Gedeo Bible
Yohaannisixxa Waleella 15
Torbaane Ergannanna Torbaane baluwwa
Wele lumokanna maso beessissa iimate'n afenne; eettene udumixxa heddo bala afeexxa torbaane erganna afenne; iitti udumixxe hiyyendeexxi Mageniixxi mufe muuxenda'neek tenne heddo bala darre'nite kaddemmaxxeeten.
Giirati welti makendeexxa daa'witetixxa abbaayya fakkaattaaxxa afenne; abbaayyati qarqaranna biniincha, isixxa misilenna isike summika laakkossi injifateekaara uurree'naa afennen; insa'nenna Magenokena'n insa'ne'a uwwemeeka bagana abixxineexxi, Mageniinke garbichcho kadeemmake Muusexxa faaronna ookkone gedhechchiixxa faaro hina'n faarsinaamma qici,
«Duuchchinxa dandeettattok Gootta Magenoo!
huje atixxi lumoxxenna sadendaaxxenni;
Bari duuchchike moyanjoo
atik ori qullumatenna dhugaaten.
Koo Goottaa! Ate sodaatabakinna
summa atika ulfeessabaak ayyete?
Ati calli woyyichchaken;
Qullumma atixxixxi huje leellitemmaxxee
arduwwi duuchchi dagaan;
Ati edonna magenoffataan.»
Ookkonechchi uduma uudenne; yoona dhugaa kulatike duunkaana kadeeki iima hedhemmak Woyyichchi Galmi baneme. Torbaane bala anga abixxiteemmaxxi iitti torbaane erganna Galmi giddii'ni fulde; insa'nenna layinootixxa luqqitte calalaqaaxxe seemma oddo'witeexxi qoma ifixxenninna worqetika sabbata ka'lteemman. Ookkonechch uduma ookkone hedho affeemmaxxe daduwwa giddii'n mitti duuchchi wodddinaa'n duuchchi woddi'a hedhaake Mageniinxi mufe itti wo'miteeka torbaane worqetixxa buuduwwa eettene torbaane erganna'n uwwe. Iikki Galminna Mageniinke ulfinninna isixxi hunna fuldeexxe wiliillenni wo'me; eettene torbaane ergannak torbaane bala muuxenda qico'n ayyinna Galmi giddi'a e'yaa dande'abaan.
Gedeo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.