Mazamure Maxaafa 48

Qoore Nayta Mazamure

1GODAY gita;

nu Xoossa kataman

geeshsha zumazan

gita galatay izas bessees.

2Biitta ubbaas ufays gididay,

pudeha baggara beettizay

dhoqqanne lo7o gidida

Xiyoone zumay

wogga kawoza katama.1

3He katamaa gimbeza giddon,

izi katamays ashshiza

miixa gididayssa bessides.

4Kawoti bantta tooranchchatara

issife shiiqida;

histtidi Xiyoono olanawu yida.

5Gido attiin izo be7idi malalettida;

dagammidi guye baqatida.

6Istti hessan de7ishin

istta yashsha kokkorisi oykkides;

miixay oykkida

maccassa mala miixattida.

7Arshey mokkizaso bagga

wolqqama carkon meqqiza

Tarseese markabeta mala

istta kokkorisadasa.

8Nuni siyida malakka,

Ubbaafe Wolqqama

GODAA kataman,

nu Xoossa kataman

izi ooththidayssa

nu be7idos.

Xoossi he katamaa mernaas

minththi essana.

9Abeet Xoossawu,

ne Keeththa giddon

ne mernaa siiqo qoppoos.

10Abeet Xoossawu,

ne sunththa malakka

ne galatay sa7a gaxa gakkides;

ne ushachcha kushey

xilloteththan kumides.

11Ne pirda gishshas,

Xiyoone asay ufayettees;

Yuhuda katamatikka

ufayssan homboceettes.

12Xiyoone yuushon hemettite;

izi gimbeta yuushon

yaanne haa simerettite;

izi shakkota qoodite.

13Yiza yeletas yootana mala,

izi aaho gimbeza akeekitenne

izi miixata xomosite.

14Intte, «Meri mernaas

ha Xoossay nu Xoossa;

nu hayqqana gakkanaas

izi nuna kaaleththana»

giidi yootite.