Langassatikaa Maxaafa

Langassatikaa Maxaafa

E'yichchoo

Kunni Langassatik Maxaafi Isir'eeliki ardi heddole gammoojje qiilla giddo me'ineechchi uduma Kanaanika boga genno'aa he'nee'naa Mo'aabike boga'ni Muuse Isira'eelike ardi'a uurisabelo haaso'eeke haaso'a abideeke maxaafan.

Konne maxaafi giddo borreesende hexxeexxe la'o affeexxe yaanuwwa giddii'n mitte mitte konneechchi butta hexxeexxen.

1. Muuse saxxeexxe shoole tomme wogguwwa giddo muuxendeexxe lumolla yaanuwwa qaabachchiisa'n haaso'e; Mageni gammoojje qiilli boga'ni insa'nee hitta akeekeexxa arda kassi assati, insa'nenna Magenokee xuurameeyete kandaashanna qajeelummati isi'a ajajeemmaashsha insa'ne'n jabeesse kuleen.

2. Muusenna Tomme ajajuwwa higgeen lebe qaassisa'n giddii'ninni siretika seera farri asse tike kula'ni, ardi Mageno calla magenoonfataasha jabeessaamman. Tennenni welti abidisati Isira'eeliki ardi ookkone addachchiisa uwwendeemmake boga'ni hitta gale hosaa qico kulaaka gargar gargar hedheeka seeruwwa higgeen barrisee kulaamman.

3. Muuse Mageni ardakee aageexxi kako hitta hexxeexxe kaddeexxa tika'n kulati, ardikinna tennee kako'aa afeexxa xuurameesumma haaronsashsha insa'nee qaabbachchiisaamman.

4. Iyyaasu Muuse'n aaneexxi Mageniinka arda akeekaashsha hariiremaan. Muusenna Mageniinxa xuurameesumma'aa faaro faarse ke'eechchi udumanna Isira'eelika gosa gosati mine duuchcha eebbiseechchi uduma Yordaanosike galaanii'ni boroti darre'ni hedheeke Mo'aabike boga'ni lummedhe.

Maxaafi konne giddo umoke kaddeek yaadi Mageni fi'leekanna eeyya'neeka ifika arda wodeexanna eebbiseexxa kulaaken; ardikinna Mageniinxi eebba insa'nenaa'ni kutendebaangi hedhoti hedhaashshanna Mageni insa'ne'a asseexxa duuchcha qaabbatati duuchchi wodda Mageno eeyyaashshanna isi'aa ajajemaashsha insa'nee qalli assaan.

Konne maxaafika umo yaada abideek laakkossuwwi hafuura adhdha 6:4-6 hedheeke kadaa wodda isoonna Yesuusi «Ajaji duuchchinaa'ni sa'aki ajaja» hiyye haaso'emmake hiyyichchuwwa abideekeeran. Kunninna, «Duuchchi Woddika Gootta atika Mageno mitte godobinni, shenitte hedhonni, shenite hunnanni eeyyi» hiyyaaken.

Konne Maxaafi Giddo Hexxeexxa Yaanuwwa

Siretika Muuseka Haaso'a

Muuseka Langaka Haaso'a

Tomme Ajajuwwa

Seeruwwaa, Aaduwwaanna Xexxe'achchoo

Kanaanik Bogibaa E'yati Edi Ga'ma Uwwendeexxa Akeete

Kakotixxa Haaro'ma

Muuseka Muuxamiinka Haaso'a

Muusexxa Reyo