Mazamure Maxaafa 60

Mesphexoomiyaninne Aaraamen diza deraara oletti simmidi Iyo7aabey Maxine Zullen tammanne nam7u shii Eedoome asaa wodhida wode timirtes Dawiti zammareta kaabbos, «Ciishsha» geetettiza diiththa giigson shiishshida markkateththa woosa

1Abeet Xoossawu!

Neni nuna aggadasa;

nuna menththereththa yeggadasa;

neni nuna hanqettadasa;

ha7i gidikko simmada

nuna giigsa.

2Neni biittayo qaaththada za7isadasa;

iza kokkoriza gishshas

neni izi za7a kunththa.

3Neni ne asaa meto bessadasa;

neni nuna maththosiza

woyne ushshu ushshadasa.

4Nees yayyizayti bantta morkketa

wondafeppe attana mala

malata immadasa.

5Neni siiqizayti attana mala

ne wolqqan nuna ashsha;

neni nuukko alla.

6Xoossi ba keeththan dishe,

«Tani xoonada Seekeeme

biitta shaakkana;

qasse Sukoote shoobbaa gishana.

7Gala7aadeynne Minaasey tayta;

Efreemey taas hu7e qoobe;

Yuhuday taas kawoteththa guufe.

8Mo7aabey ta meecettizaso;

Eedoomey taas caamma

woththizaso;

tani Filisxeeme

xoonada gererana» gides.

9Gimbettida katamaakko

tana oonee efanay?

Eedoome gakkanaas

tana oonee kaaleththanay?

10Abeet Xoossawu!

Nuna aggiday nena gidikkii?

«Neni nu tooranchchatara

olas kezikke» gadasa.

11Asappe gidida maadoy hada;

hessa gishshas nu morkketa bolla

nuus xoono imma.

12Xoossa wolqqan nu morkketa

nuni xoonana;

izi nu morkketa yedhettana.1