Geeshsha Mexaafa
Mazamure Maxaafa 84
Qoore Nayti Zammareta Kaabbos Susul7en Yexxida Mazamure
Abeet medheteththa GODAWU!
neni de7izasoy ay mala lo7osoo!
Tani GODAA Keeththa
zago laamotays;
tani kumeththa wozinappe
de7o Xoossas
ufayssan yexxays.
Abeet Ubbaafe
Wolqqama GODAWU!
Ta kawozo Xoossawu!
Nees yarsho yarshizasoza matan
siine kafoy baas
de7izaso demmadus.
Haraphpheyakka
baas yelizaso keexxadus.
Ne Keeththan de7izaytinne
mernaas nena sabbizayti
anjjettidayta.
Banttas nena wolqqa ooththizayti,
Xiyoone oge ba wozinan
amottizayti anjjettidayta.
Bakka geetettiza haaththi baynda
shaafara istti kanththiza wode
he sohon pulttoy dhuuqqana;
Badhdhesa iraykka bukkidi
biitta kalssana.1
Istti wolqqa bolla wolqqa
gujji gujji baana;
Istti Xoossa sinththan
Xiyoonen beettana.
Abeet Ubbaafe
Wolqqama GODAWU!
Ta woosa neni siya.
Abeet Yaaqoobe Xoossawu!
Ta gizaaz ezga.
Abeet Xoossawu!
Neni doora tiyda
nu kawoza anjja;
izi nuus gondalle gidida gishshas
ne iza xeella.
Harason shii gallas de7anaappe
Xoossa Keeththan
issi gallas duussi lo7o;
Iitata dunkaanen daanaappe
Xoossa Keeththa zagon
zabe gideththi taas lo7o.
GODAY nuus arshenne gondalle;
izi ayoteththaninne
bonchchon nuna naagees;
Suureteththan hemettizayta
izi lo7o miish diggenna.
Abeet Ubbaafe
Wolqqama GODAWU!
Nenan ammanettizayti
anjjettidayta.
Source notes (1)
- Footnote Bakka gizayssa dumma dumma Geeshsha Maxaafati yeeho shoobba geettes.
Geeshsha Mexaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.