Geeshsha Mexaafa
Mazamure Maxaafa 116
Izi ta shoobba
woossiza woosa
siyida gishshas
tani GODAA dosays.
Izi ba hayth
taakko yeggida gishshas
tani de7iza wode ubbaan
iza xeygana.
Hayqoy woximade mala
tana dooddi oykkides;
duufon geloy tana hirgisides.
Ceeceynne un7oy
tana toli oykkides.
He wode tani,
«Abeet GODAWU! Hadara!
Tana ashsha»
gaada GODAA sunth xeygadis.
GODAY kiyanne xillo;
nu Xoossay maarizayssa.
GODAY ashketa naagees;
tani metotida wode
izi tana ashshides.
Ta shemppoyee ane woppu ga;
GODAY nees
lo7o miish ooththides.
GODAY tana hayqoppe,
ta ayfe afunththafe,
ta tohokka
dhupheppe ashshides.
Hessa gishshas
tani GODAA sinththan
shemppora paxa dizayta
giddon hemettays.
Ta, «Tani keeha un7ettadis»
giza wodekka
ammano aggabeekke.1
Taas gizaazi dhayiin,
«Asi ubbay wordo» gadis.
Izi taas kiyida kiyateththaa gishshas
tani GODAAS
ay qanxxanaas dandayazinaa?
GODAY tana ashshida gishshas
woyne ushshu galatas shiishshada
iza sunththu xeygana.
Iza deraa ubbaa sinththan
tani adinida adina
GODAAS gaththana.
Geeshshata hayqoy
GODAA sinththan bonchcho.
Abeet GODAWU! Tani ne aylle;
tani ne aylley naa;
tana qashoppe birshadasa.
Abeet GODAWU!
Tani galata yarsho nees yarshana;
histtada ne sunththaa xeygana.
Iza deraa ubbaa sinththan
tani adinettida adina
GODAAS gaththana.
Hessaka tani gaththanay,
Yerusalaamen diza GODAA
keeththa dabaabanna.
GODAY galatetto!
Source notes (1)
- Cross-reference 2Qoro 4:13
Geeshsha Mexaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.