Ɛstɛr 9

Hio Zuif gbɛa hio ngana pɛ mbwa

1Yala bhukɔ gbala tar mɔ bhukɔ gbala bwa ze ka dung nɛ̂ ze mɔ Adar, nɛ yala bhukɔ gbala tar mɔ zea, yone yala ka ɛ weka mɔ de tom lɛm nɛ haa nû nɛ mbonga pɛ kongapora hɔa. Dungɔ nɛ̂ yala ka hio ngana pɛ hio Zuif gdea tazu mbwa ang mɔ dung wan hazu mbwa, nɛ wal mɔa tɛ bo fin nɛtɛ. Yo tɛ bo nɛ̂ hio Zuif ha dung wan hazu hio ngana pɛ mbwa. 2Ha zang hio le mɔ hio kandɔnu fɛt pɛ kongapora Assierus, hio Zuif wesara may hazu bi bulo sungiri nɛ hio wi ndɔng ka ki wal mɔ de gdangamɔ ha tɛ mbwa. Ma wi mɔ yol ha lî mbwa bo na, hazu gasa ke pɛ hio Zuif baa hio olo kandɔ fɛt. 3Hio wi mɔ si wa fɛt mɔ hio kandɔnu, hio kɔmanda, hio gasa wi mɔ gɔvɔrɔma, hinɛ hio wantom pɛ kongapora haa kɔ̂ ha hio Zuif, hazu gasa ke pɛ Mardose baa mbwa. 4Mɛgi, Mardose tɛ bo nɛ̂ gasa wi ha zang kin pɛ kongapora. Ling tɛ wa baa bhandi ha zang hio kandɔnu fɛt, nɛ sulotɛ pɛ Mardose ha kpɔa tɛ nɛ̂ nɛ̂.

5Tuka ɛngi, hio Zuif gbɛa hio ngana pɛ mbwa fɛt nɛ gbapa, mbwa bhondasa mbwa nɛ mbwa dea mɔ ha tɛ hio ngana tuka sila mbwa ngoya. 6Sɔna ha le Suze, hio Zuif gbɛa, nɛ karsi hio wi gɔmmay mɔrkɔ. 7Nɛ ɛ gbɛa: Parsandata, Dalfon, Aspata, 8Porata, Adalia, Aridata, 9Parmaseta, Arisai, Aridai hinɛ Vayezata. 10Hio bewei bhukɔ pɛ Haman, bewei pɛ Hamedata, ngana pɛ hio Zuif. Ha hio wi mɔ ndɔng fɛt, ɛ kay hio wi mɔ pɛ mbwa nɛ ngambanzi na.

11Ha ndangtɛ swe ɛngi, wen dɔka hio wi ka ɛ gbɛa ha le Suze hɔa ha pɛ kongapora. 12Kongapora tɔa ha ko pɛa Esther atɔa: «Kanɛ ha zang le Suze Sɔna, hio Zuif gbɛa nɛ karsi hio wi gɔmmay mɔrkɔ, nɛ hio bewei bhukɔ pɛ Haman. Ka mbwa dea mɛgi hakɛ, ngetɛ mɔ ha behɔ ha zang hio olo kandɔnu pɛ kongapora nde? Maa, anamɔ pɛ mɛ nɛ̂ ge? Ɛ behaa yo ha mɛ. Mɔ ka mɛ ngoya fin nɛ̂ ge? Ɛ bede yo ha mɛ.» 13Esther kiforo wen: «Ka kongapora ngoya, nɛ wal mbonga pɛa wɛnɛ haa wal ha hio Zuif mɔ Suze mɔ de mɛgi bhisiri tuka mɛsɛ, nɛ ɛ gɛsi hio bewei bhukɔ pɛ Haman ha te. 14Kongapora haa nû mɔ de yo tuka ɛngi. Ɛ gbasa mbongaa ha Suze nɛ ɛ gɛsa hio bewei pɛ Haman bhukɔ. 15Mɛgi, hio Zuif mɔ Suze wesara may fin ha yala bhukɔ gbala nar mɔ ze Adar, nɛ mbwa gbɛa hio wi gɔmmay tar, maa, mbwa tɛ kay hio wi mɔ pɛ hio wi nɛ ngambanzi na.

16Hio olo Zuif, ɛ ndɔng mɔ hio kandɔnu pɛ kongapora wesara may hazu pamtɛ mbwa sungiri nɛ hio ngana pɛ mbwa. Hio Zuif gbɛa hio ngana pɛ mbwa tomay bhukɔa mɔrkɔ zubhuzebwa zanga mɔrkɔ (75 000), nɛ mbwa tɛ̂ kay hio wi mɔ nɛ ngambanzi na, 17ha yala bhukɔ gbala tar mɔ ze Adar, ha yala bhukɔ gbala nar, mbwa ɔma tɛ mbwa nɛ mbwa weka yala ɛngi tuka yala gasa yɔngamɔ hinɛ yala totɛ. 18Ka bonɛ̂ pɛ hio Zuif mɔ Suze, mbwa wesara may ha yala bhukɔ gbala tar hinɛ yala bhukɔ gbala nar, mbwa ɔma tɛ ha yala bhukɔ zanga mɔrkɔ. Mbwa gdea swea tuka yala mɔ gasa yɔngamɔ hinɛ mɔ totɛ. 19Yo nɛ̂ ɛngi, hio Zuif ka ɔ ha hio bebe le, mbwa gdea yala bhukɔ gbala nar mɔ Adar nɛ yala totɛ, yala gasa yɔngamɔ, hinɛ yala yenga ka wi ndang ndang ha haa kado ha may.

