Mazamure Maxaafa 42

Nam7anththo Maxaafa

(Maza 42—72)

Zammareta Kaabbos Qoore Nayti Hassa7an Shiishshida Ginxo

1Wushay pultto haath laamotiza mala,

abeet Xoossawu,

tanikka nena laamotays.

2«Ta shemppoya

tani baada Xoossa sinth

beyanay awudeeshshaa?» gaada

Xoossa, de7o Xoossa saamettadus.

3Asay ubbato,

«Ne Xoossi awan dizee?»

giza wode taas gallassinne omars

afunththi quma gidides.

4Ta wozinaya ceeceththan giddora

seerashe haytantta akeekadus;

daro wode ta Xoossa keeth

kaaleththashe

ililisaninne galata yeththan

ba7aale bonchchana

shiiqida daro asa giddora

ta waana bizaakko aamusadis.

5Tani ays hidota qanxxazinaa?

Qasse ays ceecazinaa?

Tani Xoossan ammanettays;

tana ashshiza ta Xoossaa

ta buro galatana.

6Ta Xoossawu!

Ta Wozinaya ceecadus;

hessa gishshas

tani Yordaanoose biittan

Hermoone zumbulla

Mizaare zuma bolla eqqada

nena ta qoppana.

7Ne piissa guunththan

ciimmay ciimmas ankees;

qasse ne dambalaynne

ne carko ubbay

ta bollara aadhdhides.

8GODAY ba mernaa siiqo gallas

taas kiittees.

Tanikka omars izas

galata mazamure shiishshays;

hessika ta de7o Xoossas

shiishshiza woosa.

9Ta Xoossawu taas Zaallawu!

«Ne tana ays dogadii?

Ta morkketi tana qohishin

ta ceecashe

ays de7oo?» gays.

10Ta morkketi tana ubba wode,

«Ne Xoossay awan dizee?»

giidi yo7on tana caddeettes;

meqeththika menththi cayeettes.

11Tani ays hidota qanxxazinaa?

Qasse ays ceecazinaa?

Tani Xoossan ammanettays;

tana ashshiza ta Xoossaa

ta buro galatana.