Skip to content
BibleKenya

Gedeo Bible

Hiziqi'eelikaa Raaga 28

Duuchchi Woddike Goottik hiyyichchi higgeen ane'n dageexxi: «Koo manjiinke belto Xiroosike galchallo'n, ‹Lumok Duuchchi Woddik Gootti hiyya'nen hitatto qici:

« ‹Atixxi qalbe hollati,

«Ani magenoken;

Mageniinxe moote hana,

abbaayuwwatixxe oddo'n ofo'lee'ennen» hiteten.

Fedhee qiconna ifi mageniishsha beekake assite heddotolenna midde

ati manjoke malee magenokebaan.

Ati Dani'eeli caalla beekake kadeteichcho ate'n labba'neen;

atenaa'n mitte yaane sho'endebaashsha heddaaten.

Beekumi atikenninna ege'na atixxenni,

qabeenna alfite'eten;

Worqetanna birret sibljo,

atike miya massatike minuwwa'n ca'miteten.

Atixxe daddalatixxe ogexxe bira sa'nenaa'n kexxeexxa

qabeennage'n qabeenna lephphitete;

Atike qabeenninna'ninna kexxeexxanna

holliteeten.

« ‹Tennexxee Lumok Duuchchi Woddik Gootti hiyya'nee qici,

« ‹Ani mageniishsha beekaken; hitetexxi

heddaataxxee,

Alagiinke mannanaa'n yo'oshsha godoba jabbaka manna,

ate'n iyyedagonna'aten;

Insa'nenna atike beekumixxe danchumma wolaantichchike, balleesinaan;

atika gaachchanna battoossinaan.

Ateenna bale giddi'a sa'issinaan;

abbaayyatixxe oddo'n,

Fuggoxxa reyo rertatton.

Atee shiyo'a dagaake manni edo,

«Ani magenoken» hitattota?

Atee shiyaakeerixxe anga'ni ibbatto wodda,

ati manjoke malee magenokebaan.

Alagiinxe anga'n,

salphitte reyo rertatton;

Tenne haaso'ennek ante Lumoke Duuchchi Woddike Goottan.› »

Duuchchi Woddike Goottik hiyyichchi higgeen ane'n dageexxi: «Koo manjiinke belto Xiroosike moyanji'a boochchisa fulchite hitatto qici: ‹Lumok Duuchchi Woddik Gootti hiyya'neen hitatto qici:

« ‹Beekumi ate'n wo'meemmake danchummatinna ate'n gunde gugunde'naa

tenneerinni geyati fakkeennakemma'a.

Duuchchi Woddike Goottike hiddichchuwwiinke fichcha'n

Edeeni'ni hexxetan;

Mitte mittingi fiixe'ek kinji atee seese'emman;

kunni fiixek kinjuwwinna serdiyon, tophaaziyoon, almaaze,

mergidi, iyasipeedi, senpher,

beluur, birletinna fiixeek kinji.

Atixxi seemma konne fiixeke kinnjinni danchoondeexxe worqetixxemma'a;

dadendeetaxxe barra'naa'n kunnichchuwwi duuchchi ati'a qophpheseme'emman.

Ati heqitotta'a hariirende'etake kirubelimman;

ani atee tennexxee baalloonse'e'naa;

Mageniixe woyyitte kooba hana hexxetta'a;

Giiratishsha xalaqqisa'neexxe kinoxxe oddo'ninna mammarendeeten.

Dadendettexxe barrana'n,

fuggoxxi ate'n afendee qico'n,

me'injo atike'n balleessa belo hexxaattan.

Daddaliinxi atixxi huje ba'lateemmaxxe,

xaqaro ate'n wo'mite;

cubbotanna hujjeten;

Tennexxee Mageniinxe koobanaa'n battitte yaaneshsha atee hunenne;

koo iimike heqqanjo kuruubi, giiratishsha hexxeexxe, kinoxxe,

oddonaa'n atee fulcheenne.

Atixxe danchummaxxee,

qalbe giddo hollitette;

Ulfinna halsatena'inna kexxeexxa,

beekuma atika balleessexxette.

Tennexxee atee butti'a darbenne;

moyanjuwwikinna atee da'wataashsha assennen.

Cubbo atixxe birra sa'nenninna daddalak addatensha gophiyyo atixxenni,

magenoffachchotixxa atixxa bakkuwwa battoossitette.

Tennexxee giira atenaa'n fuldaashsha assenne;

isenna atee itte;

Atee daa'wata'neeke duuchchi edo,

buttate'n atee bululoke assenne.

Ate ege'neke gosa gosaka arda duuchchi,

ate'n gelteexxe yaanexxee qexxerri hiyye;

Atk muuxxaminna alalshaake kade;

konnechchinni edi'a hexxabexxon.› »

Siidoonni'n Kulndeexxa Wabeekuma

Duuchchi Woddike Goottiki hiyychchi aniba dageexxi:1 «Koo manjiinke belto Sidooniba'a alba wirri assi; raagakanna ise'ni raagi hitatto qici: ‹Dada Duuchchik Duuchchi Woddiki Gootti hiyya'neen hitatto qici:

« ‹Tee Sidooni, ate'n ke'eennen,

ati giddonna ulfaatannon;

Murte anxa ise'n muranno woddanna,

Woyyumma anxanna ise giddo leellishanno wodda,

ani Duuchchi Woddike Gootta kadennexxa egennaan.

Sidoona'ninna bala anxa ibisannon;

iseke ora duuchcha'n munde dundaashsha assannon;

Duuchinni darrenaa'n ke'aake bagedinni

gora'eemmekiir ise giddo ibaan;

Ookkoneechchi uduma ani Duuchchi Woddike Gootta kade'ennexxa egennaan.

« ‹Ta'anni elqi'a Isira'eeliki ardi insa'nee utetishshanna hagaliinsha rakkisaaka olla'a anfabaan. Ookkoneechchi uduma ani Lumoke Duuchchi Woddike Gootta kade'ennexxa egennaan.

« ‹Lumok Duuchchi Woddik Goottinna Isira'eelika arda xerememmake boguwwi giddii'n bukki assanno wodda gosa gosak ardi uuda'naan woyyumma anxa insa'ne giddo leellishannon. Ookkoneechchi uduma insa'ne ifike boga'n; ani erganjo anke Ya'iqoobi'a uwwennake he'naan. Insa'nenna ookko nage'ik he'naan; minuwwakanna ijaadhinaan; woyinetika hiddichchonna kalsinaan. Insa'nee tuffatammaka insa'neka olla'uwwa duuchcha xixanno wodda insa'ne nage'ik he'naan. Ookkoneechchi uduma ani Duuchchi Woddike Gootta insa'neke Mageno kadennexxa egennaan.› »

Source notes (1)
  1. Cross-reference Iyu. 3:4-8; Zek. 9:1-2; Mat. 11:21-22; Luq. 10:13-14.

Gedeo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.