Efesoonike Manni'a

Ergemallo Phawuloosixxa Erga

Efesoonike Manni'a

E'yichchoo

Phawuloosi Efeesoonike manni'a borreeseexxi erga duuchchiinxi edi darre dhuute haasotaachchi «Mageniinke yaada kadaashsha iimate'ninna buttate'n hexxeexxi daduwwa duuchcha mitteba higgeexxi mitte ookkone Kirsitoosike baalloomi hunda hexxaaxxi yanna gelta wodda» (1:10) hiyyaake yaada'niten. Tenne'n lebendeexxi Yessuusi Kiristoosinni mitte kadati manjiinxi sanne duuchchi mittete kaddaashsha konnee lumoka yaada hujete'n hosinsaashsha Mageniinka arda xexxe'achchiisaaken.

Efeesoonixxi erga siretixxe kuta'n borreessanji mittummatixxee safeeka umo yaada ba'lisati Mageni Aabi arda hitta fileexxa, Belto ifike Yessuusi Kiristoosi darree'n ifixxe cubboxxa gattowwaal alfineexxi hitta leexa kandeexxanna Mageniink lumok addachchiisatika hiyyichchinna Woyyichchi Hafuuri darree'n hitta kokeesemeexxa barrisee haaso'aan. Langaxxe kuta giddo iittann kunni borreesanji tennee erga haasesaak manni Kiristoosi'n anfeexxi mitummatixxi hedho mitteba he'naa wodda insa'nexxe hedho'n dhugaatixxe kaddaashsha insa'ne hitta hedha hassissaaxxa insa'nee xexxe'achchiisaan.

Manni Kiristoosi darree'n afeexxe mittumma'n hitta mittumma afeexxa gargar hedheeke beekkumiinke haaso'inni ifiseme'een. Mageniinxi tuuta manjiinke bisiinshate kaddaa wodda Kiristoosi ookkene bisike umishshaten; Mageniixi tuuta mininshate kadda wodda Kiristoosi shoole kasike dhaaddotike kinjishshate'n; Mageniixi tuuta aretishsha kaddaa wodda Kiristoosi aro'iinshate; borreesanji kunni Kiristoosi darree'n ifisemeeka Mageniinka badhaadha hara lumooshsha jajati haaso'a wodda dhi'mo affeexxe shiqishanni shiqishaan; isi duuchchiinxa yaane uudaak Kiristoosixxe jaalalanni, Kirstoosixxe tolchenshanni, Kiristoosixxe gattowwaal, badhaadhininna nage'i darree'niten.

Konne Maxaafi Giddo Hexxeexxa Yaanuwwa

E'yichchoo

Kiristoosinna Mageniinxa tuuta

Kiristoosi darree'ni haaroxxa hedho

Muuxama