Yenga mɔ purim

20Mardose ngɛraka hio wi mɔ ndɔng fɛt ha zang takarata, nɛ a tomsa yo ha hio Zuif fɛt mɔ hio kandɔnu fɛt pɛ kongapora Assierus, ka dung sanga mana nɛ nyɛa. 21Wɛnɛ haa nû nde mbwa ade mɔ lɛm nɛ mbonga mɔ yala bhukɔ gbala nar mɔsoykisi nɛ yala bhukɔ zanga mɔrkɔ mɔ ze Adar, mɔ bɛlɛ ndang ndang. 22Tuka hio yala ndɔng ka hio Zuif dungɔ ha pama tɛ mbwa sungiri nɛ hio ngana pɛ mbwa, ha ze ɛngi, ngɔtɛ pɛ mbwa kiforo nɛ totɛ, nɛ zimɔmɔ pɛ mbwa kiforo nɛ yenga. Lɛma nde mbwa ade yo tuka yala gasa yɔngamɔ hinɛ yala totɛ ha zang bɛlɛ ndang ndang. Hio wi atomsi hio kado ha may, nɛ hio wi mɔkɔ̂ ha hio fabha wi. 23Hio Zuif dea mɔ lɛm nɛ haa nû pɛ Mardose, nɛ mbwa baa bosi dea yenga ɛngɛ tuka ndɔki deamɔ pɛ mbwa.

24Haman, bewei pɛ Hamedata mɔ pɛlnam pɛ Agag, ngana pɛ hio Zuif, dungɔ nɛ takaramɔ mɔ bhondisi hio Zuif. Wɛnɛ gɔsa purim, ka dung tuka zeke mɔ ki nɛ gotomɔ ka de mbwa yembele, nɛ karsi mbwa. 25Maa, ka Esther nɛ̂a ha lî kongapora, nɛ a haa nû nɛ wal ngɛrikamɔ nde: Gdangamɔ ka Haman babhɔngiri sungiri nɛ hio Zuif atek hazu wa, nɛ ɛ gɛsi wɛnɛ ha te mɔsoykisi hinɛ hio bewei pɛa. 26Yo nɛ̂ ɛngi, ka ɛ saa hio swe ndɔng nde: Purim nɛ wal ling pur1.

Mɛgi, nɛ wal hio wi mɔ ndɔng fɛt ka hio takarata ɛngi ngɛrka wena, nɛ hio wi mɔ ka mbwa zɔka ha zanga, nɛ mɔ ka hɔa ha tɛ mbwa. 27Hio Zuif gdea ma ndɔki deamɔ, ka hio bezang mbwa, nɛ hio wi ndɔng ka bede tɛ mbwa tuka hio Zuif lɛm kafi yo na: Ɛ bede yenga mɔ hio yala bwa ndɔng nɛ wal mɔ ka ɛ ngɛraka, hinɛ ngimɔ ka ɛ osa mɔ bɛlɛ ndang ndang. 28Ɛ begba tazu nɛ dea yenga mɔ hio yala ndɔng, tanga nɛ tanga, ha zang nam ndang ndang, ha zang kandɔnu ndang ndang, ha zang le ndang ndang. Ɛ lɛm kafi hio yala mɔ purim ndɔng ha pɛ hio Zuif na, nɛ tazu hio bezang mbwa lɛm bisi nɛ yo na.

29Esther, ko pɛ kongapora, bebhoko pɛ Abisail, hinɛ Zuif Mardose ngɛraka zebwa takarata mɔ ha ngaya ha takarata mɔ purim. 30Haa hio Zuif fɛt mɔ hio kandɔ nu gɔmmay ndang zubhuzebwa zanga mɔrkɔ gbala bwa (127) mɔ kongakandɔ nu pɛ Assierus, ɛ tomsa hio takarata mɔ hio wen gaamɔ, hinɛ mɔ mboazu. 31Ɛ gde hio swe mɔ purim ndɔng anu ha yala pɛ mbwa ka Mardose hinɛ Esther, ko pɛ kongapora haa nɛ nû, mɔsoykisi tuka hio ngimɔ zimɔmɔ nɛ tɔatɛ ka mbwa bagde anu hazu hio Zuif nɛ tɛ mbwa, nɛ pɛ hio bezang mbwa. 32Haa nu pɛ Esther ka wɛnɛ gdea anu ha yenga mɔ purim. Yo nɛ̂ ɛngi, ɛ ngɛraka yo ha zang takarata ɛngɛ.