Gata Didayi Bible
ଯାତ୍ରା 25
ପବିତ୍ର ଜାଗା ନ୍ସା ଦାନ୍
(ଯାତ୍ରା ୩୫:୪-୯)
ଏନ୍ଇଡ଼ିଂ ମାପ୍ରୁ ମୋଶାକେ ବାସଙ୍ଗ୍କେ, “ନା ଇସ୍ରାଏଲ୍ ରେମୁଆଁଇଂକେ ନେଙ୍ଗ୍ ଆତ୍ଲା ରାଃସିଂ ନ୍ସା ବାସଙ୍ଗ୍ । ସାପାରେ ମେଙ୍ଗ୍ନେ ମନ୍ଅରିଆ ନିଷ୍ପତି ରାଂଡଆର୍ଏ, ମେଁ ନେଙ୍ଗ୍ସା ମେଃ ବିଃନେ ଦର୍କାର୍ ପଡ଼େଏ । ନେଙ୍ଗ୍ ନ୍ସା ଆତାନ୍ ଜିନିସ୍ ରାସିଂପା । ସୁନା, ରୁପା, ପିତଲ୍ ଆକେନ୍ ଜିନିସ୍ଇଂ ପେ ରେମୁଆଁଇଂନେ ବାନ୍ ଗ୍ରଅନ୍ ପେଡିଂଏ । ନିଲି ବାନା, କଃଡ଼େଆଁ ବାନା ଆରି ସିନ୍ଦୁର୍ ବାନା ଆରି ତୁଲୁଏ, ତୁଲୁଏ ପାତଲ୍ ସୁତାନେ ପାଟାଇ, ଆରି ଗିମିଃ ଉଗ୍ବ, ମିୟାଁ ଡିଂଲାଏକ୍ନେ ମେଣ୍ଡା ଉକ୍ସା, ଉଂମେଣ୍ଡାନେ ବ୍ନୁ ଉକ୍ସା ଆରି ଶିଟିମ୍ ସୁଆ । ଦିପ୍ ଆତ୍ଲା ଞ୍ଚୁ ବାରି ମୁଇଂ ପଦବିଅରିଆ ବନ୍ସା ବେବଆର୍ ଡିଂନେ ଞ୍ଚୁ ଆରି ବାସ୍ନାବିନେ ଦୁପ୍ ଆତ୍ଲା ବାସ୍ନା ବିଃନେ ଜିନିସ୍ଇଂ ସାପା । ଏଫୋଦ୍1 ଆରି ଗ୍ରିନିଆ ଗାଗ୍ନେସା ପାଟା ଗୋମେଦକ ମଣୀ ଲୁଆଁନେ ବ୍ରି କୁର୍ଚେନେ, ଆକେନ୍ ସାପା ଦାନ୍ ମେଙ୍ଗ୍ନେ ବାନ୍ ନାସାଃଏ ।” ପର୍ମେସର୍ ଆକେନ୍ ଡିଂଚେ ବାସଙ୍ଗ୍କେ, “ମେଇଂ ନେ ଆତ୍ଲା ମୁଇଂ ପବିତ୍ର ଜାଗା ଆଃରେଆର୍ଲେ ।” ଆତ୍ଅରିଆ ନେଙ୍ଗ୍ ମେଙ୍ଗ୍ନେ ବିତ୍ରେ ମ୍ୱାସାଏ । ପବିତ୍ର କୁଡ଼ିଆନେ ଆକାର୍ ଆରି ଆତ୍ଅରିଆନେ ସାପା ତାଲିନେ ଆକାର୍ ଆଣ୍ଡେଙ୍ଗ୍ନେ । ଆଣ୍ଡିନେ ଗାଲି ନେ ଆପେକେ ନେରାସୁଏଃଏ, ଆତେନ୍ ଇସାବ୍ରେ ପେ ସାପା ପେଡିଂଏ ।
ନିଅମ୍ ପେଡ଼ି
(ଯାତ୍ରା ୩୭:୧-୯)
“ଶିଟିମ୍ ସୁଆନେ ମୁଇଂ ପେଡ଼ି ପେରାଃରେଏ । ଆତେନ୍ ପବିତ୍ର ପେଡ଼ି ମ୍ୱାର୍ ନ୍ତି ଅଦା ଚ୍ଲେ ମ୍ୱାର୍ ନ୍ତି ଅଦା ଅସାର୍ ଆରି ମ୍ୱାର୍ ନ୍ତି ଅଦା ତିଆର୍ ପେରାଃଡିଂଏ । ତେଲା ପେ ନିର୍ମଲ୍ ସୁନା ଏତେ ଆତେନ୍କେ ପେୱେଏ । ମେଁନେ ବିତ୍ରେ ପାକା ଆରି ବାଏରେ ପାକା ଡିଗ୍ ପେୱେଏ । ଆରି ମେଁ ଆଡ଼ାତ୍ରା ପିତୁର୍ ପାକା ସୁନାନେ ତୁରାଃ ପେତେଏ । ଆତେନ୍ସା ଅଁ କନ୍ପାକା ଅଁକିଲିଗ୍ ସୁନାନେ କାଡ଼ୁ ପେଲାଗାଏ । ମ୍ୱାର୍ପାକା ମ୍ୱାକ୍ଲିଗ୍ କାଡ଼ୁ ପେଲାଗାଏ । ଆକ୍ମେକେ ଡୁଡୁଙ୍ଗ୍ସା ଟେଙ୍ଗ୍ ତିଆର୍ ପେଡିଙ୍ଗ୍ଏ ଆରି ସୁନା ଏତେ ପେୱେଏ । ପେଡ଼ି ଡୁଡୁଙ୍ଗ୍ସା ପେଡ଼ିନେ ମ୍ୱାର୍ ପାକା କାଡ଼ୁ ଏତେ ଆତେନ୍ ଟେଙ୍ଗ୍କେ ପେରାଃଗାଏ । ଆତେନ୍ ଟେଙ୍ଗ୍ ପେଡ଼ିନେ କାଡ଼ୁ ବିତ୍ରେ ଲେଃଏ ଆରି ଆତ୍ବାନ୍ ଅଃନାଡିଗ୍ ପେରାତାର୍ ଣ୍ଡୁ । ବାରି ନେଙ୍ଗ୍ ଆପେକେ ଆଣ୍ଡିନେ ନିଅମ୍ନେ ବ୍ରି ପାଟା ମ୍ବିଏ, ଆତେନ୍ ଆତାନ୍ ପେଡ଼ିନିଆ ପେବଏ ।”
ଆକେନ୍ ଇଡ଼ିଙ୍ଗ୍ ପେ ନିର୍ମଲ୍ ସୁନା ବାନା ଏତେ ମ୍ୱାର୍ ନ୍ତି ଅଦା ଚ୍ଲେ ଆରି ମ୍ୱାର୍ ନ୍ତି ଅଦା ଅସାର୍ ଆରି ଆରାତ୍ରା ଡାନ୍ସା ମୁଇଂ ପାପ୍ ଡିଡାନେ ଡାବ୍ନା ପେରାଃରେଏ । ଆକେନ୍ ଇଡ଼ିଙ୍ଗ୍ ପେ ପିଟା ରକମ୍ ବଗ୍ ବଗ୍ଚେ ଆଃରେକ୍ନେ ସୁନା ଏତେ ମ୍ୱାକ୍ଲିଗ୍ କିରୂବ2 ଦୁତ୍ ପେରାଃରେଏ ଆରି ଆତେନ୍କେ ପାପ୍ ଡାନେ ଡାବ୍ନା ଡାଗ୍ରା ମ୍ୱାର୍ ବାଆ ପାକା ପେବଏ । ମୁଇଂ କିରୂବ ମୁଇଂ ବାଆଃନିଆ ଆରି ବିନ୍ କିରୂବ ବିନ୍ ମୁଇଂ ବାଆଃନିଆ ପେବଏ । ମ୍ୱାର୍ ଦୁତ୍କେ ଜାକ ଆଃମିସୁଚେ ପେବଏ । ଆତେନ୍ କିରୂବଇଂ ନିଅମ୍ ପେଡ଼ିକେ ମେଙ୍ଗ୍ନେ ଡେନା ଏତେ ଡାଆର୍ଏ, ଯାହାକି କିତଙ୍ଗ୍ଇନି ପାକା ମେଙ୍ଗ୍ନେ ଡେନା ଆତଡ଼ିଆବଏ । ଡାବକ୍ନେ ପାକା ତାମୁଁଚେ କିରୂବଇଂ ସାମ୍ନା ସାମ୍ନି ଡିଂଚେ ଲେଆର୍ଏ । “ପେ ଆକେନ୍ ପାପ୍ ବୁଃଡ଼ିନେ ଆତେନ୍ ପେଡ଼ି ଆଡ଼ାତ୍ରା ପେବଏ । ବାରି ନେ ଆପେକେ ଆଣ୍ଡିନେ ନିଅମ୍ ବ୍ରି ପାଟା ନେବିଏ ଆତେନ୍ ଆତାନ୍ ପେଡ଼ି ବିତ୍ରେ ପେବଏ । ଆରି ନେଙ୍ଗ୍ ଉଡ଼ିବେଲା ପେ ଏତେ ଙ୍କୁଡ଼େଏ ଆରି ପାପ୍ ବୁଃଡ଼ିନେ ଆଡ଼ାତ୍ରା ପାକାବାନ୍ ଡାଗ୍ଲା, ନିଅମ୍ ପେଡ଼ିନେ ଆଡ଼ାତ୍ରା ଲେକ୍ନେ କିରୂବ ଦୁତ୍ଇଂନେ ବାନ୍ ପେ ଏତେ ବାଲିର୍ବାତାଚେ ଇସ୍ରାଏଲ୍ ଗଡ଼େଇଂନେ ସାମୁଆଁଇଙ୍ଗ୍ ନେଙ୍ଗ୍ ସାପା ଆଦେସ୍ ଆପେକେ ନ୍ନାଃମ୍ୟାଃଏ ।”
