Mazamure Maxaafa 51:10

Kawo Dawiti laymatidaappe guye nabe Naataaney izakko yida wode Dawiti zammareta kaabbos yexxida mazamure

1Abeet Xoossawu!

Ne mernaa siiqoza mala

tana maara;

ne qadheta daron

ta mooroza qucca.1

2Ta iitateththa ubbaa

taappe meecca;

ta nagarappeka tana geeshsha.

3Tani ta mooroza erays;

ta nagaraykka

ubbato ta sinththana.

4Ta nena xalla qohadis;

qasseka ne sinththan

iita ooththadis.

Hessa gishshas

ne qaxxayda qixaaten,

ne ta bolla pirdida pirdankka

ne xillo2

5Tani ta aayi uloppe

doommada nagaranchcha;

yelettoosofe haa simmadakka

ta mooranchcha.

6Hekko neni asa wozinappe

tuma koyaasa;

hessa gishshas

ta giddo asateththaa

ne aadho erateth tamaarsa.

7Hisophphe bonccon

neni tana pistta;

tani geeyana;

tana meecca;

tani shachchafe

aadhdhada booxxana.

8Neni tana ufayssinne

hashshu giissiza miish sissa;

ne menththereththida

ta meqeththatakka paththa.

9Ne sinth ta nagarappe

haraso zaara;

ta qoho ubbaaka qucca digga.

10Abeet Xoossawu!

Ne taas geeshsha

wozina medhdha;

mino ayana ta giddon woththa.

11Tana ne sinththafe oloppa;

ne Geeshsha Ayana

taappe ekkofa.

12Ne atoteththaa ufayssaa

taas zaarada imma;

eeno giissiza ayanan

ne tana kunththa.

13Histtiko tani mooranchchata

ne oge tamaarsana;

he nagaranchchatikka

neekko simmana.

14Abeet Xoossawu,

tana ashshiza Xoossawu!

Tani shemppo wodhontta mala

tana maadda;

ta inxarsayka

ne xilloteththa gishshas

ililisan yexxo.

15Abeet Godawu! Ta doona doya;

histtiko ta inxarsay

nena galatana.

16Neni yarshon ufayettizaakko

ta nees yarsho shiishshana;

ne gidikko yarshon ufayettaka;

xuugettiza yarsho yarshikokka

neni ufayettaka.

17Xoossas shiiqiza yarshoy

ashke ayana;

abeet Xoossawu!

Meqqida wozina ne kadhakka.

18Abeet Xoossawu!

Ne dosan Xiyoono duresa;

Yerusalaame gimbeta gimba.

19He wode xilloteththa yarshoninne

wuri xuugettiza yarshon

neni ufayettana;

kormatikka ne yarshizason

yarshettana.