Gata Didayi Bible
ଯାତ୍ରା 37
ନିଅମ୍ ପେଡ଼ି ଆଃରେନେ
(ଯାତ୍ରା ୨୫:୧୦-୨୨)
ଏନ୍ଇଡ଼ିଂ ବତ୍ସଲେଲ୍ ଶିଟିମ୍ ସୁଆ ଏତେ ମ୍ୱାର୍ ନ୍ତି ଅଦା ଚ୍ଲେ ଆରି ମୁଇଂ ନ୍ତି ଅଦା ଅସାର୍ ଆରି ମ୍ୱାର୍ ନ୍ତି ଅଦା ତିଆର୍, ମୁଇଂ ନିଅମ୍ ପେଡ଼ି ଆଃରେଆର୍କେ । ବାରି ଆତେନ୍ ବିତ୍ରେ ବାରି ବାଏରେ ନିର୍ମଲ୍ ସୁନା ଏତେ ଡାଃଚେ ମେଁ ପିତୁର୍ପାକା ସୁନାନେ ଇଟା ଏତେ କାନ୍ଥ ଆଃରେଆର୍କେ । ବାରି ଆତେନ୍ ଚାର୍ କନ୍ ଆତ୍ଲା ଚାର୍ଟା ସୁନାନେ କାଡ଼ୁ କିଗ୍ଆର୍କେ । ଆତେନ୍ ମୁଇଂ କନ୍ ପାକା ମ୍ୱାକ୍ଲିଗ୍ କାଡ଼ୁ ଆରି ବିନ୍ କନ୍ ପାକା ବାରି ମ୍ୱାକ୍ଲିଗ୍ କାଡ଼ୁ ବିଃଆର୍କେ । ଆରି ମେଇଂ ଶିଟିମ୍ ସୁଆ ଏତେ ଟେଙ୍ଗ୍ ଆଃରେଚେ ସୁନା ଏତେ ଗୁଡ଼େବିଃକେ । ଆରି ପେଡ଼ିକେ ଡୁଂନ୍ସା ସିନ୍ଦୁକ ଡାଗ୍ରା ଲେକ୍ନେ ଆତେନ୍ କାଡ଼ୁନିଆ ଆତେନ୍ ଟେଙ୍ଗ୍ ଆଃଗାଆର୍କେ । ଆତ୍ବାନ୍ ମେଇଂ ନିର୍ମଲ୍ ସୁନା ଏତେ ମ୍ୱାର୍ ନ୍ତି ଅଦା ଚ୍ଲେ ଆରି ମୁଇଂ ନ୍ତି ଅଦା ଅସାର୍ନେ ମୁଇଂ ପାପ୍କେ ଡିଡାନେ ଡାବ୍ନା ଆଃରେଆର୍କେ । ବାରି ପିଟା ସୁନା ଏଃତେ ଆଃରେକ୍ନେ ମ୍ୱାକ୍ଲିଗ୍ କିରୂବ ଆଃରେଚେ ପାପ୍କେ ଡିଡାନେ ଡାବ୍ନା ମ୍ୱାର୍ ବାଆଃ ପାକା ଆଃକଆର୍କେ । ଆତ୍ଅରିଆନେ ମୁଇଂ ବାଆଃନିଆ ମୁଇଂ କିରୂବ ବାରି ବାର୍ମୁଇଂ ବାଆଃନିଆ ବାର୍ମୁଇଂ କିରୂବ ଆଃରେଆର୍କେ । ପାପ୍କେ ଡିଡାନେ ଡାବ୍ନା ମ୍ୱାର୍ ବାଆ ପାକା ମ୍ୱାକ୍ଲିଗ୍ କିରୂବକେ ଆତ୍ଅରିଆ ଆଃମିସୁଚେ ଆଃକଆର୍କେ । ବାରି କିରୂବଇଂନେ ଡେନା ଆଡ଼ାତ୍ରା ମେଲେଚେ ପାପ୍କେ ଡିଡା ନ୍ସା ଆଡ଼ୁକା ଆଃଡିଂକେ ବାରି ମେଇଂନେ ସାର୍ମୁଆଃ ସାମ୍ନା ସାମ୍ନି ଡିଂକେ । ମାତର୍ ପାପ୍କେ ଡିଡାକ୍ନେ ପାକା କିରୂବଇଂନେ ସାର୍ମୁଆଃ ଲେଃଗେ ।
ଟେବୁଲ୍ ଆଃରେନେ
(ଯାତ୍ରା ୨୫:୨୩-୩୦)
