Skip to content
BibleKenya

Gedeo Bible

Langassatikaa Maxaafa 23

Duuchchi woddike Goottixxe Tuutanaa'n Gargar Higa

Labbaliink bisi cancaqemeek yookaan yakkemeek manji Duuchchi woddike Goottixxe tuutaba e'yoqqe'e.

Baanake kado'o yookaan isixxi horte duuchchi tomme ilaqico'n Duuchchi woddike Goottixxe tuuta giddo e'yitoqqe'e.

Amoonichchi yookaan Mo'aabichchi yookaan hiin isixxi horte tomme ila qico'n Duuchchi woddike Goottixxe tuuta giddo e'yoqqe'e. Tinni kadiyyo hasisseechchi ha'no Gibistee'n fuldine'e ora me'itinaammaxxa yanna midha wode'e insa'ne'aa aa'nexxi ha'no'o qophe'nebaan; Mesiphexoomiya giddike Fetoorike qachchik Bi'oork belti Bele'aaminna ha'noo badinaashsha maallaqik iso'o hire.1 Kaddomalee Duuchchi Woddik Gootti ha'nook Mageni Bele'aami hiyyaaxxa laqa gibe; yaane kinni Duuchchi Woddik Gootti ha'no'o eeyyemmaxxee badino isixxa eebbate asse.23 Hedhoti hexxetteke baro duuchcha'n Mo'abi'aanna Amooni'a nage'ikinna eloxxi kaddaashsha halchitoxxe.

Eedoomito atike fira kandeemmaxxe'e insa'ne'e diqattoxxe'e; alaga kadde'e insa'nee boga'n hexxettan Gibtsito diqattoxxe'e. Insa'neexxe sakkaxxe ilaxxi oose Duuchchi Woddike Goottixxe tuuta giddo e'ya dandeetta.

Bagediinxe Kanbexxa Ca'umma Heqqacca

Naapha atika loldota'a fulde kaanbe ofo'litettexxa yanna battitte yaane duuchchinaa'n ifi heqedhi. Ha'noo giddii'ni mitti manji hashsha hortetixxe sanneka wode'e dune batto'eek manji hedhoole, kaanbe giddii'n fuleexxi ookkonni turowaal. Arishsho e'yito'a shiqqa'n daggamma wodda isi biso anshedhowwaal; arishshotinna e'iteeshshanni kaanbe giddi'a higowwaal.

Foole'akee fuldattoxxa bakka kaanbet gadhidarre giissi. Atike mi'inni welti qotto afi; foole'akee fuldato wodda isinni bale qottettexxi foolo'a ofolde kexxettechchi uduma buttinna itti hiissi Duuchchi woddiki Gootti atik Mageni naapha atikenaa'n atee heqqo'anna anga atixxe'n sa'isse uwwo'a atixxe kaanbe giddo mammaremaammaxxe'e, atike qarqara'n battitte yaane afeexxi atenaa'n illeema higabaashsha olla'i atik woyyichchake kadowwaal.

Gargar Hedheeka Seeruwwa

Mitti garbichchi gootta ifikebaa'n baaje atiba'a dagoole, gootta isike asso'a sa'issite uutoxxe. Isi atike boga'n iso'o gammachchiisaake booncho'inna isi fi'leeke qachchi giddo hedhuun male'e iso'o miiccoxxe'e.

Isira'eelixxe gosak manji labbakenna kaddi yookaan meyyaxxi fakketi minike yabaabula kaddoqe'e.4 Duuchchi Woddik Gootti atik Mageni diqataaxxe yaane kaddemmaxxe'e yabaabulle assexxe meyyaxxee uwwemeeka yookaan labballo labbake'n yababule ke'e uwwemeeka maallaqa hoone werreegettexxa uutota'a Duuchchi Woddike Gootta atike Magenike mine'n idaggoxxe'e.

Maallaqiinxaa yookaan hoonechchika dhala alfiyyote dhaliki dayyo atikee liqeessitoxxe. Alagake'e dhaliki liqeessa dandeettatton; yaane kinni eettenee dhaaldota'a e'yita'etteke boga'n huccitattochchi ducuchchinni Duuchchi Woddik Gootti atiki Mageni ate'e eebbiso'a Isira'eelichcho atike dayyi'a dhaliki liqeessitoxxe'e.5

Duuchchi woddike Gootta atike Mageni'a uwwatee werreeggettexxi yaane ate'n turtebaangi rakke uwwi: Duuchchi woddike Gootta atike Mageni'a uwwanno hite'e afo'o saxxettexxa yaane uwwi hiyya'neen: werreegga uwwa gophphottole kinni cubbote ate'n kaddaan.6 Kaddo malee'e Duuchchi Woddike Gootta atikee'e werreegga gophand ise'ni cubbotebaan. Yaane kinn Duuchchi Woddike Gootta atike Mageni'a ifixxe eeyyanni werreegaateshann: afo'ii'ni fulchexxetteka xexxe'achchot muuxa hasissaan.

Mitte manjike woyinetike hiddichchuwwi giddii'n qaxxaamurte saxxatto wodda fichchi giddo hexxeexxi gummanaa'n dandeettette qico iti: yaane kinni anga abixxitetteke miyi giddo ittanna gumma uggudhdhitoxxe. Mitte manji huccemmaxxe midha giddii'n saxxato wodda tisha angati toxxe ita dandeettatton: yaane kinni midha haa'mite adhdhitoxxe.

Source notes (6)
  1. Cross-reference Lak. 22:1-6.
  2. Cross-reference Neh. 13:1-2.
  3. Cross-reference Lak. 23:7—24:9.
  4. Cross-reference Lew. 19:29.
  5. Cross-reference Fula. 22:25; Lew. 25:36-37; Lew. 15:7-11.
  6. Cross-reference Lak. 30:1-16; Mat. 5:33.

Gedeo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.