Mazamure Maxaafa 50

Aasaafe Mazamure

1Wolqqama GODAY,

Xoossay haasayees;

Arshey mokkizasoppe

wullizaso gakkanaas

sa7an diza asaa xeygees.

2Mulera lo7o gidida Xiyoonippe

Xoossi poo7isees.

3Nu Xoossi yaana;

izi co7u geenna.

Miza tamay iza sinththana;

wolqqama gotey iza yuushonna.

4Xoossi ba asaa pirdanaas

salonne sa7a xeygees.

5«Tanara yarshon caaqettida

geeshshata taakko

shiishshite» gees.

6Xoossi barkka pirdiza

Xoossa gidida gishshas

saloti iza xilloteththa awajjeettes.

7«Ta asazoo ne siya!

Tani nees yootays;

Isra7eele asawu!

Tani ne bolla markkattays.

Tani Xoossay ne Xoossa.

8Ne yarsho gishshassinne

neni ubbato shiishshiza

xuugettiza yarsho gishshas

tani nena borikke.

9Hessa malakka ne dirsafe kormata,

woykko ne xarphphafe deyshata

ekkanawu koykke.

10Woran diza do7a ubbati taassa;

shii zumata bollan diza

mehetikka tayta.

11Tani zumata bolla diza kafota

ubbaa erays;

demban diza medheteththati

ubbay tayta.

12Salo gufanththon diza ubbay taassa;

hessa gishshas ta gafikkoka

nees yootikke.

13Tani kormata asho miikke;

Woykko deyshata suuth uyikke.

14Xoossas galata yarsho shiishsha;

ne adina Ubbaafe Dhoqqa

Xoossas gaththa.

15Meto gallas

ne tana xeyga;

ta nena ashshana;

nekka tana bonchchana» gees.

16Gido attiin Xoossi nagaranchchas,

«Ta woga neni

zaara zaarada biddanaas

woykko ta caaqo qaala

ne yootanaas

nees ay maatay dizee?

17Ne ta seera ixxaasa;

ta qaalatakka kadhaasa.

18Neni kayso be7ida wode

izara dabbotadasa;

laymatizayta maabarankka

zuppetaasa.

19Neni ne doona

iita haasayanaas doyadasa;

ne haasayza haasayay

wordo xalla.

20Aadhdhooson aadhdhooson

ne ishaa zigiraasa;

ne aayi naa sunththika mooraasa.

21Neni hayssa ubbaa ooththiza wode

tani co7u gadis;

hessa gishshas neni tana

ne mala gaada qoppadasa;

gido attiin ha7i tani

nena walassays;

qasseka ta nena

qonccen seerays.

22«Intteno Xoossa dogizaytoo!

Hayssa akeekite;

intte ixxis giikko

tani inttena menththereththana;

he wode inttena oonikka

ashshenna.

23Taas galata immiza asi

tana bonchchees.

Suure ogera biza as

tani atoteththaa bessana» gees.