Geeshsha Mexaafa
Mazamure Maxaafa 32:8
Verse 8 is marked below, with the whole chapter around it. Read from the start
Dawiti Hassa7an Shiishshida Ginxo
Iza mooroy atto geetettidayssinne
iza nagaray
kamettiday anjjettidayssa.
GODAY iza nagara
qoodonttaadeynne
iza qofan
baleththoy baynday anjjettidayssa.1
Tani ta nagara paaxontta dashe
gallas kumeth ceeciin
ta asateththay daaburdes.
Gallassinne qamma ne kushey
ta bolla deexxides;
haaththi bone awan micciza mala
ta wolqqay cingi wurides.
Tani ta nagara nees paaxadis;
ta qohidayssa neeppe
genththabeekke;
«Ta mooroza GODAAS
paaxana» gadis.
Histtiin ne ta nagara
ubbaa atto gadasa.
Hessa gishshas xillo asi
neni beettiza wode nena woosso;
di7oy izi diza heera
meecci efikkoka iza bochchenna.
Neni taas qotettizaso;
neni tana metoppe naagaasa;
tana xoono yeththan
kunththadasa.
GODAY, «Tani nena tamaarsana;
neni baanaas bessiza ogekka
nena erisana;
tani nena zorananne naagana.
Bixalaninne puulon haarettiza
akeekay baynda baqulo mala
woykko para mala
intte hanopite» gees.
Iitatas tuggay daro;
gido attiin GODAAN
ammanettizayta
maaroteththi dooddees.
Intteno xillotoo!
GODAAN ufayettitenne
«Hashshu!» giite;
intteno wozina suuretoo!
Ufayssan ililite!
Source notes (1)
- Cross-reference Oro 4:7-8
Geeshsha Mexaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.