Siiqo Saba 6

Laggeti

1«Maccassa ubbaafe lo7oyee!

Ne siiqo laggezi awa bidee?

Nunikka nenara issife koyanaas,

izi awa baggara bidaakko

nuus yoota» gida.

Geela7oya

2«Ta siiqozi dorsa wude heemmanaas

lo7o ciishshata maxanaas

shittos go7iza sawo

maatay dizaso

duge atakilte giddo wodhdhides.

3Tani ta siiqozassa;

izikka taassa;

izi wudeza cilila maatan

heemmees» gadus.

Panththazi

4«Ta godee! Neni Tirxxa katamay

lo7iza mala lo7aasa;

Yerusalaame mala keeha kayshaasa;

bandira tookkidi biza

olanchcha mala

yashissiza teemara daasa.

5Woze nena ne ayfe

taappe denththarkkii!

Istti tana di7idi

qasho as kessida;

Ne binanay Gala7aade zumaappe

duge wodhdhiza

deysha wude misatees.

6Istta giddon maynney baynda

mentte mentte yeliza iskey

diirettiin meecetti keziza

booththa dorsa wudeta mala

ne achchati tana ufaysseettes.

7Ne shagalati ayfeso kammiza

quraace giddora xeelliza wode

oroomaane nam7u kessi

phalqidaa misateettes.

8Usuppun tammu macca kawoti,

osppun tammu

laggeththo maccassati,

qasse qooday baynda

geela7oti deettes.

9Tani gidikko

issiniyo xalla dosays;

izi bolla ay wosoy deenna;

iza haraphphe mala

kaysha uttadus;

iza ba aayeyska mexi issino;

izo yelida aaya izo

ubbaafe aaththa siiqawus.

Geela7otikka izo

xeellidi xeellidi sabbeettes;

kawo machchetinne

iza laggeththoti izo nashsheettes.

Laggeti

10Hanna maalado

xalqqe mala mokkizaara,

agina mala phoollizaara,

awa mala poo7izaara,

bandira tookkidi biza

olanchcha mala

yashissizaara

iza oonee?» geettes.

Panththazi

11«Tani shoobban tokettida

atakilteta be7anaas,

woyney aacidaakko,

oroomaaneykka ciiyidaakko

xeellanaas

duge ochcholooney

tokettizaso wodhdhadis.

12Tani qoppontta dishin,

ta amoy tana efidi

kawo para-gaareta bolla

utissides» gides.

Laggeti

13«Hanne Shulaame maccassayee!

Haa simma;

Nena nu lo7eththi xeellana mala

haa simma» gida.

Geela7oya

«Daro asa sinththan

yexxiza asa mala,

tana Shulaame maccassayo

ays xeelleetii?» gadus.