Skip to content
BibleKenya

Gedeo Bible

Laakkosiinkaa Maxaafa 12

Maariyaaminna Aarooni Muuse'n Ke'ne

Muuse Tophphiyichcho manjichcho aadhe'emmani, tenne aadheemmaxxe manjichchoxxe buuto'a Maariyaaminna Aarooni Muusee kometen ke'ne. Insa'nenna «Duuchchi Woddik Gootti haaso'eek Muuse darree'ni calla? No'o darree'n haaso'ebaa?» Hine. Duuchchi Woddik Goottinna teennee laqe. Muuse butta duuchcha'n hedheeke manni duuchchi caala hara shaqqakemman.

Dedhange'n Duuchchi Woddik Gootti Muusee, Aarooniinna Maaryaamii'i, «Ha'no sasiing fuldineexxi afenshatike duunkaanbaa amme» hiyye; insa'ne'nna fulle marre. Ookkoneechchi uduma Duuchchi Woddik Gootti duumanichiinke utuphinni dirreexxi afenshatike duunkaanixxe huddumme'n uurrati Aarooniinna Maaryaamii'i ye'e; lamiing isibaa dangee wodda, Isinna insa'ne'n hiyyee qici, «Hiyyichcho anka caqase:

«Duuchchi Woddike Goottik wabeek ha'noo giddo hedheele,

waleellati iso'ni ifisannon;

Oojjotinna iso'ni haaso'annon.

Erganjo anke Muusenni kinni haaso'annok iittatebaan;

isi anke mine duuchcha'ni xuurameesaken.

Ani erganjo anke Muusenni welti haaso'annok,

iittatebaan isi anke mine duuchcha'ni xuurameesaken;

Isi anee'e Duuchchi Woddike Goottixxa bifa uudaan;

ha'nota erganjo anke Muuse'n affo'o fulchedha hitta shooka gophphine?»

Duuchchi Woddik Goottinna insa'ne'n mufateexxi insa'nee waale me'e.

Duumanchi duunkaani iimii'n ke'eexxa yanna kunse Maariyaami soomottee bisokanna kaadetishsha gola'liteemman; Aarooninna isebaa wirri hiyye uuda wodda Maariyaami soomotee'naa afe. Aarooninna Muusee, «Anke gootta gowwummati hunjennexxe cubboxxee maganneten no'oo mura woxxissoxxe'e. Isenna amatinke godobi giddo lubbendeexxi bisi duuchchi iteme luggo'e shixxobi gateenaa ilendemmaxxe gufo labbeexxi gattaashsha assitoxxe'e.»

Tennexxee Muusenna, «Magenoo! Maganneten isee fayyisi» hiyya'n Duuchchi Woddike Goottiba'a oodhe.

Duuchchi Woddik Goottinna Muuse'e, «Anni isek midde hancufa alba iseke'n tufeechcho kaddelenna shooko odo'witeexxi torbaane barra qico turtaaxxemabaa? Tennexxee ta'atenna kaddoole kaambeti gadhi darre torbaane barra'a qofitti turtaashsha assi; ookkoneechchi uduma kinni ille iima higge dagguun» hiyye.1 Tennexxee Maaryaami kaambeti gadhi darre torbaane barra qofitti turte; ise illeema higgeexxi daggaa qico'n ardi ke'eexxi me'eemmabaan.

Ookkoneechchi uduma ardi Hatserooti'n ke'eexxi Faaraanixxe qiilla gammoojje giddo mare offo'le.

Source notes (1)
  1. Cross-reference Lak. 5:2-3.

Gedeo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.