Geeshsha Mexaafa
Mazamure Maxaafa 33
Intteno xillotoo! GODAAN ufayettite;
suure asati ufayssan ililite.
Maasinqo shocishe GODAA galatite;
tammu shayan waaxettida
diiththan izas yexxite.
Ooraththa mazamure izas yexxite;
diiththaa giigsi shocite;
ufayssan ilili giite.
GODAA qaalay tuma;
izi ooththiza ooso
ubbay ammanettizayssa.
GODAY xilloteththanne
tuma pirda dosees;
iza kiyateththi sa7a kumides.
Saloti GODAA qaalan medhettida.
Iza doonappe keziza peenon
salon diza medheteththati medhettida.
Gita abba haaththa
izi issison shiishshides;
ciimma haaththa
minjjason eelissides.
Sa7an diza asi ubbay
GODAAS yayyo;
salo gufanththoy
GODAA bonchcho.
Ays giikko izi haasayiin handes;
izi azaziin minnidi eqqides.
GODAY kawoteththata
halchcho laallana;
istta qofaakka hada ooththana.
GODAA halchchoy
mernaas eqqi daana;
iza wozina qofaykka yeletappe
yeleta gakkanawu daana.
Xoossi izas GODAA gidida
kawoteththay,
izi baas doorida derey
anjjettida dere.
GODAY salon uttidi duge xeellees;
asaa ubbaaka be7ees.
GODAY ba araatan uttidi
sa7an de7iza ubbaa xeellees.
Izi ubbaa wozina medhdhides;
istti ooththiza miish ubbaa erees.
Kawoy ba wottadara
corateththan attenna;
olanchchay ba wolqqa
minoteththan kessi ekkenna.
Tani paran xoonana gi
naagoy hada;
izi ba wolqqa minoteththan
oonakka ashshanawu
dandayenna.
GODAA ayfeti izas yayyizaytanne
iza mernaa siiqo
hidota ooththiza asata xeellees.
Izi hessan istta hayqoppe ashshees;
kosha wodekka istta
shemppora paxa woththees.
Nu shemppoya GODAA
hidota ooththawus;
izi nuus maadonne gondalle.
Nuni geesh gidida
iza sunththan ammanettoos;
nu wozinaykka izan ufayettees.
Abeet GODAWU!
Nuni nenan
hidota ooththizayssa mala
mernaa ne siiqoy nunara gido.
Geeshsha Mexaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.