Geeshsha Mexaafa
Mazamure Maxaafa 137
Baabiloone shaafata
lanqen uttidi
nuni Xiyoone qoppida wode
yeekkidos.
Heen nuni nu diiththata
haaththa matan dicciza
miththata bolla kaqqidos.
Nuna di7ida asati nuni yexxidi
istta ufayssana mala,
«Xiyoone yeththafe issaa
ane nuus yexxite» gida.
GODAA mazamure nuni allaga biittan
wostti yexxonii?
Yerusalaame katamayee!
Tani nena balikko
ta ushachcha kushey
ba ooso balo.
Tani nena hassa7ontta aggiko
ta ufayssa ubbaafe aaththada
Yerusalaame dosontta aggiko
ta inxarsay
gonggiraththara oyketto.
Abeet GODAWU!
Yerusalaamey kundiza gallas
Eedoome asati
ooththidayssa qoppa;
istti, «Laallite! Laallite!
Yochchaafe dhoqalli dhayssite!»
gidayssa baloppa.
Hanne Baabiloone biittayee
ne dhayana!
Neni nu bolla polida iita ooso
ne bolla zaari ooththizay
anjjettidayssa.1
Ne guuththa nayta oykkidi
zaalla bolla dincereththizay
anjjettidayssa.
Source notes (1)
- Cross-reference Ajju 18:6
Geeshsha Mexaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.