ରୁଟି ଆତ୍ଲା ବିଃକ୍ନେ ପବିତ୍ର ଟେବୁଲ୍
(ଯାତ୍ରା ୩୭:୧୦-୧୬)
“ଶିଟିମ୍ ସୁଆ ଏତେ ମୁଇଂ ଟେବୁଲ୍ ଆରେପା, ଆତେନ୍ ଟେବୁଲ୍ ମ୍ୱାର୍ ନ୍ତି ଚ୍ଲେ, ମୁଇଂ ନ୍ତି ଅସାର୍ ଆରି ମ୍ୱାର୍ ନ୍ତି ଅଦା ତିଆର୍ ଡିଂଏ । ଆକେନ୍ ଟେବୁଲ୍କେ ନିର୍ମଲ୍ ସୁନା ଏତେ ୱେଁପା, ବାରି, ମେଁ ଚାର୍ବିଡ଼୍ତି ମୁଇଂ ସୁନାନେ କାନ୍ତ ବିଃପା । ବାରି ଆତେନ୍ ଚାର୍ବିଡ଼୍ତି ଅଁ ଆଙ୍ଗୁଲ୍ ମୁଇଂ ନ୍ତି ଅସାର୍ନେ ମୁଇଂ ତକ୍ତା ଆରେପା ଆରି ମୁଇଂ ସୁନାନେ କାନ୍ତ ଆରେପା । ଆରି ସୁନା ଏତେ ଅଁକିଲିଗ୍ କାଡ଼ୁକେ ଅଁକିଲିଗ୍ ଞ୍ଚନିଆ ଅଁ କନ୍ପାକା ପେବଏ । ଆକେନ୍ କାଡ଼ୁଇଙ୍ଗ୍ ବିତ୍ରେ ଟେଙ୍ଗ୍ ଟେବୁଲ୍ନେ ଲିଗିଙ୍ଗ୍ ସାମ୍ୱାଲେଏ । ଆରି ଆତେନ୍ଇଙ୍ଗ୍ କାଡ଼ୁନେ ଡାଗ୍ରା ଡାଗ୍ରା ଲେପଡ଼େଏ । ଟେବୁଲ୍କେ ଡୁଡୁଂ ନ୍ସା ଶିଟିମ୍ ସୁଆ ଏତେ ଟେଙ୍ଗ୍ ତିଆର୍ ଡିଂଚେ ଆତ୍ଅରିଆ ସୁନାନେ ବାନା ଏତେ ଆଃପୁଏ ବିଃପା । ଆକ୍ମେନେ ତାଲି, କପ୍, ବତଲ୍ ଆରି କଁସ୍ ଗିନା ନିର୍ମଲ୍ ସୁନା ଏତେ ଆରେପା । କପ୍ ଆରି ବତଲ୍ ଉଗ୍ ନ୍ସା ବେବଆର୍ ଡିଂଏ । ଆତେନ୍ ଟେବୁଲ୍ ଆଡ଼ାତ୍ରା ନେଙ୍ଗ୍ ସାମ୍ନେ କାଲାଆଃ ଦର୍ସନ୍ ଡିଂନେ ରୁଟି ପେବଏ ।”
ସୁନାନେ କୁପି ବନେ ଜାଗା
(ଯାତ୍ରା ୩୭:୧୭-୨୪)
“ଆକେନ୍ ପରେ ପେ ମୁଇଂ ଦିପ୍ ବନେ ଜାଗା ତିଆର୍ ପେଡିଙ୍ଗ୍ଏ । ଆକେନ୍ ନିର୍ମଲ୍ ସୁନାକେ ସୁନାରିନିଆ ଡୁଙ୍ଗ୍ୱେଚେ ପିଟା କାମ୍ଅରିଆ କୁପି ବନେ ଜାଗା, ମେଁନି ମୁଲ୍ ଆରି କେନ୍ଦା ଆଃରେଏ; ଆରି ଗୋଲାଧାର, କଳିକା ବାରି ସାରି ଆତ୍ଅରିଆ ପେରାମିସୁଏ । ଆକେନ୍ ଦିପ୍ ବନେ ଜାଗା ତୁର୍ କେନ୍ଦା ଡିଂଚେ ଲେଃଏ । ଆକ୍ମେନେ ମୁଇଂ ପାକାବାନ୍ ଞ୍ଜିକିଲିଗ୍ ଦିପ୍ କେନ୍ଦା ଆରି ବିନ୍ ପାକାବାନ୍ ଞ୍ଜିକିଲିଗ୍ ଦିପ୍ କେନ୍ଦା ତାର୍ଏ । ସାପା କେନ୍ଦାନିଆ ଞ୍ଜିକିଲିଗ୍ ସାରି ଲେଃଏ । ଆକେନ୍ ସାରିଇଙ୍ଗ୍ ପିସ୍ତା ଚେନାନେ ସାରି ରକମ୍ ଞ୍ଜିକିଲିଗ୍ ଆକାର୍, ଗଟି ଆରି ସାରି ଲେଃଏ । ଦିପ୍ ବନେ ଜାଗାନ୍ନିଆ ଚେନାନେ ସାରି ରକମ୍ ଅଁକ୍ଲିଗ୍ ଆକାର୍ ଆରି ଗୁଟି ସାରି ଲେଃଏ । ଆତେନ୍ ଦିପ୍ ବନେ ଜାଗାବାନ୍ ଆଣ୍ଡିନେ ତୁର୍କିଲିଗ୍ କେନ୍ଦା ଡିଂଏ, ମେଙ୍ଗ୍ନେ ମୁଇଂ କେନ୍ଦା ଆଡ଼ାତ୍ରା ମୁଇଂ ଗୁଟି ଆରି ମୁଇଂ କେନ୍ଦା ଆଡ଼ାତ୍ରାନେ ଆଲ ମୁଇଂ ଗୁଟି ଆରି ବିନ୍ ମୁଇଂ କେନ୍ଦା ଆଡ଼ାତ୍ରାନେ ଆଲ ମୁଇଂ ଗୁଟି ଲେଃଏ । ଆତେନ୍ ଗୁଟି ଦିପ୍ କେନ୍ଦା ପୁରାପୁରି ବାବ୍ରେ ନିର୍ମଲ୍ ସୁନା ଏଃତେ ମୁଇଂ ପିଟା କାମ୍ ଡିଂଏ । ଆକେନ୍ ସାପା ସୁନାନେ ବାନା ଦିନା ଡିଂଏ । ଆରି ଆକେନ୍ ଜଡ଼େଚେ ମୁଇଂ ବାଗ୍ ଆଡିଂଆର୍ଏ । ପେ ମେଁ ଆତ୍ଲା ଗୁକ୍ଲିଗ୍ ଦିପ୍ ତିଆର୍ ପେଡିଙ୍ଗ୍ଏ । ଆତ୍ଅରିଆ ରେମୁଆଁଇଂ ଆତେନ୍ ଦିପ୍ ଆଡୁଆଲା ଆତେନ୍ ସାମ୍ନେ ତାର୍କିଗ୍ ତ୍ନାଏ । ନିର୍ମଲ୍ ସୁନା ଏତେ ଆତ୍ଅରିଆନେ ଚିମୁଟା ଆରି ଅଙ୍ଗାରଧାନି ତିଆର୍ ପେଡିଙ୍ଗ୍ଏ । ଆକେନ୍ ଦିପ୍ ବନେ ଜାଗା ଆରି ଆତ୍ଅରିଆନେ ଜିନିସ୍ଇଙ୍ଗ୍ ସାପା ପଇଁତିରିସ୍ କେଜି ସୁନା ଏତେ ନିର୍ମଲ୍ ସୁନା ଏତେ ତିଆର୍ ଡିଙ୍ଗ୍ଏ । ସାବ୍ଦାନ୍, କଣ୍ଡାନିଆ ଆପେକେ ମେଃ ମେଃନି କାମ୍ ଡିଂନେ ଆକେମ୍ୱକେ, ଦେତ୍ରକମ୍ ସାପାରେ ଡିଂପା ।”
Source notes (2)
- Footnote ଯାଜକଇଂ ନ୍ସାଃଅରିଆ ଗାଗ୍ନେ ପାଟାଇନେ ଗେହେଃ
- Footnote ମ୍ବାକିଲିଗ୍ ଡେନା ଲେଃକ୍ନେ ଦୁତ୍
Gata Didayi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.