Gedeo Bible
Amootsikaa Raaga 3
Koo Isira'eelike ardaa! Duuchchi Woddik Gootti ha'noo Gibtsee'ni fulcheenek ane'ni ha'noo duuchchiingee haaso'eexxa konneechchinn butti'a hedheeka konnee hiyyichcho caqasse.
«Buttate'ni hedha'nekee arda duuchchanaa'ni,
ani fi'leennek ha'no callan;
Tennexxee ha'noo hujineemmaxxee cubbo duuchchi'a,
ani ha'noo mura woxisannon.» hiyye.
Wabeekoltixxa Huje
Lami manni afo'i weli agebaangi,
miteba me'aa dande'aa?
Neenqi itaachcho afebaang, badda'a giddo tolanga harqaa?
Neenqiinxi beltanna mitteelcho alfebaak gongomi giddo buriqitaa?
Fonxoroo foxoorbaang,
ciicco buttate'ni fannaachchoo?
Abixxitaalcho mitteelcho affeebaang,
iitti fonxoro tuqqebaangi fixendo'aa dandeetaa?
Lolakee qophpheessaka malagatiinka hafuura qachchi giddo ufuunfaa wodda,
sodaate roqonsabaaki ardi hedhaa?
Ba'ne qachchake'n geltaa wodda,
tenne asseek Duuchchi Woddike Goottabaataa?
Dhugaaten Lumoki Duuchchi Woddik Gootti buqo yaane
ifike erganjuwwi'a ifisebaak,
mitte yaanenna assabaan.
Neenqi ittanaa'na'a
laqe sodatabaaki ayyete?
Dada duuchchik Duuchchi Woddik Gootti haaso'ena'a
raaga raagabaak ayyete hedhe?
Samaariyaxxa Iba
Ashidoodinna Gibtseexxe kollo'ni hedhake duuchchi'a hite lassitato qici;
«Semaariyaxxe koobuwwa hana bukki hiyye;
ise giddonna hexxeexxa jabaxxa weekkensha,
ardi iseki giddo hexxeexxa xaqaro uudde» hiyye.
«Hunnati saamenna mulqe'ne kollo insa'nexi giddo tuu'lee wonshedheek manni;
eloxxa yaane assa ege'nebaani» hiyya'neen Duuchchi Woddik Gootti.
Tennexxe Lumok Duuchchi Woddik Gootti hiyya'nee qici:
«Naaphi ookkone boga'ni gumaan;
kolluwwa ha'nooxxanna diigan; seemmati giisineka mine ha'nokanna
saamme biraan» hiyye.
Duuchchi Woddik Gootti hiyya'nee qici:
«Allalisanji neeqinke haagananaa'ni
lame gedhebiinxa lekka yookaan manshatika gamisa gatisammashsha
Iittanni Semaariya giddo taqe insa'nexxike kasa'ni;
Demasiqo giddo fanneexxe fawo'ni hana ofo'leekiri
Isira'eelik ardi anjiraan» hiyyeen.
«Tenne laqqe; Ya'iqoobike mine'ni hana dhugaa kulle» hiyya'nee Dada duuchcha Ajajaak Duuchchi Woddik Gootti Mageni.
«Ani Isira'eeli cubbo isexxee mura woxisannoxxa barra
Beetelika tolchimalchuwwa diigannon
Tolchimalchuwwiink gaafuwwi woxemaan;
buttanna ibaan.1
Haarisika mine,
bonike mininni welti fedenshannon;
Daana'iinxe issonni seense ijaarremmak minnuwwi duuchchi diigemaan;
jajjabbi minuwwinna diigemaan,»
hiyyan'neeni Duuchchi Woddik Gootti.
Source notes (1)
- Cross-reference 2 Moy. 23:15.
Gedeo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.