ଆତ୍ବା ମେଇଂ ଶିଟିମ୍ ସୁଆ ଏତେ ମ୍ୱାର୍ ନ୍ତି ଚ୍ଲେ ବାରି ମୁଇଂ ନ୍ତି ଅସାର୍ ବାରି ମୁଇଂ ନ୍ତି ଅଦା ତିଆର୍ନେ ମୁଇଂ ଟେବୁଲ୍ ଆଃରେଆର୍କେ । ବାରି ଆତେନ୍ ନିର୍ମଲ୍ ସୁନା ଏତେ ଗୁଡ଼େବିଃକେ ଆରି ଆତେନ୍ ପିତୁର୍ ପାକା ସୁନା ଏତେ କାନ୍ଥ ଆଃରେଆର୍କେ । ବାରି ମେଇଂ ପିତୁର୍ ପାକା ଅଁ ଆଙ୍ଗୁଲ୍ନେ ଆଃଡିଂଚେ ମୁଇଂ କାନ୍ଥି ଆଃଗୁଡ଼େଆର୍କେ ବାରି ଆତେନ୍ ଆଃଗୁଡ଼େବକ୍ନେ ପିତୁର୍ ପାକା ସୁନାନେ କାନ୍ଥ ଆଃରେଆର୍କେ । ଆରି ସୁନା ଏତେ ଚାର୍ଟା କାଡ଼ୁ କିଗ୍ଚେ ଆତେନ୍ ଅଁକ୍ଲିଗ୍ ଞ୍ଚନେ ଅଁ କନ୍ ପାକା ଆଃକଆର୍କେ । ଆତେନ୍ କାଡ଼ୁ ଡାଗ୍ରା ଲେଃକ୍ନେ ଆଗୁଡ଼େବକ୍ନେ ପାକାପାକି ଲାଗେଚେ ଲେଃଗେ । ଆତେନ୍ କାଡ଼ୁନିଆ ଆଃଗାବକ୍ନେ ଟେଙ୍ଗ୍ ଏତେ ଡୁଂଆର୍ଡିଂଗେ । ବାରି ମେଇଂ ଆତେନ୍ ଟେବୁଲ୍କେ ଡୁଂ ନ୍ସା ଶିଟିମ୍ ସୁଆ ଏତେ ଟେଙ୍ଗ୍ ଆଃରେଚେ ସୁନା ଏତେ ଆଃଗୁଡ଼େ ବିଆର୍କେ । ବାରି, ମେଇଂ ଟେବୁଲ୍ ଆଡ଼ାତ୍ରା ଲେକ୍ନେ ମୁତାଆଣ୍ଡେଂ, ଡାଗ୍ଲା, ଆତ୍ଅରିଆନେ ତାଲି ବାରି ଚାଟୁ ବାରି ମୁତା, କିଗ୍ ନ୍ସା ମୁତା ସାପାକେ ନିର୍ମଲ୍ ସୁନା ଏତେ ଆଃରେଆର୍କେ ।
ସୁନାନେ କୁପି ଷ୍ଟାଣ୍ଡ୍ ଆଃରେନେ
(ଯାତ୍ରା ୨୫:୩୧-୪୦)
ବାରି, ମେଇଂ ନିର୍ମଲ୍ ସୁନା ଏଃତେ ମୁଇଂ କୁପି ଷ୍ଟାଣ୍ଡ୍ ଆଃରେଆର୍କେ, ମେଇଂ କୁପି ଷ୍ଟାଣ୍ଡ୍ ବାରି ଗଣ୍ଡି ବାରି କେନ୍ଦା ଆଃରେ ନ୍ସା ନିର୍ମଲ୍ ସୁନାକେ ବଗ୍ ବଗ୍ଚେ ପିଟା କାମ୍ଅରିଆ କୁପି ଷ୍ଟାଣ୍ଡ୍ ଆଃରେକେ । ଇଡ଼ିଂ ମେଇଂ ସାରି, ପାଖୁଡ଼ା, କଢ଼ିଇଂ ଆଃରେଆର୍କେ । ମେଇଂ ଆକେନ୍ ଜିନିସ୍ଇଂନେ ମୁଇଂନୁଗ୍ ଜଡ଼େଚେ ମୁଇଂ ଜିନିସ୍ ଆଃରେକେ । କୁପି ଷ୍ଟାଣ୍ଡ୍ନେ ମୁଇଂ ପାକା ଞ୍ଜିକିଲିଗ୍ କେନ୍ଦା ବାରି ବିନ୍ ପାକା ଞ୍ଜିକିଲିଗ୍ କେନ୍ଦା ଦେକ୍ରକମ୍ ତୁର୍କିଲିଗ୍ କେନ୍ଦା ଆତେନ୍ କୁପି ଷ୍ଟାଣ୍ଡ୍ବାନ୍ ତାର୍କେ । ବାରି ମୁଇଂ କେନ୍ଦାନିଆ ବାଦାମ୍ନେ ସାରି ରକମ୍ନେ ଞ୍ଜିକିଲିଗ୍ ବାଦାମ୍, କଢ଼ ବାରି ସାରି, ବାରି ବିନ୍ କେନ୍ଦାନିଆ ବାଦାମ୍ ସାରି ରକମ୍ନେ ଞ୍ଜିକିଲିଗ୍ ବାଦାମ୍, କଢ଼ ବାରି ସାରି, ଦେକ୍ରକମ୍ କୁପି ଷ୍ଟାଣ୍ଡ୍ବାନ୍ ତାର୍କ୍ନେ କେନ୍ଦା ତୁର୍କିଲିଗ୍ ଲେଃଗେ । ମାତର୍ କୁପି ଷ୍ଟାଣ୍ଡ୍ନିଆ ଚେନା ସାରି ରକମ୍ ଅଁକିଲିଗ୍ ବାଦାମ୍ ବାରି କଢ଼ ବାରି ସାରି ଲେଃଗେ, ଆରି, ଆତ୍ଅରିଆବାନ୍ ଆଣ୍ଡିନେ ତୁର୍କିଲିଗ୍ କେନ୍ଦା ତାର୍କେ, ଆତେନ୍ ଇସାବ୍ରେ ମୁଇଂ କେନ୍ଦାନେ ଆଲ ମୁଇଂ କଢ଼ ବାରି ବିନ୍ କେନ୍ଦାନେ ଆଲ ମୁଇଂ କଢ଼ ବାରି ବିନ୍ ବିନ୍ କେନ୍ଦା ଆଲ ମୁଇଂ କଢ଼ ଲେଃଗେ । ଆତେନ୍ ଦିପ୍ ଷ୍ଟାଣ୍ଡ୍ ମେଁନି ଗଣ୍ଡି, କେନ୍ଦା, ସାରି, ଚୁ, ସାପା ନିର୍ମଲ୍ ସୁନା ଏତେ ଆଃରେଆର୍କେ । ଆତେନ୍ ସାପା ମୁଟ୍ଲା ଏଃତେ ସୁନାକେ ବଗ୍ ବଗ୍ଚେ ମୁଇଂ ପିଟା କାମ୍ ଡିଂକେ । ମେଇଂ ଆତେନ୍ସା ଗୁକ୍ଲିଗ୍ ଦିପ୍ ବାରି ଚିମୁଟା ଆରି ଏଲେଃସ ସଃନେ ଚାଟୁ ସାପା ନିର୍ମଲ୍ ସୁନା ଏତେ ଆଃରେଆର୍କେ । ମେଇଂ ଆକେନ୍ ସାପା କାମ୍ ନ୍ସା ପଇଁତିରିସ୍ କେଜି ସୁନା ବେବଆର୍ ଡିଂଆର୍କେ ।
ଦୁପ୍ ବେଦି ଆଃରେନେ
(ଯାତ୍ରା ୩୦:୧-୫)
ମେଇଂ ମୁଇଂ ଦୁପ୍ ଆଃଡୁଆ ନ୍ସା ମୁଇଂ ବେଦି ଆଃରେଆର୍କେ । ଆତେନ୍ସା ମେଇଂ ଶିଟିମ୍ ସୁଆ ବେବଆର୍ ଡିଂଆର୍କେ । ଆକେନ୍ ବେଦି ଅଁ କନ୍ ରକମ୍ନେ, ଜାନେ ଚ୍ଲେ ଆରି ଅସାର୍ ମୁଇଂ ନ୍ତି, ବାରି ତିଆର୍ ମ୍ୱାର୍ ନ୍ତି ଲେଃଗେ । ଆତ୍ଅରିଆନେ ଡିରଙ୍ଗ୍ ଟିପେ ସାପା ବେଦି ଏତେ ମିସୁଃ ଲେଃଗେ । ବାରି, ଆତେନ୍ ଦୁପ୍ ବେଦି ବାରି ସାରି ବାରି ଆତ୍ଅରିଆନେ ଅଁ କନ୍ ଆରି ଡିରଙ୍ଗ୍ ସାପା ନିର୍ମଲ୍ ସୁନା ଏତେ ଗୁଡ଼େ ବିଃଆର୍କେ । ବାରି ଆତ୍ନେ ପିତୁର୍ ପାକା ସୁନାନେ କାନ୍ଥ ଆଃରେଆର୍କେ । ବାରି ଦୁପ୍ ବେଦିକେ ଡୁଂନ୍ସା ମେଁନି ମ୍ବାର୍ ପାକା ସୁନାନେ କାନ୍ଥ ଆଲ ସୁନାନେ ମ୍ୱାକ୍ଲିଗ୍ କାଡ଼ୁ ଆଃରେଆର୍କେ । ମେଇଂ ଆତେନ୍ ଟେଙ୍ଗ୍ଇଂକେ ଶିଟିମ୍ ସୁଆ ଏତେ ଆଃରେଚେ ଆତ୍ଅରିଆ ସୁନା ଆଃଗୁଡ଼େ ବିଃଆର୍କେ ।
ବାଆଃ କିଗ୍ନେ ପବିତ୍ର ଞ୍ଚୁ ଆରି ଦୁପ୍ ଆଃରେନେ
(ଯାତ୍ରା ୩୦:୨୨-୩୮)
ଆକେନ୍ ଇଡ଼ିଂ ମେଇଂ ବାଆଃନିଆ କିଗ୍ନେ ପବିତ୍ର ଞ୍ଚୁ ଆରି ନିର୍ମଲ୍ ଦୁପ୍ ଆତ୍ଲା ଗନ୍ଧବଣିକନେ କାମ୍ ଅନୁସାରେ ନିମାଣ୍ଡା ବାସ୍ନାକ୍ନେ ଜିନିସ୍ ଆଃରେଆର୍କେ ।
Gata Didayi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.