Hiziqi'eelikaa Raaga 35

Edomi'n Kulemeeka Wabeekuma

1Duuchchi Woddike Goottik hiyyichchi ane'ni dage hiyyee qici: 2«Koo manjinke belto; alba atika kobuwwatike Seyiirike bogiba'a1 wirri assite iso'ni raaga raagi. 3Hitatto qici: ‹Dada Duuchchik Duuchchi Woddiki Gootti hiyyaanee qici; koo koobuwwatike Seyiirike boga ani ate'ni naaphunteti ke'enneni; anga anxa ate'ni hana ke'issannon; boga atika onakenna urume gataashsha assannon. 4Qachchuwwa atika olete assannon; urmee gataan; Ookko'ni Ani Duuchchi Woddike Gootta kadennexxa egendatton.

5« ‹Isira'eelike ardik xixichchi hara yo'oshsha qararaake kade hunnati iimi darre hexxeexxi rakko geltee wodda, qara hexxemmaxxa halo waala gophe insa'nee wolantichchake'n sa'issite uutetaxxee, 6Ani hedhannoke kadenneshsha atika arda shiyaake mannixxe anga'ni sa'isse uwwe'naa shorrinaan. Atik ardi munde dhangalaasa giba gophammaxxee anga sa'aaki manni insa'nee shorraan; hiyya'neen lumok Duuchchi Woddik Gootti. 7Koobuwwatik Seyiirik bogi urmenna one gataashsha assannon; ookko'ni sa'aaka duuchcha shiyannon. 8Koobuwwa atixxe'ni rensha eleeqqi assannon; wolaantichchik shiyemeek duuchchi, koobuwwate'n, dhooquwwa atixxe'ninna wodi'ink yaasuma duuchcha'ni inbaan. 9Duuchchi woddi'a urma kadde hexxattoshsha assannon; atike qachchuwwa'ni manji hedhabaan. Ookko'ni ani Duuchchi Woddike Gootta kadennexxa atinna egendatton.

10« ‹Ani Duuchchi Woddik Gootti ookkonni hedhe'naa, «Kunni lami gosa gosak ardinna lami bogi anke kadaan; aninna dhaalannon» hitetten. 11Tennexxee ani lumoki Duuchchi Woddik Gootti hedhaneke kadennesahshanni ha'no Seeyrike bogik ardi insa'ne giba ha'noxxena'n kexxeexxa insa'ne'ni leellishinexxe mufeshshanna hinaafesha ha'no'n ani muranon: ha'no'ni murano wodda, ayyumma anixxi insa'nexxe oddo'ni ege'nendaashsha assannon. 12Ookko'ni Isira'eelixxi koobuwwa onde gette'een; ninniffe indannoshsha insa'ne no'o'a uwwemme'een hite tuffeti haasotettexxa Ani Duuchchi Woddik Gootti laqeennexxa, «ha'nonna ookone wodda egendinaan» 13Ane'ni hana kijibinenna harqitine haasotineexxa laqeennen. 14Duuchchi Woddiki Gootti hiyya'nee qici: Butta duuchcha gammaddaa wodda ha'noka boga urma assannon. 15Isira'eelike ardik geegi urume gatee wodda; gammadetaxxee, aninna iittanni ate'ni assannon. Koo koobatike Seyiirike boga atinna Eedoomik bogi duuchchi urmake kaddinaani. Ookkonechchi uduma Ani Duuchchi Woddike Gootta kadennexxa egennaan.› »