'n phirri hiyyemman; lumooke haafurinninna «Iitti gatteexxi wele sase erganna malagata ufuufammaxxi buttate'n hedhaakeeri'a aanne'e!, aanne'e! Aanne'e!» hiyyaanaa laqenne.