Skip to content
BibleKenya

Gedeo Bible

Efesoonike Manni'a 6:10

Verse 10 is marked below, with the whole chapter around it. Read from the start

Oosetanna Oosetika Hado

Ha'no oosee! Goottiinke kaddineemmaxxe hado ha'nokee ajajemme! Tinni hasissaaxxe yaanen. «Anna atikanna ama atixxa ulfeessi!» hiyyaak ajaji addachchiisatika hiyyichcho afeeke siretike ajaajan. Tenneenna assittotole «Duuchchiinxi yaane ati'a qajeeldaan; tenne butta'ninna atixxi wogga qeerrexxaani.»

Ha'no annuwwaa! Oose ha'nooxxa Gootta Yessuusike seera'n akeekina'ninna barachchiisina'n nosse, malee'e insa'nee jinnissinoqqe'e!

Garbakanna Goottuwwa

Ha'no garbaa! Kiristoosi'a ajaajendinnammashshanni buttatike ha'noke goottuwwa kadeekaara ulfeessatinna soda'ati, qajeelto qalbeninna ajajjemme! Ajaajendinaa qicinna Mageniinxa fedhi qalbeti assa'neeke Kiristoosike erganjuwwishsha kaddineete malee'e manjo gammachchiisatee hitineexxi leellatteete kaddoqqe'e. Manjokeete kaddebaangi Goottakee ergatendina'neeshsha wo'ma qalbenni ergattemme! Garbakenna kado'o leexi manji assaaxxe mitte mittende eloxxe ifixxe hujexxee Goottakenaa'n hira alfaaxxa egendinne'een.

Ha'nonna goottuwwaa! Ha'nooke garbi'a iittanni asse; ha'nookenna insa'neke Gootta kade'eek iikki iimate'n hedheexxa, manjiinka albanna uudeexxi gamisabaaxxa egendineemmaxxee insa'nee meenni sodaachchisse.

Mageniinka Loliinka Miya

Yoona Gootta Yessuusininna isixxe lumoxxe hunnanni jabaatte. Diyaabiloosixxa shokkotixxa huje xaa'na dandeettinaashsha Mageniinka loliinka miya duuchcha oddo'we! Loli no'oki manniki weltite kaddebaak, konne dukkanatike baro'ni huja'neeke galchalluwwinni, baalloomuwwikiirininna hunnuwwanni iittanni iimike booncho'n hedheeke fuggichchi hafuuruwwike sannnachchinni weltiteni. Tennexxee iitti fuggoxxa barra daggaa wodda faachchefata dandeettinaashshanna duuchchiinxa muuxxineexxi wo'ma qicinni ti'ni hitine uurra dandeettinaashsha Mageniinka looliinka miya duuchcha oddo'we.

Yoona dhugaa zinnaariinsha hidha'n ka'litineexxi, qullumma bagedi otammabaaxxe qomatixxe seemmashsha oddo'witineexxi nage'iinxa wengeele kophetishsha lekkate'ni uggudhdhitineexxi qophphpeefatine uurre. Tenne duuchcha'n lebbineexxi giiratishsha bubaaka diyabiloosika mogidduwwa duuchcha xolsa dandeettinaaxxa amana wontetishsha abixxe. Iittanni anjira umoke'ni loliinxe sibljiinxe gulleshsha umoke'n uggudhdhe; Woyyichchi Hafuurika wolaantichcho abixxe, isinna Mageniinke hiyyichchon.

Duuchchi wodda Woyyichcha Hafuura'ni akeekendina'ni soodachchotanna kadha shiqishshe. Konnee qicinni woyyoole duuchchi'a dammaqqineexxi si'ik soodatte. Wongeeletixxa buqo yaane ani haaso'anno wodda soda'a belo haaso'annoshsha hasiisaak hiyyichchi ani'a uwwemaashsha ani'anna soodatte. Ta'anna haachchabik usuremee tenne wongeeleke erganjo kadeennen. Tennexxee ani'a hasisaa qico'n soda'a belo haaso'annoshsha ani'a soodatte.

Muuxamiinka Nage'a

Ani hedheene qiconna maa assaannexxa egendinaashsha eeyyemeek no'oki dayyinna Gootta Yessuusixxe huje'ni xuurameessa erganjo kade'eeke Tikiqoosi duuchchiinxa yaane ha'no'n kulaan. Tennexxee no'o hitta kandeennexxa egendino'aanna ha'noonna jabeesso'aa hiyyennexxi isoo ha'nobaa ergeennen. Mageno Aabinaa'ni, Gootta Yessuusi kiristoosinaa'ninna nage'ikinna jaalala amanat welti dayyuwwakee kaddowwaal. Gootta no'oka Yessuusi Kiristoosii'i cittabaaxxe jaalalanni eeyyaake duuchchi'a badhaadhi insa'ne'a kadowwaal.

Gedeo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.