Mazamure Maxaafa 17

Dawite Woosa

1Abeet GODAWU!

Ta xilloteththan maganniza

magana siya;

ta waasoza ezga;

cimoy baynda woossiza woosaas

zaaro imma.

2Taas xilloteththi neeppe yo;

tumaa ne ayfey xeello.

3Neni qamman tana xomosadasa;

ta wozina paaccadasa;

ne paaccidaa gidikkoka

ta bolla aykkoka demmabeekka.

Ta inxarsay iita haasaybeenna.

4Tani hara asa mala

iita qaala haasaykke;

tani ne azazo naagiza gishshas

gene oge kaallabeekke.

5Ta tohoti ne ogeppe

handarshontta mala

ta tanggoy ne ogeppe

kare kezibeenna.

6Abeet Xoossawu! Tani woossiin

neni siyiza gishshas

tani nena woossays;

ne hayththa taakko zaarada,

tani nees yootizayssa siya.

7Bantta morkketappe baqatizayta

ne ushachcha kushezan

qottada ashshizayssoo!

Ne kiyateththa malalisiza

ogera qonccisa.

8Ne ayfe ciro mala tana naaga;

ne qefeta giddon tana qotta.

9Un7eththiza iitatappenne

dooddi uttida wolqqama

morkketa kusheppe

ne tana ashsha.

10Isttas qadhettiza wozinay baawa;

otoro haasaya haasayeettes.

11Tani bizaso ubbaan

istti tana dooddeettes;

tana duge biittan kundis

yegganaas dereqeettes.

12Istti banttas miza miish

koyza gaammo mala;

woykko geeman zamadi naagiza

wodalla gaammo mala.

13Abeet GODAWU! Denda.

Ta morkketara eqettada

istta shoca;

ne mashshan iitatappe

tana ashsha.

14Abeet GODAWU!

Hessa mala asatappe

tana qotta;

Istta qaaday ha sa7a de7o

xalla gidiza asaappe

ne kushen tana ashsha;

ne mazgaban minjjida qixaateppe

istta kalssa;

istta naytas daridi tirpo;

istta nayta naytaska

gidi palaho.

15Gido attiin tani xilloteththan

ne sinththa beyana;

tani beeggiza wode

ne bonchcho be7ada alana.