Siiqo Saba 5

Panththazi

1«Taas siiqo michcho gidida ta mishirayee!

Tani ta atakilte giddo geladis.

Ta karbbenne ta shitto

ciish maxadis;

Eessa ukeththaa ililozara

gaththa madis;

Ta woyne ushshaa,

ta maaththaa uyadis» gides.

Laggeti

«Intteno siiqettizaytoo!

Kallana gakkanaas miite;

alana gakkanaaska uyite» gida.

Geela7oya

2«Tani omars dhiskadis;

gido attiin ta wozinay beeggides;

Ta siiqozi kare qoxxishe,

‹Taas siiqo michcho

gidida mishirayee!

Nenan wosoy baynda

ta haraphpheyee!

Nena shoobbays taas kareza doya;

ta hu7ey kenchchon wooqqides.

Ta binanaykka omarsa puusen

musides› gishin siyadis.

3Tani ta may7o kessadis;

histtiin zaara may7oo?

Ta tohokka meecettadis;

qasse zaarada urqqasoo?

4Ta siiqozi penge xoo7era

kushe yeddides;

histtiin taas maracen

pol7u gides.

5Hessafe guye ta siiqozas

kare doyanaas dendadis;

kareza doyana ta oykkishin

ta kusheppe karbbey xokettides;

ta biradhdhetappeka

shittoy goggides.

6Ta kareza doyshin ta siiqozi

simmidi bichchides;

iza qaala cenggurssa siyanaas

keeha amottadis.

Minththadakka koyadis;

gido attiin demmanaas

dandayabeekke;

Xeygadis shin

izi taas koyibeenna.

7Katama naagizayti tana demmi

wadhdhidi madunththida;

katama gimbe naagizayti

ta may7ida seelo may7oza

qaari ekkida.

8Intteno Yerusalaame geela7otoo!

Intte ta siiqoza

demmidaa gidikko

tani iza siiqoppe dendidayssan

hargidayssa hadara

izas yootite» gadus.

Laggeti

9«Hanne maccassa

ubbaafe aadho lo7oyee!

Tumu ne siiqo laggezi

haratappe dummatizee?

Neni hayssa mala

nuna hadara gizay

izi haratappe waaninee?» gida.

Geela7oya

10«Ta siiqoy daro lo7onne mino;

10,000 attumasa garsan

iza malay deenna.

11Iza hu7ey geeshsha

worqqa misatees;

iza binanaykka olossinne

dum7a kareth misatees.

12Iza ayfeti

shaafa lanqen diza

haraphpheta malanne

maaththan meecettida

inqquta mala.

13Iza shagalati mal7iza

sawo maatata mala;

dumma dumma

qimameti tokettida

atakilteso misateettes;

iza metershati karbbe shittoy

xokkiza suufe ciishsha mala

lo7eettes.

14Iza kusheti inqqun alleqettida

worqqa guufe mala lo7eettes;

iza bollay simpere geetettiza

inqqun alleqettida danggarsa

zaale mala lo7ees.

15Iza tohoti worqqan tokettida,

daldachcha tuussata misateettes;

iza medhay

Libaanoose zigan alleqettida

Libaanoose zuma misatees.

16Iza qaalay eessa mala mal7ees;

iza bollay mulera kayshees;

Intteno Yerusalaame geela7otoo,

ta siiqozinne ta laggezi

hayssa misatees» gadus.