Matoosixxaa Wengeele 1

Yessuus Kiristoosixxe Ilenshaka Daalo

(Luq. 3:23-38)

1Daawwitixxenna Abirihaamixxe sanne kade'eeke Yessuus Kiristoosixxe ilenshak daali konneechchinni butti'a hedheeken.1

2Abirihaami Yisaaqii'i i'le, Yisaaqii Ya'iqoobii'i i'le, Ya'iqoobinna Yihudaanna isika dayyuwwa i'le, 3Yihuda Ti'imaarinaa'n Faaresiinna Zaaraa'a i'le, Faareesi Hesiroonii'i i'le, Hesirooninna Araamii'i i'le, 4Araamii Aminadaabii'i i'le, Aminadaabii Ne'asoonii'i i'le, Ne'asoonii Selmoonii'i i'le. 5Selmooninna Re'aabinaa'n Bo'eezii'i i'le, Bo'eezi Ruutinaa'n Iyyobeedii'i i'le, Iyyobeedii Isseyii'i i'le, 6Isseyii moyanjo Daawwitii'i i'le. Daawwitinna Ooryoxxe arenaa'n Solomoonii'i i'le.2 7Solomooninna Roobi'aamii'i i'le, Roobi'aamii Abiyaa'a i'le, Abiyanna Asaafii'i i'le, 8Asaafinna Iyyosaafixii'i i'le, Iyyosafixinna Iyyooraamii'i i'le, Iyyooraaminna Oziyaanii'i i'le, 9Oziyaanina Iyyo'ataamii'i i'le, Iyyoo'atami Akaazii'i i'le, Akaazinna Hiziqiyaasii'i i'le, 10Hiziqiyaasii Minaasee i'le, Minaasee Amootsii'i i'le, Amootisinna Iyyosiyaasii'i i'le, 11Iyyosiyaasinna Baabiloonixxe booji'o wodda Ikoniyaaninna dayyuwwa isika i'le.3 12Baabiloonixxe booji'o uduma Ikoniyaan Selatiyaalii'i i'le, Selatiyaalii Zerubaabeelii'i i'le, 13Zerubaabeelinna Abiyuudii'i i'le, Abiyuudi Eliyaqeemii'i i'le, Eliyaqeeminna Azoorii'i i'le, 14Azoorinna Saadooqii'i i'le, Saadooqii Akiimii'i i'le, Akiiminna Eliyudii'i i'le, 15Eliyudinna Alaazaarii'i i'le, Alaazaarinna Maataanii'i i'le, Maataaninna Ya'iqoobii'i i'le, 16Ya'iqoobinna Kiristoosi4 hiyyemeeka Yessuusii ildammaxxa Maaramii'i kadhateemaka Yooseefii'i i'le.

17Yoona Abirihaaminaa'n Daawwiti qico'n tommenna shoole ila, Daawwitinaa'n Baabiloonixxe booji'o qico'n tommenna shoole ila, Baabiloonixxe booji'onaa'n Kiristoosixxe ilensha qico'n tommenna shoole ila kaddaan.

Yessuusi Kiristoosixxa Ilensha

(Luq. 2:1-7)

18Yoona Yessuusi Kiristoosixxi ilensha konnechchi butta hexxeexxen: Ama isixxi Maarami Yooseefi'a uwwendeexxi heerundebaang Woyyichchi Hafuur darree'n sila'witeexxi afende.5 19Isee kadhateemmak Yooseefi qullichcha manjo kadeemmaxxee Maaramii'i mannii edo salphisa gibeexxi isee buqonni waalo'a mudhdhe. 20Tennee yaane hedaa'naa'a Goottiink iimik erganji oojjoti iso'ni leelleexxi, «Koo Daawwitike belto Yooseefii! Kadhatteettexxi Maarami siila'witeek Woyyichchi Hafuuri darree'nite kaddeemmaxxe isee mini'a adhdha sodaattoxxe. 21Isenna labba belto ildaan; isinna arda cubbotenaa'n anjirammaxxee summa isika Yessuus hite fulchitatton» hiyye.6

22Tinni duuchcha kaddechchi Gootti wabeekichchi darree'n haaso'eemmaxxi muuxendo'aten. Tinninna 23«Dubarrichchote sila'witaan; labba beltonna ildaan; isik summinna Amaanu'eel hiyyemaan» hiyyendemmaxxeten. Amaanu'eli hiyyanna «Mageni no'onni welti hedheen» hiyyaten.7 24Yooseefi diiphokenaa'n dammaqeexxi Goottiink iimik erganji isoo ajajemmashsha Maaramii'i ifike minibaa adhdhe.8 25Kaddo malee angafa belto ildaa qico'ni isenni welt afemeba'a.9 Yooseefinna summa isika, «Yessuus» hiyye fulche.