Geeshsha Mexaafa
Mazamure Maxaafa 138
Dawite Mazamure
Abeet GODAWU!
Tani ta kumeththa wozinappe
nena galatays;
xoossata sinththan nena sabbays.
Ne geeshsha Keeththakko simmada
nena goynnays;
ne siiqo gishshassinne
ne ammaneteththa gishshas
tani ne sunththa sabbays;
neni ne sunththaanne ne qaala
ubbaafe aaththada
dhoqqu histtadasa.
Tani xeygida gallas taas koyadasa;
ne minoteththan
tana minththeththa.
Abeet GODAWU!
Sa7an diza kawoti ubbay
ne doonappe ke7ida qaala siyidi
nena galatetto!
GODAA bonchchoy
gita gidida gishshas
istti izi ooththida
ooso gishshas yexetto.
GODAY bolla dhoqqan diikkoka
hiyeesata lo7o ayfen xeellees;
gido attiin otoranchchata
izi haahoppe erees.
Tani meto giddon diikkoka
neni tana naagaasa;
ta morkketa hanqo bolla
ne qese denththaasa;
ne ushachcha kushen
tana ashshaasa.
GODAY taas qoppidayssa polana;
abeet GODAWU!
Ne siiqoy mernaassa;
ne kushe ooso yegga aggofa.
Geeshsha Mexaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.