Hiziqi'eelikaa Raaga 2

Hizqi'eelixxa Ye'ensha

1Isinna anee'e, «Koo manjiinke belto iimi'a kexxettexxi uurri; ani ate'ni haaso'aannen» hiyye. 2Isinna haaso'aa wodda Mageniink Hafuuri ani giddo e'yeexxi lekkati anee'e uurrisseexxi ane'ni haaso'aa'naa laqenne. 3Isinna ane'ni hiyyee qici: «Koo manjiinke belto ane'n jalleeke ookkone jallichcha Isira'eelike ardibaa atee erga'enneni; insa'nenna annuwwi insa'nek telchi qico'n ane'n jalline'een. 4Kunni ardinna alba gudunfaakenna hinaaxxa laqabaaken; ani atee insa'nebaa ergaannen; atinna ‹Lumok Duuchchi Woddik Gootti hiyya'nee qici› hita'n insa'ne'ni kuli. 5Insa'ne jallaameessa arda kandemmaxxee, hitattoxxa lanqoolenna laqanna gonphoole oddo insa'nexxe'n wabeekkichchi hedheexxa egennaan. 6Koo manjinike belto ati insa'nee yookaan haaso'a insa'neka sodaattoxxee; qarqara atike'n hagalakenna qu'muudo hexxeenaa gaadduwwattixxe oddo'n ofoldotolenna sodaattoxxee. Insa'ne jallichcha arda kandoolenna ati insa'ne hinaaxxe yaane'ni insa'nee sodaattoxxee; insa'ne atee mee alalishshinowwaali. 7Insa'ne jalichcha arda kandeemmaxxee; lanqolenna laqa gonphoole ati hiyyichcho anka insa'ne'a kuli. 8Ati kinni koo manjiinke belto; ani atee hiyyaannexxa laqi; ookkone jallaameessa ardishsha atinna jallittoxxe'e; afo'o atika haanni hiyyi, ate'ni uwwaannechchonna iti» hiyye. 9Ookkonechchi uduma tami asse uudanno wodda mitte anga anba'a diriirte'naa afenne; ise giddonna mirqisanjo Maxaafa hedhemman. 10Isinna maxaafa ani edo farri asse; Maxaafake'ni giddi gadhii'ni, wi'lishatiki, yaaddottikinna hunbaashshatik hiyyichchuwwi itti borreesseme'emman.1