Mazamure Maxaafa 43

1Abeet Xoossawu! Ne taas pirda;

Xoossa erontta kawoteththatara

ne ta gishshas mootetta;

Cimmiza asatappenne

iita asatappe tana ashsha.

2Ta Xoossawu! Taas ne mino miixa;

histtiin ne tana ays aggadii?

Ta morkketi tana qohishin

ta ceecashe ays de7oo?

3Ne poo7onne ne tuma taas kiitta;

istti tana kaaleththetto;

pude geeshsha zuma bolla

ne dizaso tana gaththetto.

4He wode tani

tana ufayssiza Xoossako baana;

nees yarsho yarshizasoza baada

nees goynnana;

Abeet Godaa ta Xoossawu!

Tani diiththan nena sabbana.

5Tani ays hidota qanxxazinaa?

Qasse ays ceecazinaa?

Tani Xoossan ammanettays;

tana ashshiza ta Xoossaa

ta buro galatana.